ស្មាតហ្វូន Huawei P10 Lite នឹងបង្ហាញខ្លួនជាផ្លូវការនៅថ្ងៃទី 31 ខែមីនាខាងមុខនេះ

ក្រោយការបែកធ្លាយព័ត៌មានជាច្រើនអំពីស្មាតហ្វូនស៊េរីថ្មី Huawei P10 Lite ពេលនេះ វាមានព័ត៌មានផ្លូវការហើយ។ ស្មាតហ្វូនត្រកូល Huawei P10 នឹងបង្ហាញខ្លួនក្នុងរយៈពេល 2 សប្តាហ៍ទៀត ហើយសមត្ថភាពរបស់វានៅតែខ្លាំងផ្នែកប្រព័ន្ធដំណើរការ កាមេរ៉ា និងថាមពលថ្ម។ ស្មាតហ្វូន Huawei P10 Lite បានបែកធ្លាយព័ត៌មានជាច្រើនតាមរយៈក្រុមហ៊ុនចែកចាយនៅទូទាំងទ្វីបអ៊ឺរ៉ុប ដូចនេះ យើងស្ទើរតែដឹងអំពីអ្វីគ្រប់យ៉ាងដែលស្មាតហ្វូននេះមាន ហើយពេលនេះយើងអាចបញ្ជាក់បានថាព័ត៌មានដែលបែកធ្លាយទាំងនោះ គឺជារឿងពិត។ ស្មាតហ្វូននេះ នឹងមានអេក្រង់ទំហំ 5.2 អ៊ីងកម្រិតភាពច្បាស់ 1080p បន្ទះឈីប Kirin 658 (Octa-core A53 CPU) រ៉េមផ្ទុកទិន្នន័យបណ្តោះអាសន្នទំហំ 3GB ក្រាហ្វិក Mali-T830MP2 GPU និងម៉េមូរីក្នុងម៉ាស៊ីនទំហំ 32GB ។

អ្វីដែលគួរឱ្យចាប់អារម្មណ៍ទៀតនោះ ស្មតហ្វូន Huawei P10 Lite នេះមានកាមេរ៉ាខាងក្រោយទំហំ 12MP (f/2.2 Lens) និងកាមេរ៉ាខាងមុខទំហំ 8MP សម្រាប់ថតរូប Selfie បានយ៉ាងស្រស់ស្អាតបំផុត។ ក្រុមហ៊ុនបច្ចេកវិទ្យាយក្ស Huawei បានពង្រឹងទៅលើមុខងារថ្មីមួយហៅថា Portrait Selfie Mode ទៅក្នុងកម្មវិធីកាមេរ៉ារបស់ស្មាតហ្វូន Huawei P10 Lite ហើយវាពិតជាផ្តល់នូវរូបភាព Selfie មួយដ៏អស្ចារ្យជាមួយនឹងការប្រើប្រាស់ Bokeh Effects ផងដែរ។ ស្មាតហ្វូន Huawei P10 ប្រើប្រាស់នូវថាមពលថ្មទំហំ 3000mAh ជាមួយនឹងបច្ចេកវិទ្យា Fast Charging ហើយវាមានប្រព័ន្ធប្រតិបត្តិការ Android Nougat ដំណើរការជាមួយ EMUI 5.1 រួមទាំងកម្មវិធីពិសេសៗជាច្រើនដូចជា Knuckle Gestures, Quik integration, better performance, Power Saver 5.0 និង memory optimizations ។ 

ស្មាតហ្វូន Huawei P10 Lite នឹងបង្ហាញខ្លួនជាផ្លូវការនៅថ្ងៃទី 31 ខែមីនាខាងមុខនេះ ដែលមាន 2 ពណ៌សម្រាប់ជ្រើសរើសគឺពណ៌ខ្មៅ (Midnight Black) និងពណ៌មាស (Platinum Gold) ។ ការកម្មង់ទិញមុន (Pre-order) ចាប់ផ្តើមពីថ្ងៃនេះ ហើយនៅក្នុងចក្រភពអង់គ្លេសតាមរយៈក្រុមហ៊ុន Carphone Warehouse, EE និង Vodafone នៅក្នុងតម្លៃ299 ផោន។ ការកម្មង់ទិញមុនស្មាតហ្វូន Huawei P10 មានតម្លៃ 549 ផោន ចំនែកស្មាតហ្វូន Huawei P10 Plus មានតម្លៃ 649 ផោន។ ស្មាតហ្វូន Huawei P10 និង P10 Lite នឹងបង្ហាញខ្លួនជាផ្លូវការទូទាំងពិភពលោកនៅថ្ងៃទី 31 ខែមីនាខណៈពេលម៉ូដែល Huawei P10 Plus នឹងដាក់លក់រយៈពេលមួយសប្តាហ៍ក្រោយគឺនៅថ្ងៃទី 7 ខែមេសា៕