តាមការទម្លាយមុននេះ អោយដឹងថា ស្មាតវ៉ចស៊េរីថ្មី Galaxy Watch8 series របស់ក្រុមហ៊ុនបច្ចេកវិទ្យាយក្ស Samsung នឹងមានការបង្ហាញខ្លួននៅលើទីផ្សារនាពេលឆាប់ៗនេះហើយកន្លងមកធ្លាប់មានការទម្លាយថា ស្មាតវ៉ចថ្មីនេះ អាចនឹងបង្ហាញខ្លួននៅដើមខែកក្កដានេះ ជាមួយនឹងស្មាតហ្វូនបត់បាន Galaxy Z Fold7 និង Z Flip7 ទៀតផង។ សម្រាប់វត្តមានរបស់ស្មាតវ៉ច Watch8 ថ្មីនេះ ត្រូវបានគេបញ្ជាក់ថា ក្រុមហ៊ុន Samsung អាចនឹងប្រើប្រាស់នូវបន្ទះឈីប  Exynos W1000 chip របស់ខ្លួនដូចទៅនឹងឆ្នាំមុនផងដែរ។

មកដល់ពេលនេះ បន្ទះឈីប Exynos W1000 នៅតែនាំមុខគេទៅលើបន្ទះឈីបនៅលើទីផ្សារស្មាតវ៉ច ដោយសារតែឈីបនេះមានល្បឿនលឿន និងមានការប្រើប្រាស់នូវបន្ទះឈីប penta-core CPU អមជាមួយនឹង 4x ARM Cortex-A55 cores ដែលមានល្បឿន 1.5 GHz និង Cortex-A78 ដែលមានល្បឿន 1.6 GHz។ បន្ថែមពីនេះ នៅលើឈីបនេះ ក៏មានក្រាហ្វិកកាត Mali-G68 MP2 GPU និង LPDDR5 RAM ផងដែរ។ បន្ទះឈីប W1000 នេះ គឺត្រូវបានក្រុមហ៊ុនដាក់អោយដំណើរការជាមួយនិងស្ថាបត្យកម្ម 3nm GAA។

សូមជំរាបផងដែរថា ថ្មីៗនេះ មានការបញ្ជាក់ថា ស្មាតវ៉ចជំនាន់ថ្មី Galaxy Watch8 series នេះ នឹងមានប្រភេទ Classic ផងដែរ។ ស្មាតវ៉ច Watch8 Classic នេះ នឹងមានការឌីស្សាញដ៏ទាក់ទាញមិនចាញ់ Galaxy Watch Ultra នោះទេ។ បើមើលទៅលើទំហំស្មាតវ៉ច Watch8 Classic នេះ មានប្រភេទទំហំ 46mm/47mm ជាមួយនឹងអេក្រង់ទំហំ 1.5” ហើយវាមានវិមាត្រ 46 x 46.5 x 14.2 mm។ ស្មាតវ៉ចនេះ មានទំហមថ្ម 450mAh និង One UI 8 Watch ផ្អែកនៅលើ WearOS 6 ផងដែរ៕