Afeela 1 EV គឺជារថយន្តអគ្គិសនីជំនាន់ថ្មីមួយ ដែលត្រូវបានសហការណ៍គ្នាអភិវឌ្ឍ និងផលិតឡើងដោយក្រុមហ៊ុនផលិតរថយន្ត និងបច្ចេកវិទ្យាធំៗរបស់ប្រទេសជប៉ុនចំនួនពីរ គឺក្រុមហ៊ុន Honda និងក្រុមហ៊ុន Sony។ រថយន្តថ្មីនេះ ត្រូវបានគេរាយការណ៌ថា នឹងត្រៀមចេញលក់ជាផ្លូវការណ៌នៅលើទីផ្សារនៅក្នុងឆ្នាំ 2026 ខាងមុខនេះហើយ។
តាមរយៈនៃកិច្ចសហការរវាងក្រុមហ៊ុនធំៗទាំងពីរនេះ គឺបានធ្វើអោយឡានអគ្គិសនីរបស់ជប៉ុនមួយនេះ មានតម្លៃខ្ពស់មិនដូចរថយន្តរបសចិននោះទេ។ បើតាមការបញ្ជាក់ពីក្រុមហ៊ុនទាំងពីរនេះ គឺមានតម្លៃចាប់ពីខ្ទង់ $89,000 ឡើងទៅ ប៉ុន្តែមានការថែមជូន Feature ពិសេសៗ រយៈពេល 3 ឆ្នាំ រួមទាំង Afeela Intelligent Drive, Afeela Personal Agent និង Entertainment Content ផងដែរ។
Afeela 1 EV នេះ ចែកចេញជា 2 ជម្រើស គឺ Origin និង Signature ដោយប្រើម៉ូទ័រអគ្គិសនី 2 មានកម្លាំងសរុប 483 HP ហើយបំពាក់កញ្ចប់អាគុយ ទំហំ 91 kWh ដែលសាកភ្លើងមួយពេញ អាចបើកបរបានចម្ងាយ 300 ម៉ាយ៍ ឬ 480 KM ហើយអ្វីដែលពិសេសនោះ គឺវាអាចសាកភ្លើងដោយប្រើ Tesla Supercharging Network របស់ Tesla បាន ទៀតផង។
បើនិយាយពីរូបរាងរបស់រថយន្តអគ្គិសនី Afeela 1 EV ថ្មីនេះ គឺមានការឌីហ្សាញបែប Sleek និងប្រណីត តែម្តង ខណៈវានឹងចូលមកប្រកួតប្រជែងជាមួយ ឡាន Sedan អគ្គិសនី ដូចជា Lucid Air និង Tesla Model S។
យ៉ាងណាក៏ដោយ Afeela 1 EV មានបំពាក់ Option ពិសេសៗជាច្រើន មិនឲ្យចាញ់គូប្រជែងឡើយ ដូចជា យ៉ាន់កង់ទំហំ 21 អ៊ីញ, អេក្រង់កម្សាន្តផ្នែកខាងក្រោយ, កញ្ចក់ចំហៀងជាប្រភេទកាមេរ៉ា, កុងទ័រឌីជីថល និង អេក្រង់កម្សាន្តធំ លាតពេញលើផ្ទៃតាបឡូ ហើយអ្វីដែលកាន់តែពិសេសនោះ គឺមុខងារជំនួយការបើកបរ Afeela Intelligent Drive ដែលប្រើកាមេរ៉ា, រ៉ាដា និង Ultrasonic Sensor ព្រមទាំង LiDAR ដើម្បីចាប់ឧបសគ្គ និងជំនួយដល់ការបើកបរ ឲ្យមានសុវត្ថិភាពខ្ពស់បំផុត។
