ស្មាតហ្វូន iPhone បង្ហាញខ្លួនជាលើកដំបូងបំផុតនៅក្នុងខែមិថុនាឆ្នាំ 2007 ដែលមានន័យថា យើងនឹងអបអរទៅលើខួបរយៈពេល 20 ឆ្នាំរបស់ក្រុមហ៊ុននេះនៅក្នុងឆ្នាំ 2027 ហើយលោក  Mark Gurman របស់ស្ថាប័នBloomberg’ បញ្ជាក់ថា ក្រុមហ៊ុន Apple អាចនឹងធ្វើការរៀបចំនូវការឌីស្សាញដ៏ធំមួយទៅលើផលិតផលជាច្រើនរបស់ខ្លួន។ ក្រុមហ៊ុនបច្ចេកវិទ្យា Apple នឹងប្រកាសបង្ហាញនូវស្មាតហ្វូន iPhone ដែលអាចបត់បានដំបូងបំផុតរបស់ខ្លួននៅក្នុងឆ្នាំ 2027 នេះជាមួយនឹងស្មាតហ្វូន  iPhone 19 Pro ដែលនឹងប្រើប្រាស់នូវកញ្ចក់។

នៅមិនទាន់មានព័ត៌មានលម្អិតច្រើនអំពីស្មាតហ្វូននេះទេ ប៉ុន្តែគ្រាន់តែដឹងថាវាមានភាគរយច្រើនដែលស្មាតហ្វូននេះនឹងធ្វើឡើងពីកញ្ចក់ដូចទៅនឹងស្មាតហ្វូន Xiaomi Mix Alpha ជាដើម។ យោងតាមពាក្យចចាមអារ៉ាមជាច្រើន បាននិយាយអំពីស្មាតហ្វូន iPhone ដែលធ្វើឡើងពីកញ្ចក់នេះ គឺមានការលេចលឺជាច្រើនឆ្នាំមកហើយ។ សូមជំរាបថា លោក Jony Ive ដែលជាអតីតប្រធានផ្នែកឌីស្សាញរបស់ក្រុមហ៊ុន Apple កន្លងមក ធ្លាប់ចង់ផលិតស្មាតហ្វូន iPhone ធ្វើពីកញ្ចក់ ចាប់តាំងពីឆ្នាំ 2017 មកម្លេះ ដោយម៉ូដែលនេះ នឹងមានរូបរាងថ្មី កម្រ៉ាស់ស្តើង និងស្លីម ផ្តល់នូវភាពប្រណិតបំផុតនៅក្នុងការប្រើប្រាស់។

សម្រាប់ការបញ្ជាក់នៅក្នុងរបាយការណ៍ចុងក្រោយបំផុតចេញពីលោក Gurman បានអោយដឹងថា ស្មាតហ្វូនជំនាន់ថ្មី iPhone 17 Pro Series នេះ នឹងមិនមានការឌីស្សាញខ្នងក្រោយ ដែលប្រើប្រាស់នូវ 2-Tone ដូចការទម្លាយចេញនៅលើរូបភាពនាពេលថ្មីៗនេះនោះទេ ដោយម៉ូដែលនេះ នឹងប្រើប្រាស់នូវពណ៌ដូចទៅនឹងស្មាតហ្វូន iPhone 16 Pro អញ្ចឹង៕