ក្រុមហ៊ុន Motorola បាននឹងកំពុងធ្វើការលើចង្វាក់ផលិតស្មាតហ្វូនម៉ាក Razr ជំនាន់ថ្មីមួយដើម្បីគាស់រំលើងនៃស្លាកយីហោ Razr ពីមុនរបស់ខ្លួនជាមួយនឹងការរក្សាទម្រង់រូបរាងដើមរបស់វា ក៏ប៉ុន្តែ Razr ជំនាន់ថ្មីនេះគឺនឹងប្រើប្រាស់អេក្រង់ដែលអាចបត់ចូលបានដើម្បីធ្វើការផ្លាស់ប្តូរអោយទាន់នូវនិន្នាការថ្មីក្នុងពិភពទូរស័ព្ទចល័តនាឆ្នាំ 2019 នេះ។ យោងតាមរបាយការណ៍ថ្មីមួយបានឱ្យដឹងថា Motorola Razr 2019 នឹងប្រើបន្ទះឈីប Snapdragon 710 ជាមួយរ៉េម RAM ទំហំ 4GB ឬ 6GB និងមានអង្គផ្ទុកក្នុងម៉ាស៊ីនទំហំ 64GB&128GB ។
ចំពោះអេក្រង់វិញត្រូវបានប្រភពទម្លាយថាវានឹងមានអេក្រង់ទំហំ 6.2 អ៊ីងជាមួយកម្រិតបង្ហាញ 876x2142px នៅពេលពេលពន្លាអេក្រង់ ហើយក៏មានអេក្រង់ទីពីរដែលនឹងទ្រទ្រង់កម្រិតបង្ហាញ 600x800px ថែមទៀតផង។ ជាមួយគ្នានេះដែរ Motorola Razr 2019 នឹងមានលេខកូដសំគាល់ Voyager។ សម្រាប់ថ្មវិញគឺនឹងប្រើថ្មកំលាំង 2,730 mAh ជាមួយនឹងបច្ចេកវិទ្យាសាកចូលល្បឿនលឿន។ បើតាមប្រភពរូបភាពគំរូព្រៀងនៃ Motorola Razr 2019 ដែលបានបង្ហាញចេញនាពេលកន្លងមកបានបង្ហាញយ៉ាងច្បាស់ថាស្មាតហ្វូននេះគឺមានទ្រនាប់ស្កែនក្រយ៉ៅម្រាមដៃដោះសោរនៅផ្នែកខាងក្រោយជាមួយកាមេរ៉ាមួយគ្រាប់ផងដែរ។ សម្រាប់ពណ៌វិញគឺនឹងមានបីពណ៌ដូចជាពណ៌ខ្មៅ ពណ៌ស និងពណ៌ទឹកមាស។
បើយោងតាមប្រភពមួយចំនួនបានធ្វើការព្យាករណ៍ថា Motora Razr 2019 នឹងមានតម្លៃខ្ទង់ប្រហែល $1,500 ដែលធូរថ្លៃជាងស្មាតហ្វូនអេក្រង់បត់ Samsung Galaxy Fold និង Huawei Mate X។ យ៉ាងណាមិញមកទល់នឹងពេលនេះយើងមិនទាន់ដឹងពីកាលបរិច្ឆេទច្បាស់ផ្លូវការណ៍ណាមួយដែលក្រុមហ៊ុន Motorola ធ្វើការប្រកាសបង្ហាញចេញស្មាតហ្វូនអេក្រង់បត់ដំបូងរបស់ខ្លួនមួយនេះនៅឡើយទេ ប៉ុន្តែគេគ្រាន់តែដឹងថាស្មាតហ្វូននេះនឹងត្រូវចេញលក់ដំបូងដោយក្រុមហ៊ុនចែកចាយរបស់អាមេរិកគឺ Verizon៕
