ខណៈពេលដែល Samsung Galaxy Fold នៅមិនទាន់ក្លាយជាស្មាតហ្វូនដែលទទួលបាននូវភាពជោគជ័យខ្លាំងនៅឡើយទេនោះរហូតមកដល់ពេលនេះ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ ហាក់ដូចជាប្រឹងប្រែងយ៉ាងខ្លាំងនៅលើនិន្នាការថ្មីសម្រាប់ស្មាតហ្វូនដែលអាចបត់បាននេះ ជាមួយនឹងអ្វីដែលយើងដឹងថាជាស្មាតហ្វូនដែលអាចបត់បានជំនាន់ទី 2 នោះ។ ប៉ាតង់ចុងក្រោយបំផុតបញ្ជាក់ថា ស្មាតហ្វូន SAMSUNG GALAXY FOLD 2 នឹងទ្រទ្រង់នូវ S Pen។
យោងតាមព័ត៌មានចុងក្រោយបញ្ជាក់ថា ក្រុមហ៊ុន Samsung ប្រហែលជាកំពុងតែធ្វើការនៅលើស្មាតហ្វូនដែលអាចបត់បានជំនាន់ទី 2 ដែលមានឈ្មោះហៅថា Galaxy Fold 2 ឬ យ៉ាងហោចណាស់នៅក្នុងប៉ាតង់ថ្មី កាលពីថ្ងៃទី 26 ខែសីហា ឆ្នាំ 2019 នេះទៅកាន់ ការិយាល័យកម្មសិទ្ធិបញ្ញាសហភាពអឺរ៉ុប EUIPO និង ការិយាល័យកម្មសិទ្ធិបញ្ញាពិភពលោក WIPO ផងដែរ។
នៅក្នុងប៉ាតង់ថ្មីនេះ យើងអាចមើលឃើញថា ស្មាតហ្វូន Galaxy Fold 2 នេះទ្រទ្រង់ទៅលើ S Pen របស់ក្រុមហ៊ុន Samsung ដែលវាអាចដំណើរការបានទាំងនៅពេលដែលបត់ និងនៅពេលដែលបើកហើយវាពិតជាផ្តល់នូវភាពងាយស្រួលមែនទែនក្នុងការប្រើប្រាស់នោះ។
បន្ថែមពីនេះទៀតនោះ នៅក្នុងប៉ាតង់នេះដែលបានដាក់ស្នើដោយក្រុមហ៊ុនបច្ចេកវិទ្យា Samsung នៅក្នុងការិយាល័យប៉ាតង់ និងស្លាកពាណិជ្ជកម្ម Trademark របស់សហរដ្ឋអាមេរិកនោះ ស្មាតហ្វូន Galaxy Fold 2 នេះអាចធ្វើការប្រើប្រាស់ជាមួយនឹងប៊ិច S Pen បានទាំងពេលបើក និងពេលបត់។ របាយការណ៍ជាច្រើនកាលពីពេលមុននេះបញ្ជាក់ថាស្មាតហ្វូន Galaxy Fold 2 នេះប្រហែលជាមានអេក្រង់ទំហំ 8-inch ហើយវាមានរន្ធដោត S Pen ដូចគ្នាទៅនឹង Galaxy Note Series ផងដែរ។
យើងអាចនឹងឃើញវត្តមានរបស់ស្មាតហ្វូន Galaxy Fold 2 នេះ នៅក្នុងព្រឹត្តិការណ៍ MWC2020 ដែលនឹងធ្វើឡើងនៅថ្ងៃទី 24 ខែកុម្ភៈខាងមុខនេះជាមួយនឹងវត្តមានរបស់ស្មាតហ្វូន Samsung Galaxy S11 ដែលនឹងបង្ហាញខ្លួនប៉ុន្មានថ្ងៃមុននេះ។
បន្ថែមពីនេះទៀតនោះ វាមានការរាយការណ៍ថា ក្រុមហ៊ុន Samsung កំពុងតែធ្វើការបញ្ចូលគ្នានៃស្មាតហ្វូន Galaxy S និងGalaxy Note Series នេះ។ ខណៈពេលដែលស្មាតហ្វូន Galaxy Fold Series អាចជំនួសកន្លែងរបស់ស្មាតហ្វូន Galaxy Note Series នោះ វាពិតជាត្រូវការភាពចាស់ទុំជាមុនសិនមុនពេលដែលរឿងនេះអាចកើតឡើងនោះ៕