Google Pixel 4 និង Pixel 4 XL នឹងបង្ហាញខ្លួនជាផ្លូវការនៅក្នុងរយៈពេលមិនដល់មួយសប្តាហ៍ទៀតនោះទេ ប៉ុន្តែរបាយការណ៍មួយរាយការណ៍ដោយ Nikkei Asian Review បានបញ្ជាក់ថា ស្មាតហ្វូន Flagship 2019 ទាំងពីរនេះ អាចនឹងបង្ហាញខ្លួនជាមួយនឹងម៉ូឌែលទី 3 មួយទៀតផងដែរ។ តាមការបញ្ជាក់របស់ប្រភពជាច្រើនទៅលើបញ្ហានេះ ក្រុមហ៊ុន Google ថ្មីៗនេះគឺស្ថិតនៅក្នុងដំណើរការអភិវឌ្ឍទៅលើស្មាតហ្វូនទី 3 នៃត្រកូល Pixel 4 ដែលទ្រទ្រង់នូវបច្ចេកវិទ្យា “5G technology” ។ ដូចគ្នាទៅនឹងស្មាតហ្វូន Pixel 4 ដែរ ស្មាតហ្វូននេះ នឹងប្រើប្រាស់នូវបន្ទះឈីប Snapdragon 855 របស់ក្រុមហ៊ុន Qualcomm ប៉ុន្តែវាមិនមានការបញ្ជាក់អំពីរ៉េម និងម៉េមូរីរបស់វានៅឡើយទេ។
ស្មាតហ្វូនស៊េរីថ្មីរបស់ក្រុមហ៊ុន Google នេះត្រូវគេរាយការណ៍ថាស្ថិតនៅក្នុងដំណាក់កាលនៃការធ្វើតេស្តនៅក្នុងប្រទេសចិននៅក្នុងខណៈពេលនេះ។ ប្រសិនបើក្រុមហ៊ុនបច្ចេកវិទ្យានេះ បន្តទៅលើគម្រោងនេះ ការបង្ហាញខ្លួនរបស់វាប្រហែលជាមិនមែនប៉ុន្មានខែទៀតនោះទេ។ មានការបញ្ជាក់ថា ស្មាតហ្វូននេះអាចនឹងបង្ហាញខ្លួនជាមួយនឹងស្មាតហ្វូន 4G Pixel 4 series និង Pixelbook Go Chromebook នៅថ្ងៃអង្គារ៍ទី ១៥ ខែតុលាខាងមុខនេះ។ វាក៏អាចមានវត្តមានរបស់នាឡិកា Google Pixel Smartwatch ដែលនឹងបង្ហាញខ្លួននៅសប្តាហ៍ក្រោយនេះផងដែរ។
ដើម្បីជៀសផុតពីពន្ធរបស់សហរដ្ឋអាមេរិកទៅលើផលិតផលជាច្រើនមកពីប្រទេសចិននោះ សម្រាប់ម៉ូឌែល Pixel 4 5G ទាំងអស់ដែលមានគោលដៅសម្រាប់ទីផ្សារនៅក្នុងសហរដ្ឋអាមេរិកនោះ នឹងធ្វើការផលិតនៅក្រៅទីផ្សាររបស់ចិនប្រហែលជានៅក្នុងប្រទេសវៀតណាមដែលស្មាតហ្វូន Pixel 4 និង Pixel 4 XL នឹងធ្វើការផលិតនៅទីនោះ។ ស្មាតហ្វូនទាំងនេះ គឺធ្វើការផលិតទ្រង់ទ្រាយធំរួចហើយ ហើយវាអាចនឹងដាក់លក់សម្រាប់ទីផ្សាររបស់ពិភពលោកនៅក្នុងចុងខែនេះ។ កាលបរិច្ឆេទនៅមិនទាន់ទម្លាយនៅឡើយទេ ប៉ុន្តែពាក្យចចាមអារ៉ាមជាច្រើនបញ្ជាក់ថា ស្មាតហ្វូននេះអាចនឹងចាប់ផ្តើមធ្វើការដឹកជញ្ជូននៅថ្ងៃសុក្រទី ២៥ ខែតុលាខាងមុខនេះ។
ប្រសិនបើក្រុមហ៊ុន Google សម្រេចចិត្តថាស្មាតហ្វូន 5G Pixel 4 នឹងមិនទាន់បង្ហាញខ្លួននៅសប្តាហ៍ក្រោយនេះទេ ប្រភពជាច្រើននិយាយថា ក្រុមហ៊ុនបច្ចេកវិទ្យាយក្សរបស់អាមេរិកនេះ អាចនឹងធ្វើការពន្យារពេលដល់ឆ្នាំក្រោយនេះ។ នេះមានន័យថា នៅក្នុងព្រឹត្តិការណ៍ Google I/O 2020 ខាងមុខនេះ ក្រុមហ៊ុន អាចនឹងបញ្ចេញនូវ Pixel 4a និង Pixel 4a XL ផងដែរ។ ស្មាតហ្វូន 5G Pixel 4 អាចនឹងបង្ហាញខ្លួននៅចុងឆ្នាំ 2019 ឬដើមឆ្នាំ 2020 ដែលនឹងអនុញ្ញាតអោយក្រុមហ៊ុនបច្ចេកវិទ្យា Google អាចធ្វើការប្រកួតប្រជែងជាមួយនឹងក្រុមហ៊ុនបច្ចេកវិទ្យា Apple នៅលើទីផ្សារតាមរយៈស្មាតហ្វូន 5G នេះ៕
