ថ្មីៗនេះ ក្រុមហ៊ុន Huawei បានបង្ហាញនូវស្មាតហ្វូនស៊េរីថ្មី Nova 3E នៅក្នុងព្រឹត្តិការណ៍មួយនៅក្នុងប្រទេសចិន។ នេះគឺជាស្មាតហ្វូនទី 2 ហើយដែលបានបង្ហាញខ្លួនក្នុងសប្តាហ៍នេះ។ ដូចគ្នាទៅនឹងស្មាតហ្វូនជាច្រើនទៀត ដែលមានវត្តមាននៅលើទីផ្សារនោះ ស្មាតហ្វូន Huawei Nova 3E ក៏មានការប្រើប្រាស់នូវ Notch នៅលើអេក្រង់ ដែលស្រដៀងគ្នាទៅនឹង Notch ដែលមានប្រើប្រាស់នៅលើ iPhone X របស់ក្រុមហ៊ុន Apple អញ្ចឹងដែរ។
ស្មាតហ្វូនស៊េរីថ្មីនេះ មានការរចនារូបរាងទៅតាមនិន្នាការថ្មីនៅក្នុងពេលបច្ចុប្បន្ននេះ។ ស្មាតហ្វូននេះ មានវិមាត្រ 148.6 x 71.2 x 7.4mm និងទម្ងន់ 145 ក្រាម ។ ផ្នែកខាងក្រោយរបស់ស្មាតហ្វូននេះ ប្រើប្រាស់កញ្ចក់ 2.5D ហើយនិហមានពណ៌ជាច្រើនដូចជា Klein Blue, Cherry Powder, Magic Night Black និង Platinum Gold ជាដើម។ បើនិយាយអំពីលក្ខណៈសម្បត្តិរបស់ស្មាតហ្វូន Huawei Nova 3E នេះវិញគឺប្រើប្រាស់ជាមួយនឹងបន្ទះឈីប Kirin 659 រ៉េមទំហំ 4GB និងម៉េមូរីក្នុងម៉ាស៊ីនទំហំ 64GB/128GB ផងដែរ។ នៅផ្នែកខាងមុខរបស់ស្មាតហ្វូននេះ គឺប្រើប្រាស់អេក្រង់ទំហំ 5.8 អ៊ីង កម្រិតភាពច្បាស់ 2280×1080 ភិចសែល។
អ្វីដែលកាន់តែអស្ចារ្យជាងនេះទៀតនោះ ស្មាតហ្វូននេះ ប្រើប្រាស់នូវកាមេរ៉ា Selfies ទំហំ 24MP Sony IMX578 sensor។ ស្មាតហ្វូននេះ បានបន្ថែមនូវកម្រិតផាពច្បាស់ដល់ទៅ 20% ការកាត់បន្ថយសំឡេងរំខានដល់ទៅ 33% រួមជាមួយនិងការបង្កើនទៅលើការផលិតពណ៌ដល់ទៅ 26% ថែមទៀតផង។ កាមេរ៉ាខាងក្រោយរបស់ស្មាតហ្វូននេះ ជាប្រភេទកាមេរ៉ាភ្លោះដែលមានទំហំ 16MP+2MP ហើយទ្រទ្រង់នូវមុខងារ Bokeh។ ស្មាតហ្វូនស៊េរីថ្មីNova 3E ប្រើប្រាស់នូវប្រព័ន្ធប្រតិបត្តិការ Android 8 ជាមួយនឹង EMUI 8 ។ ស្មាតហ្វូននេះ ក៏មានទ្រទ្រង់នូវមុខងារ Face Unlock ការជូនដំណឹងនៅលើអេក្រង់កាន់តែឆ្លាតវៃ ការប្រើប្រាស់ Game Mode និងការប្រើប្រាស់នូវ Voice Assistant កាន់តែឆ្លាតវៃផងដែរ។ ស្មាតហ្វូននេះប្រើប្រាស់ថាមពលថ្មទំហំ 3000mAh ដែលទ្រទ្រង់នូវបច្ចេកវិទ្យា 18W (9V 2A) fast charging អាចសាកបញ្ចូលថ្ម បានកាន់តែលឿន។
ស្មាតហ្វូន Nova 3E លក់នៅក្នុងតម្លៃ 1999 Yuan (~$315) សម្រាប់ 4GB +64GB និងតម្លៃ 2199 Yuan (~$348) សម្រាប់ម៉ូដែល 4GB + 128GB ។ សម្រាប់ការកម្មង់ទិញមុនចាប់ពីថ្ងៃនេះ ហើយនិងមានការដាក់លក់លើកដំបូង នៅថ្ងៃទី 27 ខែមីនាខាងមុខនេះ៕
