នៅទីបំផុត ក្រុមហ៊ុន ASUS បានប្រកាសចេញជាផ្លូវការនូវឧបករណ៍លេងហ្គេមម៉ូដែលថ្មីចុងក្រោយបំផុតរបស់ខ្លួន ROG Ally X ដែលបានបង្ហាញខ្លួនកាលពីដើមខែមុននេះហើយ។ ឧបករណ៍លេងហ្គេមនេះ គឺជាជំនាន់ថ្មីរបស់ឧបករណ៍ ROG Ally ដែលមានកាលពីឆ្នាំមុន។ សម្រាប់វត្តមានរបស់ ROG Ally X នៅពេលនេះ គឺមានការ Upgrade ទៅលើមុខងារជាច្រើន។ ROG Ally X មានការអាប់ដេតធំបំផុតទៅលើថាមពលថ្មធំជាងមុនដល់ទៅ 80Wh ប្រៀបធៀបជាមួយនិង ROG Ally ដែលប្រកាសចេញកាលីពីឆ្នាំមុននេះ គឺមានទំហំត្រឹមតែ 40Wh ប៉ុណ្ណោះ។ ក្រុមហ៊ុន Asus មិនទាន់បានអះអាងអំពីរយៈពេលនៃការប្រើប្រាស់ថាមពលថ្មនៅលើ Ally X នោះទេ។

ជាមួយគ្នានេះ ក្រុមហ៊ុន ASUS ក៏មានការពង្រឹងទៅលើទំហំម៉េមូរី និងរ៉េមសម្រាប់ ROG Ally X ផងដែរ។ នៅលើ ROG Ally X គឺមានការបំពាក់នូវអង្គចងចាំទំហំ 1TB PCIe NVMe SSD ដែលបានបង្កើនពី 512GB នៅលើម៉ូឌែលជំនាន់មុននេះ។ អ្វីដែលសំខាន់ជាងនេះទៀតនោះ ROG Ally X នេះ គឺមានការប្រើប្រាស់នូវម៉េមូរី M.2 2280 ថែមទៀតផង។ សម្រាប់ការប្រើប្រាស់រ៉េមវិញ ក្រុមហ៊ុន ASUS ក៏មានការ upgrade ពីរ៉េមទំហំ 16GB ល្បឿន 6400MHz LPDDR5 ទៅកាន់ទំហំ 24GB ល្បឿន 7500MHz LPDDR5 ផងដែរ ដែលនេះ មានន័យថា រ៉េមនេះ អាចប្រើប្រាស់ជាមួយនឹង GPU និង OS ឬ Apps បាននៅលើ system ដោយគ្មានបញ្ហានោះទេ។

បន្ថែមពីនេះ ក្រុមហ៊ុន ASUS ក៏បានធ្វើការផ្លាស់ប្តូរទៅលើប្រព័ន្ធត្រជាក់ cooling system ខាងក្នុងម៉ាស៊ីន ROG Ally X ផងដែរ។ ឧបករណ៍ ROG Ally X គឺមានការប្រើប្រាស់នូវកង្ហារថ្មីដែលមានទំហំស្តើងតូចជាងមុនដែលអាចបង្កើនទៅលើលំហូរខ្យល់បានដល់ទៅ 10%។ ការឌីស្សាញរូបរាងថ្មីនេះ អាចធ្វើអោយម៉ាស៊ីននេះត្រជាក់នៅក្នុងពេលលេងហ្គេមថែមទៀតផង។ សម្រាប់ joysticks នៅលើឧបករណ៍នេះក៏មានការពង្រឹងកាន់តែប្រសើរថែមទៀត។ សម្រាប់ប៊ូតុងផ្នែកខាងក្រោយរបស់ឧបករណ៍លេងហ្គេមនេះក៏មានទំហំតូចជាងមុនថែមទៀតផងដែរ។

បើមើលទៅលើការតភ្ជាប់នៅលើ ROG Ally X នេះ គឺមានការប្រើប្រាស់នូវរន្ធ USB-C + ROG XG Mobile Interface connector សម្រាប់ dual USB-C ports, Thunderbolt 4 និង  USB 3.2 Gen 2។ ROG Ally X ថ្មីនេះ មានទម្ងន់ 678g ដែលធ្ងន់ជាងម៉ូឌែលជំនាន់ទី 1 ដល់ទៅ 68g ។

ឧបករណ៍លេងហ្គេម ROG Ally X នេះ ដំណើរការជាមួយបន្ទះឈីប Ryzen Z1 Extreme chip ហើយសម្រាប់អេក្រង់ ROG Ally X គឺមានទំហំ 7-អ៊ីងកម្រិត 1080p ល្បឿន 120Hz IPS LCD និងមានការគាំទ្រជាមួយនឹង AMD FreeSync Premium ទៀតផង។ ឧបករណ៍លេងហ្គេមនេះ មានការប្រើប្រាស់ឆ្នាំងសាកកម្លាំង 65W charger ហើយនិងដំណើរការនូវ Version ថ្មីនៃ ASUS Armoury Crate SE នៅលើ Windows 11 Home ថែមទៀតផង។