ថ្មីៗនេះនៅក្នុងសន្និសិទសារព័ត៌មានមួយ លោក Villiam Li ដែលជាស្ថាបនិក និងជានាយកប្រតិបត្តិរបស់ក្រុមហ៊ុនផលិតរថយន្ត Nio បានអះអាងថា ក្រុមហ៊ុនរបស់លោកនឹងក្លាយជាក្រុមហ៊ុនផលិតរថយន្តធំបំផុតទាំង 10 របស់ពិភពលោកនៅចុងឆ្នាំ 2035។ លោកបានគូសបញ្ជាក់ថា ក្រុមហ៊ុនត្រូវតែខិតខំប្រឹងប្រែងទ្វេដងក្នុងការតាមឲ្យទាន់ “ដៃគូប្រជែងនៅក្នុងប្រទេសចិន”។

លោក William Li បានចែករំលែកទស្សនៈវិស័យរបស់គាត់ទាក់ទងនឹងការអភិវឌ្ឍន៍ឧស្សាហកម្មរថយន្តសកលក្នុងអំឡុងពេលសន្និសីទសារព័ត៌មានមួយទៅកាន់បណ្តាញ IT Home។ នាយកប្រតិបត្តិ Nio រូបនេះបានរំពឹងថា យ៉ាងហោចណាស់ពាក់កណ្តាលនៃក្រុមហ៊ុនផលិតរថយន្តធំជាងគេលំដាប់កំពូលទាំង 10 នៅលើពិភពលោកក្នុងឆ្នាំ 2035 នឹងជាក្រុមហ៊ុនមានប្រភពកំណើតចេញពីប្រទេសចិន។ ក្នុងពេលជាមួយគ្នានេះ លោក Li បានគូសបញ្ជាក់ថា ក្រុមហ៊ុនរថយន្តមួយចំនួននឹងអាចរស់រានមានជីវិតបានសម្រាប់នាពេលអនាគត ត្រូវតែពិចារណាលើការអភិវឌ្ឍន៍នៃការចែកចាយសម្រាប់ឧស្សាហកម្មក្នុងតំបន់។ សូម្បីតែក្រុមហ៊ុនដែលមានការអភិវឌ្ឍល្អពីដើមក៏អាចត្រូវបានលុបបំបាត់នៅដំណាក់កាលក្រោយនេះដែរ។

លោក William Li បានបញ្ជាក់ដូច្នេះថា ក្រុមហ៊ុនរបស់លោកបានខិតខំប្រឹងប្រែងជាខ្លាំងដើម្បីសម្រេចបាននៅគោលដៅដ៏មហិច្ឆតាក្នុងការស្ថិតក្នុងបញ្ជីក្រុមហ៊ុនផលិតរថយន្តចិនកំពូលទាំង 10 នៅឆ្នាំ 2035។  សម្រាប់ពេលបច្ចុប្បន្ន BYD គឺជាម៉ាកយីហោរថយន្តអគ្គិសនីប្រទេសចិនដ៏មានឥទ្ធិពលបំផុតនៅលើពិភពលោក ក្រុមហ៊ុននេះ លក់រថយន្តសរុបបានជាង 3.74 លានគ្រឿង សម្រាប់រយៈពេល 11 ខែនៃឆ្នាំ 2024។ ហើយទ្រព្យសម្បត្តិរបស់ក្រុមហ៊ុន BYD បច្ចុប្បន្នបានឈានដល់ 107.6 ពាន់លានដុល្លារអាមេរិក។ នៅឆ្នាំនេះ BYD លក់រថយន្ត បានច្រើនជាង SAIC Group ក្រុមហ៊ុនរថយន្តយក្សរបស់ចិន។ ក្រុមហ៊ុនផលិតរថយន្តប្រទេសចិនដែលស្ថិតក្នុងបញ្ចីក្រុមហ៊ុនលំដាប់កំពូលផ្សេងទៀត មានដូចជា FAW, GAC, Geely, BAIC និង Dongfeng។

ក្រុមហ៊ុន Nio បានលក់រថយន្តតិចជាង 200,000 គ្រឿងនៅទូទាំងពិភពលោកក្នុងរយៈពេល 11 ខែដំបូងនៃឆ្នាំ 2024។ ទ្រព្យសម្បត្តិរបស់ Nio បច្ចុប្បន្នមានចំនួន 9.46 ពាន់លានដុល្លារអាមេរិក។ ឆ្នាំនេះក្រុមហ៊ុនដែលមានអាយុ 10 ឆ្នាំរបស់ប្រទេសចិនមួយនេះ មានគោលដៅលក់បាន 23 ម៉ឺនគ្រឿង។ នៅឆ្នាំក្រោយគឺ Nio នឹងឈានជើងចូលទៅក្នុងឧស្សាហកម្មរថយន្តអគ្គិសនីពេញលិញជាមួយនឹងម៉ាកយីហោរថយន្តថ្មីរបស់ខ្លួនដែលទើបបង្កើតឡើងដែលមានឈ្មោះថា Firefly EV។ Nio ក៏នឹងពង្រីកខ្សែស្រឡាយរថយន្តម៉ាក Onvo ពីកម្រិតមធ្យមទៅកម្រិតខ្ពស់ផងដែរ។ គម្រោងទាំងពីរនេះអាចនាំទៅរកការជំរុញបរិមាណការលក់របស់ខ្លួនកើនឡើងសម្រាប់ឆ្នាំ 2025 ខាងមុខនេះ៕