យោងតាមការចេញផ្សាយព័ត៌មានថ្ងៃនេះបានបញ្ជាក់ថា នៅពេលនេះ គឺជាលើកដំបូងហើយក្រុមហ៊ុន Apple បានធ្លាក់ចេញពីក្រុមហ៊ុនកំពូលទាំង 5 នៅក្នុងទីផ្សារស្មាតហ្វូនរបស់ប្រទេសចិន ដោយក្រុមហ៊ុននេះ បានឈរចំណាត់ថ្នាក់លេខ 6 នៅក្នុងត្រីមាសទី 2 ឆ្នាំ 2024 នេះ។ ផ្អែកលើទិន្នន័យមួយចេញពីក្រុមហ៊ុនស្រាវជ្រាវទីផ្សារ Canalys បានបង្ហាញថា ការនាំចេញស្មាតហ្វូន iPhone របស់ក្រុមហ៊ុន Apple ក្នុងប្រទេសចិន គឺមានការធ្លាក់ចុះចំនួន 6.7% បើធៀបទៅនឹងឆ្នាំមុននេះ។

ការធ្លាក់ចុះរបស់ក្រុមហ៊ុន Apple នេះ គឺត្រូវបានគេសន្មត់ថា មានការប្រកួតប្រជែងខ្លាំងជាមួយនឹងក្រុមហ៊ុននៅក្នុងស្រុកជាច្រើនរួមមានដូចជា Huawei, Vivo, Oppo, Honor និង Xiaomi ជាដើម។ ក្រុមហ៊ុន Huawei ត្រូវបានគេមើលឃើញថា បានចាប់ផ្តើមមានការងើបឡើងវិញទៅលើទីផ្សារស្មាតហ្វូនប្រណិតដោយសារតែក្រុមហ៊ុននេះ បានប្រើប្រាស់នូវបន្ទះឈីបកម្រិតខ្ពស់ដែលផលិតនៅក្នុងប្រទេសចិនផងដែរ។

ក្រុមហ៊ុន Canalys បញ្ជាក់ថា ទីផ្សារស្មាតហ្វូនទាំងមូលនៅក្នុងប្រទេសចិន គឺមានការកើនឡើងចំនួន 10% បើធៀបទៅនឹងឆ្នាំមុននេះសម្រាប់ត្រីមាសទី 2 ក្នុងឆ្នាំ 2024 នេះ ដែលមានការនាំចេញច្រើនជាង 70 លានគ្រឿង។ ក្រុមហ៊ុន vivo គឺទទួលបាននូវចំណាត់ថ្នាក់លេខ 1 ជាមួយនឹងការនាំចេញស្មាតហ្វូនចំនួន 13.1 លានគ្រឿង ដែលមានចំណែកទីផ្សារចំនួន 19% ។ ក្រុមហ៊ុន OPPO មានការនាំចេញស្មាតហ្វូនចំនួន 11.3 លានគ្រឿង ក្រុមហ៊ុន Honor លក់ស្មាតហ្វូនបានចំនួន 10.7 លានគ្រឿង និងក្រុមហ៊ុន Huawei នាំចេញស្មាតហ្វូនបាន 10.6 លានគ្រឿង។ ក្រុមហ៊ុន Xiaomi គឺមានការកើនឡើងចំនួន 17% បើធៀបទៅនឹងឆ្នាំមុននេះដែលមានការនាំចេញស្មាតហ្វូនបានចំនួន 10 លានគ្រឿង។

សម្រាប់ការនាំចេញរបស់ក្រុមហ៊ុន Apple គឺមានការធ្លាក់ចុះ 9.7 លានគ្រឿង ដែលស្មើនឹង 14% នៃចំណែកទីផ្សារ។ ការកើនឡើងនៃការប្រកួតប្រជែង និងសក្តានុពលនៃទីផ្សារនៅក្នុងប្រទេសចិន ក៏បានបង្ករនូវបញ្ហាប្រឈមជាច្រើនសម្រាប់ក្រុមហ៊ុន Apple ផងដែរ។ ចំនែកទីផ្សាររបស់ក្រុមហ៊ុននេះមានការធ្លាក់ចុះពី 16% នៅក្នុងឆ្នាំមុននេះមកនៅត្រឹមតែ 14% ដេលបានរុញក្រុមហ៊ុននេះពីលេខរៀងទី 3 ទៅកាន់លេខរៀងទី 6។ បើទោះបីជាក្រុមហ៊ុននេះផ្សព្វផ្សាយនូវការចុះតម្លៃដល់ទៅ 23% នោះ ក្រុមហ៊ុន Apple បានខិតខំតស៊ូយ៉ាងខ្លាំងដើម្បីរក្សានូវចំណាត់ថ្នាក់របស់ខ្លួននៅលើទីផ្សារ។

គួរបញ្ជាក់ថាថ្មីៗនេះ លោក Jeff Williams ដែលជាប្រធានផ្នែកប្រតិបត្តិរបស់ក្រុមហ៊ុន Apple បានទៅទស្សនកិច្ចនៅក្នុងប្រទេសចិន និងបានជួបជាមួយនឹងមន្ត្រីជាច្រើននៅក្នុងទីក្រុងប៉េកាំង និងទីក្រុង Shenzhen ដើម្បីពង្រឹងនូវការប្តេជ្ញាចិត្តរបស់ក្រុមហ៊ុន Apple ទៅកាន់ទីផ្សាររបស់ប្រទេសចិន។

អ្នកវិភាគ Lucas Zhong របស់ក្រុមហ៊ុន Canalys វិញ ក៏បានសង្កត់ធ្ងន់ទៅលើសារៈសំខាន់នៃក្រុមហ៊ុននេះ នៅក្នុងការធ្វើមូលដ្ឋានីយកម្ម Apple Intelligence នៅក្នុងប្រទេសចិនសម្រាប់ទីផ្សាររបស់ប្រទេសចិន ដើម្បីទទួលបាននូវចំណែកទីផ្សាររបស់ខ្លួនឡើងវិញ។ ក្រុមហ៊ុន Apple នឹងបញ្ចេញស្មាតហ្វូន iPhone 16 Series នៅឆ្នាំនេះហើយស្មាតហ្វូននេះ ត្រូវបានគេរំពឹងថា នឹងជួយពង្រឹងទៅលើទីផ្សាររបស់ក្រុមហ៊ុន Apple អោយកាន់តែមានសក្តានុពលជាងមុនផងដែរ៕