BYD Song Ultra DM-i ថ្មីបើកបរអគ្គិសនីសុទ្ធបាន 310km ត្រៀមសម្ពោធចុងខែនេះហើយ នៅថ្ងៃនេះ BYD បានប្រកាសថា Song Ultra DM-i ស៊េរីថ្មី នឹងមានការដាក់សម្ពោធនៅលើទីផ្សារប្រទេសចិននាថ្ងៃទី 28 ខែឧសភានេះហើយដែលនេះ គឺជាឡាន SUV ប្រភេទ (PHEV) ថ្មីនៃម៉ូដែល Song Ultra ដែលមានការប្រើប្រាស់នូវបច្ចេកវិទ្យា DM hybrid technology ជំនាន់ទី 5 របស់ BYD នេះបើតាមការបញ្ជាក់ពី IThome។ សម្រាប់វត្តមាននៅពេលនេះ BYD Song Ultra DM-i ថ្មី គឺមាន 2 ជម្រើស ដោយមួយមានអាគុយ 26.6 kWh និងទីពីរទំហំ 38kWh មានសមត្ថភាពអាចបើកអគ្គិសនីសុទ្ធបានចម្ងាយ 205km និង 310km តាមស្តង់ដារ CLTC។

ជាមួយគ្នានេះនៅលើម៉ូដែលថ្មីនេះ ក៏ត្រូវបានគេជឿជាក់ថា នឹងមានការបំពាក់នូវជំនួយការបើកបរជំនាន់ថ្មី “God’s Eye” មកជាមួយផងដែរ ខណៈដែល BYD នៅមិនទាន់បញ្ជាក់ច្បាស់នៅឡើយ។ Song Ultra DM-i នេះ ត្រូវបានក្រុមហ៊ុនដាក់លក់តម្លៃចាប់ពី 151,900 យ៉ន់ (21,100 ដុល្លារ) ទៅ 179,900 យ៉ន់ (25,000 ដុល្លារ)។ BYD Song Ultra DM-i គឺមានការឌីស្សាញដូចគ្នាជាមួយនិងម៉ូដែលអគ្គិសនីសុទ្ធអញ្ចឹង ដោយតួរខ្លួនមានប្រវែង 4,850mm ទទឹង 1,910mm និងកំពស់ 1,670mm ខណៈដែលគម្លាតកង់មុខក្រោយគឺមានប្រវែង 2,840mm។ ទាក់ទងទៅនឹងការឌីស្សាញផ្នែកខាងក្នុង ក៏មិនខុសគ្នាដែរ ។ 

ក្រឡេកមកកម្លាំងវិញ នៅលើម៉ូដែល Song Ultra DM-i នេះ គឺមានការប្រើប្រាស់នូវបច្ចេកវិទ្យា DM hybrid technology ជំនាន់ទី 5 របស់ BYD គាំទ្រដោយម៉ាស៊ីនសាំង 1.5-litre ហើយនិងម៉ូទ័រអគ្គិសនី។ សម្រាប់ម៉ាស៊ីនឡាននេះ គឺមានកម្លាំងសរុប 74 kW ខណៈដែលម៉ូទ័រមានកម្លាំង 175 kW។ ក្រុមហ៊ុន BYD បញ្ជាក់ថា សម្រាប់ម៉ូដែលអាគុយទំហំ 26.6 kWh អាចបើកបរអគ្គិសនីសុទ្ធ 205km តាមស្តង់ដារ CLTC និងអាគុយទំហំ 38 kWh បើកបរបានចម្ងាយ 310km តាមស្តង់ដារ CLTC electric range។