ប្រទេសអារ៉ាប៊ីសាអូឌីតបានបោះជំហានដ៏សំខាន់មួយនៅក្នុងអាណាចក្រនៃយុគសម័យបច្ចេកវិទ្យាទំនើបជាមួយនឹងការបើកដំណើរការវេទិកា "Metaverse" កម្រិតជាតិដំបូងគេរបស់ពិភពលោក។ អាណាចក្រឌីជីថលដែលប្រកបដោយភាពច្នៃប្រឌិតនេះបានរួមបញ្ចូលគ្នានូវពិភពនិម្មិត និងពិភពរូបវន្ត ដោយផ្តល់ជូននូវបទពិសោធន៍កម្រិត 3D ដ៏អស្ចារ្យដែលបានចែករំលែកក្នុងចំណោមអ្នកប្រើប្រាស់ទាំងអស់។ ការលេចឡើងនៃពិភពលោក Metaverse នៅក្នុងប្រទេសអារ៉ាប៊ីសាអូឌីត ត្រូវបានកំណត់ដើម្បីធ្វើបដិវត្តវិស័យផ្សេងៗ ចាប់ពីវិស័យអាជីវកម្ម និងការអប់រំ រហូតដល់ការថែទាំសុខភាព និងទេសចរណ៍។

យោងតាមចុះផ្សាយពីបណ្តាញសារព័ត៌មាន Gulf News និងក្រសួងវប្បធម៌នៃប្រទេសអារ៉ាប៊ីសាអូឌីត ប្រទេសនេះបានបើកដំណើរការវេទិកាពិភពលោកឌីជីថល “Metaverse” កម្រិតជាតិដំបូងបង្អស់របស់ពិភពលោក។ វេទិកានេះត្រូវបានដំណើរការដោយ "Generative Media Intelligence" (GMI) កម្រិតខ្ពស់ ហើយប្រព័ន្ធឆ្លាតវៃផ្តល់ការគាំទ្រផ្នែកបច្ចេកទេសផ្សេងៗនៅលើ Platform ទំនើបមួយនេះ។ ការបាញ់បង្ហោះនេះបានធ្វើឡើងនៅថ្ងៃខួបនៃការបង្កើតប្រទេសអារ៉ាប៊ីសាអូឌីត (ទី 22 ខែកុម្ភៈ)។

ការដាក់បនង្ហាញពិភពលោកឌីជីថលដ៏ទំនើបនេះ គឺក្នុងគោលបំណងរួមបញ្ចូលនូវអត្ថន័យនៃវប្បធម៌ និងសិល្បៈ និងការច្នៃប្រឌិតផ្នែកឌីជីថល។ វេទិកានេះក៏បង្ហាញពីសមិទ្ធិផលនៃតន្ត្រី អារ៉ាប៊ីសាអូឌីត សិល្បៈ ប្រវត្តិសាស្ត្រ ការចម្អិនអាហារ និងវប្បធម៌សិប្បកម្មជាដើម។ វេទិកានេះក៏មានហ្គេមវីដេអូខ្នាតតូច និងមជ្ឈមណ្ឌលសម្តែង និងគាំទ្រការផ្សាយព្រឹត្តិការណ៍បន្តផ្ទាល់ ដូចជាការប្រគុំតន្ត្រីស៊ីមហ្វូនីជាដើម។ វាមានលក្ខណៈពិសេសដូចជាផ្នែក "ប្រវត្តិសាស្ត្រ និងវប្បធម៌" ដែលត្រូវបានរចនាឡើងដើម្បីលើកទឹកចិត្តទស្សនិកជនទូទាំងពិភពលោកឱ្យស្វែងយល់ពីបេតិកភណ្ឌ និងវប្បធម៌របស់ប្រទេសអារ៉ាប៊ីសាអូឌីតមាន។

អ្នកប្រើប្រាស់អាចចូលប្រើវេទិកា "Metaverse Platform" កម្រិតថ្នាក់ជាតិនេះ តាមរយៈទូរសព្ទដៃ, កាស VR Headset, កុំព្យូទ័រ និងឧបករណ៍ផ្សេងទៀតបាន។ មនុស្សរាប់លាននាក់អាចចូលទៅកាន់វេទិកា "Metaverse" មិនថាពួកគេនៅទីណា ឬប្រើបច្ចេកវិទ្យាអ្វីនោះទេ។ ជាមួយនេះ ពួកគេអាចចូលរួម និងទទួលបទពិសោធន៍ពីវប្បធម៌អារ៉ាប៊ីសាអូឌីតដោយផ្ទាល់នៅក្នុងពិភពលោកឌីជីថត Metaverse Platform៕