យោងតាមព័ត៌មានថ្មីនៅថ្ងៃនេះ បាននិយាយថា ក្រុមហ៊ុនបច្ចេកវិទ្យា Xiaomi បានត្រៀមខ្លួនរួចជាស្រេចហើយនៅក្នុងការអាប់ដែតទៅលើស្មាតហ្វូនស៊េរីថ្មី Redmi K90 series ដែលគ្រោងនឹងមានការប្រកាសចេញនៅពេលខាងមុខនេះ។ បើតាមការបញ្ជាក់ចេញពីអ្នកទម្លាយ Digital Chat Station ដែលជាប្រភពដ៏គួរអោយទុកចត្តិបាននោះ បានអោយដឹងថា ស្មាតហ្វូនថ្មីនេះនឹងមានអេក្រង់ទំហំ 6.59-អ៊ីង គាំទ្រដោយការបង្ហាញចេញបានកម្រិត 2K LTPS និងជាបន្ទះអេក្រង់រាបស្មើរថែមទៀតផង។

អ្នកទមា្លយរូបនេះបានបន្តថា បន្ទះអេក្រង់ថ្មីដែលមានការអាប់ដែតនេះ គឺស្ថិតនៅក្នុងការអភិវឌ្ឍ ហើយក៏នឹងប្រើប្រាស់នៅលើស្មាតហ្វូនជំនាន់ថ្មី Redmi ស្មាតហ្វូន K90 ដែលជាស្មាតហ្វូនជំនាន់ថ្មីរបស់ក្រុមហ៊ុន Xiaomi ផងដែរ។ អេក្រង់ថ្មីនេះ នឹងមានការប្រើប្រាស់នូវ Pixel Density ខ្ពស់ជាងមុនដែលផ្តល់នូវភាពច្បាស់ និងលម្អិតជាងមុនថែមទៀតផង។ ស្មាតហ្វូននេះនឹងមានការឌីស្សាញទម្រង់ wide-screen layout ជាមួយនឹងគែម slim bezels។

សូមជំរាបថា វត្តមានរបស់ស្មាតហ្វូន K80 Series នាពេលបច្ចុប្បន្ននេះ គឺមានអេក្រង់ទំហំ 6.67-អ៊ីង AMOLED ហើយនឹងមានការអភិវឌ្ឍដោយក្រុមហ៊ុន TCL CSOT ដែលជាក្រុមហ៊ុនផលិតបន្ទះអេក្រង់ដ៏ធំរបស់ប្រទេសចិនផ្ទាល់តែម្តង។ ក្រុមហ៊ុន Xiaomi បានសហការគ្នាជាមួយនឹងក្រុមហ៊ុន  TCL CSOT ក្នុងការផលិតទៅលើអេក្រង់នេះអស់រយៈពេលជាយូរមកហើយ។ អេក្រង់ថ្មីនេះ មានពន្លឺ 3200nits។

ខណៈពេលនេះ គេនៅមិនទាន់មានការបញ្ជាក់ជាផ្លូវការពីក្រុមហ៊ុន Xiaomi នោះទេថា អេក្រង់សម្រាប់ Redmi K90 series មានពន្លឺប៉ុណ្ណោ? ប៉ុន្តែមានការជឿជាក់ច្បាស់ណាស់ថា ក្រុមហ៊ុន Xiaomi នឹងធ្វើការ upgrade ទៅលើអេក្រង់កាន់តែប្រសើរជាងមុន៕