ថ្មីៗនេះ ក្រុមហ៊ុនបច្ចេកវិទ្យាយក្ស  Apple ទើបតែជជែកជាមួយនឹងក្រុមហ៊ុនបច្ចេកវិទ្យាអ៊ីនធឹណិតដ៏ធំរបស់ចិន Baidu នៅក្នុងការប្រើប្រាស់នូវសេវាកម្ម Baidu’s Ernie Bot, Large Language Model (LLM) នៅលើស្មាតហ្វូន iPhone 16 Series និងផលិតផលជាច្រើនទៀតរបស់ខ្លួនសម្រាប់ទីផ្សារនៅក្នុងប្រទេសចិន នេះបើតាមរបាយការណ៍មួយចេញពី Cailian Press ។ ការផ្លាស់ប្តូរនេះ គឺចំពេលដែលក្រុមហ៊ុន Apple បាននឹងកំពុងតែព្យាយាមនៅក្នុងការអនុលោមទៅតាមបទបញ្ញត្តិ ដ៏តឹងរឹងរបស់ចិន ទៅលើការប្រើប្រាស់នូវមាតិកា AI នោះ។

របាយការណ៍ខាងលើនេះ បានបញ្ជាក់ថា ក្រុមហ៊ុន Apple នឹងប្រើប្រាស់នូវ Ernie Bot សម្រាប់ប្រព័ន្ធប្រតិបត្តិការ iOS 18 និង Mac OS នៅក្នុងប្រទេសចិន។ ក្រុមហ៊ុននេះត្រូវបានគេរាយការណ៍បន្ថែមថា ក៏បានធ្វើការជជែកជាមួយនឹងក្រុមហ៊ុនជាច្រើនរបស់ចិនដែលក្នុងនោះមាន Alibaba និងសាកលវិទ្យាល័យ Tsinghua University នៅក្នុងការប្រើប្រាស់នូវ AI មុនពេលដែលជ្រើសរើសធ្វើការជាមួយនឹងក្រុមហ៊ុន Biadu ផងដែរ។

សម្រាប់ទីផ្សារក្រៅពីប្រទេសចិនវិញ ក្រុមហ៊ុន Apple ប្រហែលជាប្រកាន់ខ្ជាប់នូវការប្រើប្រាស់នូវ AI របស់ខ្លួន ឬ Google’s Gemini ប៉ុន្តែក្រុមហ៊ុននេះ ក៏បានអភិវឌ្ឍទៅលើដំណោះស្រាយសម្រាប់ទីផ្សាររបស់ចិនផងដែរដើម្បីអោយវាអនុលោមទៅតាមបទបញ្ញត្តិនៅទីនេះ។ ដំណឹងនេះ ចំពេលនៃការធ្វើដំណើរទស្សនកិច្ចរបស់លោក Tim Cook នាយកប្រតិបត្តិរបស់ក្រុមហ៊ុន Apple ទៅកាន់ប្រទេសចិន ហើយគាត់ក៏បញ្ជាក់ជាថ្មីនៃការប្តេជ្ញាចិត្តរបស់ក្រុមហ៊ុន Apple សម្រាប់ទីផ្សារមួយនេះ និងជួបជាមួយនឹងអ្នកផ្គត់ផ្គង់ធំៗនៅទីនេះផងដែរ។ លោក Tim Cook ក៏បានសរសើរទៅអ្នកផ្គត់ផ្គង់ជាច្រើនរបស់ចិនសម្រាប់ការបោះជំហានទៅរកកាបូនស្មើសូន្យផងដែរ។

លោក Cook បានប្រកាសអំពីផែនការជាច្រើនរបស់ខ្លួនក្នុងការពង្រីកទៅលើមជ្ឈមណ្ឌលស្រាវជ្រាវរបស់ក្រុមហ៊ុន Apple នៅក្នុងទីក្រុងស៊ាងហៃ និងការបង្កើតនូវមន្ទីរពិសោធន៍ស្រាវជ្រាវនៅក្នុងទីក្រុង Shenzhen ផងដែរ។ គួរបញ្ជាក់ផងដែរថា កិច្ចសហការដ៏មានសក្តានុពល នេះគឺស្របទៅនឹងយុទ្ធសាស្រ្តរបស់ក្រុមហ៊ុន Samsung ផងដែរ។ ក្រុមហ៊ុន Samsung បានប្រើប្រាស់នូវ Google’s Gemini AI ជាសាកល ប៉ុន្តែក៏សហការជាមួយនឹង Baidu’s Ernie នៅលើទីផ្សាររបស់ចិនជាមួយនឹងស្មាតហ្វូន  Galaxy S24 series របស់ខ្លួនផងដែរ។

ទាក់ទងនឹងបញ្ហានេះ ក៏មានផលវិបាកផងដែរ ទាំងក្រុមហ៊ុន Apple និង Baidu គឺសុទ្ធតែប្រឈមមុខទៅនឹងបញ្ហាជាច្រើនផ្នែកច្បាប់ដូចគ្នា។ ប្រទេសចិនបានបង្កើតនូវបទបញ្ញត្តិជាច្រើនដែលគ្រប់គ្រងខ្លាំងទៅលើការប្រើប្រាស់នូវសេវាកម្ម Generative AI ដែលត្រូវតែអនុលោមទៅតាមច្បាប់ និងមាតិកាដែលប្រទេសចិនបានកំណត់សិន។ សម្រាប់ដំណឹងនៃកិច្ចសហការរបស់ Apple-Baidu នេះ បានធ្វើអោយភាគហ៊ុនរបស់ Baidu កើនឡើង 6% ផងដែរនៅក្នុងទីក្រុងហុងកុង។

យើងនឹងរង់ចាំមើលបន្តទៀតនៅពេលដែលក្រុមហ៊ុន Apple រៀបចំនូវព្រឹត្តិការណ៍ Worldwide Developers Conference (WWDC) 2024 របស់ខ្លួនចាប់ពីថ្ងៃទី 10 ដល់ 14 ខែមិថុនាខាងមុខនេះ។ ក្រុមហ៊ុននេះ នឹងបង្ហាញនូវ iOS 18 ជាមួយនឹង Generative AI និង AI Apps ជាច្រើនទៀតផងដែរ៕