កាលពីប៉ុន្មានថ្ងៃមុននេះ ក្រុមហ៊ុន ZTE Corporation ទើបតែទម្លាយថា ស្មាតហ្វូនជំនាន់ថ្មីរបស់ខ្លួន នឹងមានការផ្តោតទៅលើសមត្ថភាពនៃបច្ចេកវិទ្យា AI ដ៏អស្ចារ្យ។ ក្រុមហ៊ុននេះ បានបង្ហាញនូវភាពជឿជាក់ថា បច្ចេកវិទ្យា Artificial Intelligence នេះគឺជាការបោះជំហានថ្មី ហើយពេលនេះ យើងមានកាលបរិច្ឆេទផ្លូវការនៃការប្រកាសថ្មីនៃស្មាតហ្វូន Nubia ដែលមានបំពាក់នូវបច្ចេកវិទ្យា AI ដ៏អស្ចារ្យនេះហើយ។

ក្រុមហ៊ុនបច្ចេកវិទ្យាយក្សរបស់ចិននេះ បានទម្លាយនៅថ្ងៃទី 1 ខែមេសាឆ្នាំ 2024 នេះថា ក្រុមហ៊ុននេះ នឹងបើកនូវសករាជថ្មីនៃការប្រកាសស្មាតហ្វូនរបស់ខ្លួននៅថ្ងៃទី 9 ខែមេសានេះ។ នៅក្នុងព្រឹត្តិការណ៍នៃការសម្ពោធនេះ ក្រុមហ៊ុននេះ នឹងមានការប្រកាសចេញនូវផលិតផលបំពាក់នូវ AI ជាច្រើនដែលមានស្មាតហ្វូន Nubia AI ផងដែរ។ យោងតាមគណនី Nubia ផ្លូវការនៅលើ Weibo បានទម្លាយថា ការប្រើប្រាស់នូវ AI នឹងក្លាយជាបច្ចេកវិទ្យាដ៏សំខាន់សម្រាប់ស្មាតហ្វូននាពេលខាងមុខនេះ។

កាលពីពេលមុននេះ ក្រុមហ៊ុន ZTE ក៏មានការប្រកាសថា ខ្លួននឹងបន្តជាមួយនឹងរលកនៃបច្ចេកវិទ្យា AI និងការនាំយកនូវបច្ចេកវិទ្យាថ្មីនេះសម្រាប់ស្មាតហ្វូនខាងមុខរបស់ខ្លួនផងដែរ។ សម្រាប់ពេលនេះ ស្មាតហ្វូន Nubia AI ជាច្រើនម៉ូដែលគ្រោងនឹងបង្ហាញខ្លួននៅសប្តាហ៍ក្រោយនេះ។ ស្មាតហ្វូននេះ គឺជាប្រភេទ AI Flagship ដែលនឹងលក់ជាផ្លូវការនៅពាក់កណ្តាលឆ្នាំនេះ។ ក្រុមហ៊ុននេះ ក៏មានគម្រោងក្នុងការប្រើប្រាស់នូវ ZTE Nebula OS ជាមួយនឹង AI នេះដើម្បីធ្វើអោយ AI platform មានភាពប្លែកក្នុងការប្រើប្រាស់ជាមួយនឹង Big Data, 3D Technology និងមុខងារជាច្រើនទៀត៕