អគ្គនាយក Samsung ជួបជាមួយនឹងអគ្គនាយក Microsoft ពិភាក្សាគ្នាអំពីយុទ្ធសាស្រ្តនៃការអភិវឌ្ឍន៍បច្ចេកវិទ្យា AI និង Cloud

កាលពីថ្ងៃទី 7 ខែវិច្ឆិកានេះ លោក Lee Jae-yong ដែលជាអនុប្រធានរបស់ក្រុមហ៊ុនបច្ចេកវិទ្យាយក្ស Samsung Electronics បានជួបជាមួយនឹង CEO របស់ក្រុមហ៊ុន Microsoft លោក Satya Nadella នៅក្នុងទីក្រុងសេអ៊ូលដើម្បីពិភាក្សាអំពីទំនាក់ទំនងនៃសក្តានុពលនៃអាជីវកម្មក្នុងវិស័យបច្ចេកវិទ្យា AI និងការច្របាច់បញ្ចូលគ្នានៃអាជីវកម្មផ្សេងទៀត។ នៅក្នុងនោះ ក្រុមហ៊ុន Samsung ក៏បាននិយាយថា លោក Lee ពិតជាមានកិច្ចប្រជុំមួយជាមួយនឹងលោក Nadella នៅថ្ងៃនោះមែន។ មេដឹកនាំនៃអាជីវកម្មទាំងពីរនេះធ្វើការពិភាក្សាដោយផ្តោតសំខាន់ទៅលើយុទ្ធសាស្រ្តជាច្រើនពាក់ព័ន្ធជាមួយនឹងបច្ចេកវិទ្យា AI រួមជាមួយនឹងវិធីសាស្រ្តនៅក្នុងការបង្កើនទំនាក់ទំនងរវាងក្រុមហ៊ុន Samsung និង Microsoft នេះបើប្រភពខាងក្នុងជាច្រើនបានបញ្ជាក់អោយដឹងនោះ។

ពួកគេពិភាក្សាអំពីកិច្ចសហប្រតិបត្តិការសក្តានុពលនៃការប្រើប្រាស់ទៅលើ Cloud Computing, Data Centers, 5G Networks និងឧស្សាហកម្ម Software ជាច្រើនទៀត។ លោក Nadella ដែលចូលកាន់ដំណែងនៅក្នុងឆ្នាំ 2014 នោះក៏ពិភាក្សាផ្តោតទៅលើបច្ចេកវិទ្យា AI និង Cloud Computing ផងដែរ។ នៅក្នុងខណៈពេលដែលសេវាកម្ម Cloud Computing គឺសម្រាប់ SSD កម្រិតខ្ពស់នោះ អ្នកឃ្លាំមើលឧស្សាហកម្មជាច្រើន បាននិយាយថា ក្រុមហ៊ុន Samsung Electronics ទំនងជាចង់ពង្រីកនូវការនាំចេញរបស់ខ្លួនទៅលើផលិតផលជាច្រើនទៅកាន់ Cloud Servers របស់សហរដ្ឋអាមេរិក។

មានការសន្មត់ទៀតផងដែរថា ឧបករណ៍ឆ្លាតវៃជាច្រើននាពេលអនាគតរបស់ក្រុមហ៊ុន Samsung នឹងប្រើប្រាស់នូវ Cloud Services របស់ក្រុមហ៊ុន Microsoft ។ លោក Lee ធ្លាប់ជួបលោក Nadella ជាច្រើនលើកមកហើយតាំងពីឆ្នាំ 2014 មកម្ល៉េះ។ នេះគឺជាលើកដំបូងសម្រាប់លោក Lee នៅក្នុងការចូលរួមនៅក្នុងកិច្ចប្រជុំជាមួយនឹងមេដឹកនាំអាជីវកម្មពិភពលោកជាច្រើន នៅក្នុងប្រទេសកូរ៉េ ចាប់តាំងពីគាត់ត្រូវដោះលែងចេញពីពន្ធនាគារនៅក្នុងខែកុម្ភៈនោះ៕