យោងតាមការចេញផ្សាយព័ត៌មានថ្មីពីសារព័ត៌មាន carnewschina នៅថ្ងៃនេះ បានបង្ហាញថា កាលពីខែមេសាកន្លងទៅនេះ ការលក់រថយន្តនៅលើទីផ្សាប្រទេសចិន គឺមានចំនួន 1.755 លានគ្រឿងនៅក្នុងសម្រាប់រថយន្តប្រភេទ Sedans និង hatchbacks គឺមានការលក់ចេញបាន 821,000 គ្រឿង កើនឡើង 13.3% ប្រៀបធៀបជាមួយនិងឆ្នាំមុន ខណៈដែលម៉ូដែល SUVs លក់បាន 847,000 គ្រឿង កើនឡើង 16.4% ប្រៀបធៀបជាមួយនិងឆ្នាំមុន។

ក្រឡេកមកមើលរថយន្តម៉ូដែល MPVs វិញ គឺមានការលក់ចេញបាន 86,000 គ្រឿង កើនឡើងបាន 7.1% ធៀបនឹងឆ្នាំមុនប៉ុន្តែថយចុះ 3.6% ប្រៀបធៀបនឹងខែមុន។ ជាមួយនិងកំនើននៃការលក់រថយន្តកាលពីខែមេសានេះ រថយន្ត Geely Geome Xingyuan ដែលជាម៉ូដែល hatchback បានក្លាយជារថយន្តដែលលក់ដាច់ខ្លាំងជាងគេបំផុតនៅខែមេសានេះ។

Geely Geome Xingyuan ត្រូវបានគេស្គាល់ថា គឺជារថយន្តអគ្គិសនីជំនាន់ថ្មី ដែលមានតម្លៃធូរថ្លៃ និងលក់ដាច់ជាងគេបំផុតនៅលើទីផ្សារប្រទេសចិន។ ហើយថ្មីៗនេះ រថយន្តនេះ ក៏បានក្លាយជារថយន្តអគ្គិសនី ដែលផលិតចេចញបានដល់ទៅ 200,000th គ្រឿងថែមទៀតផង។

ក្រៅពីនេះ BYD Seagull ក៏ក្លាយជារថយន្តអគ្គិសនីដែលលក់ដាច់ជាងគេនៅលើទីផ្សារចិនផងដែរ។ រថយន្តនេះ គឺបានឈរនៅលើលេខរៀងទី 2 និងមានតាមពីក្រោយដោយម៉ូដែល Hongguang Mini EV ដែលរថយន្តលក់ដាច់ជាងគេនៅលើទីផ្សារនេះផងដែរ។ ចំពោះម៉ូដែល SUV ឈរនៅលើ top 10 នោះ គឺមានដូចជា Geely Xingyue L ឈរនៅលើកំពូលតារាង ខណៈដែល Tesla Model Y គឺឈរនៅលើលេខរៀងបន្ទាប់។ Geely Xingyue L ដែលជារថយន្តរចំហេះក្នុង គឺលក់បាន 79,883 គ្រឿង នៅត្រីមាសទី 1 ឆ្នាំ 2025 កន្លងទៅនេះ។

ចំពោះរថយន្ត MPV ដែលលក់ដាច់ជាងគេនៅលើទីផ្សារចិនកាលពីខែមេសាកន្លងទៅនេះ មានចំនួន 67 ម៉ូដែល។ Denza D9 ត្រូវបានគេចាត់ទុកថា គឺជារថយន្តដែលលក់ដាច់ជាងគេ ដោយអាចនាំចេញបាន 9,045 គ្រឿង។ រថយន្តនេះ គឺមានតាមពីក្រោយដោយ Toyota Sienna និង Voyah Dreamer។