នៅថ្ងៃនេះ ក្រុមហ៊ុន Nio បានបញ្ចេញនូវឡាន 2025 ET5 sedan របស់ខ្លួន ដែលមានការផ្លាស់ប្តូរទៅលើការឌីស្សាញរូបរាង និង hardware ក៏ដូចជាការអាប់ដែតលើផ្នែកខាងក្នុងថែមទៀតផង ដើម្បីធ្វើការប្រកួតប្រជែងជាមួយនិងដៃគូរជាច្រើននៅលើទីផ្សារឡានអគ្គិសនីនៅប្រទេសចិន។ ក្រៅពីនេះ ក្រុមហ៊ុនផលិតរថយន្តអគ្គិសនីរបស់ចិនមួយនេះ ក៏មានការបំពាក់បន្ថែមនូវមុខងារថ្មីៗសម្រាប់ប្រើប្រាស់អោយកាន់តែសំបូរបែបសម្រាប់អតិថិជនទទួលបាននូវបទពិសោធន៌ថ្មីៗពីរថយន្តនេះផងដែរ។

ឡានអគ្គិសនី Nio ET5 2025 ថ្មីនេះ គឺមានការផ្លាស់ប្តូរទៅលើការឌីស្សាញផ្នែកខាងមុខ ជាពិសេសគឺទៅលើចង្កៀង Daytime Running Lights ខណៈដែល Headlights គឺមានការប្រើប្រាស់នូវអំពូលអគ្គិសនី LED matrix technology ជាមួយនិងការអាប់ដែតខុសពីមុន។ នៅក្នុងនោះក្រុមហ៊ុននេះក៏បានធ្វើការពង្រីករន្ធខ្យល់នៅលើប៉ាណាខាងមុខធំជាងមុន ដែលផ្តល់អោយឡានអគ្គិសនី Nio ET5 2025 អាចរត់នៅលើផ្លូវបានកាន់ស្រួល និងមានលំហូរខ្យល់រលូនជាងមុន។ Nio ET5 2025 មានដំបូលកញ្ចក់ Panoramic glass roof និងមានស៊ុមទ្វារកាន់តែស្តើង ហើយនិងមានដៃទ្វារដូចមុនអញ្ចឹង។ ជាមួយគ្នានេះ នៅលើ spoiler ខាងក្រោយក៏មានការបន្ថែមនូវអំពូល lightbar taillight ផងដែរ។

សម្រាប់ការផ្លាសប្តូរសំខាន់ជាងគេមួយទៀតនោះ គឺការប្រើប្រាស់នូវ hardware ថ្មីសម្រាប់ជំនួយដល់ប្រព័ន្ធបើកបរដោយស្វ័យប្រវត្តិនៅលើរថយន្តនេះ។ ឡានអគ្គិសនី Nio ET5 2025 ថ្មីនេះ នៅបន្តប្រើប្រាស់នូវសិនស័រ Lidar និងប្រព័ន្ធកាមេរ៉ានៅដដែល ប៉ុន្តែក្រុមហ៊ុននេះបានធ្វើការដាក់អោយដំណើរការនៅលើបន្ទះឈីប NX9031 កម្រិត 5nm ដែលជាឈីបរបស់ Nio ផ្ទាល់តែម្តង។ បន្ទះឈីបនេះត្រូវបានក្រុមហ៊ុនធ្វើការឌីស្សាញឡើងសម្រាប់ជាជំនួយដល់ល្បឿននៃការប្រើប្រាស់ ហើយនិងពង្រីកទៅលើមុខងារបើកបរស្វ័យប្រវត្តិអោយកាន់តែមានភាពទូលំទូលាយជាងមុន។

នៅលើឡានអគ្គិសនី Nio ET5 2025 ថ្មីនេះ ក៏មានការទ្រទ្រង់នូវ AI assistant, NOMI ដែលផ្តល់នូវភាពសំបូរបែបកាន់តែខ្លាំងសម្រាប់អ្នកប្រើប្រើប្រាស់។ ឡានអគ្គិសនី Nio ET5 2025 ថ្មីនេះ នៅតែបន្តប្រើប្រាស់នូវម៉ូទ័រភ្លោះ ដែលមានសមត្ថភាពអាចបង្កើតថាមពលបាន 360kW ព្រមទាំងរក្សានូវទំហំអាគុយដូចម៉ូដែលមុនត្រឹមតែ 75 kWh ដូចគ្នា ដោយអាចរត់បានចម្ងាយ 560km ខណៈមួយទៀតអាចរត់បាន 710km តាមស្តង់ដារ CLTC។ Nio ET5 2025 ថ្មីទាំងពីរជម្រើសនេះ គឺមានការប្រើប្រាស់នូវបច្ចេកវិទ្យាសាក 180kW fast charging និងអាចធ្វើការប្តូរថ្មនៅតាមស្ថានីយ៌ Nio បានផងដែរ។