ស្មាតហ្វូន Samsung Galaxy A50 គឺជាស្មាតហ្វូនថ្នាក់កណ្តាលប្រណិតស៊េរីថ្មីរបស់ Samsung ហើយពេលនេះ ក៏មានម៉ូឌែលពិសេសដែលមានការ upgrade ទៅលើលក្ខណៈសម្បត្តិជាច្រើនផងដែរនោះគឺ Galaxy A50s ហើយស្មាតហ្វូនជំនាន់ថ្មីរបស់វាដែលគ្រោងនឹងបង្ហាញខ្លួននៅឆ្នាំក្រោយនោះ គឺមានឈ្មោះហៅថា Samsung Galaxy A51 នេះបើតាមការបញ្ជាក់របស់ក្រុមហ៊ុន Canalys។
យើងបានដឹងរួចមកហើយអំពីការបែកធ្លាយជាច្រើនរបស់ស្មាតហ្វូនស៊េរីថ្មី Galaxy A51 នេះដែលបង្ហាញនៅលើ Geekbench ហើយពេលនេះយើងក៏ទទួលបាននូវព័ត៌មានអំពីលក្ខណៈសម្បត្តិជាច្រើនទៀតរបស់ស្មាតហ្វូននេះដែលគ្រោងនឹងបង្ហាញខ្លួននៅឆ្នាំ 2020 ខាងមុខនេះ។ យោងតាមព័ត៌មានថ្មីបំផុតបញ្ជាក់ថា Samsung Galaxy A51 នេះ នឹងមានអេក្រង់ទំហំ 6.5 អ៊ីង Super AMOLED ដែលប្រហែលជា FullHD+។ អេក្រង់នេះ ប្រហែលជាមិនមានអ្វីដែលកែប្រែខ្លាំងនោះទេ ដោយសារតែស្មាតហ្វូន Galaxy A50 និង A50s គឺមានអេក្រង់ទំហំ 6.4 inches រួចហើយ។
តាមការបញ្ជាក់របស់ប្រភពនេះ បានអោយដឹងថា ស្មាតហ្វូននេះ នឹងមានកាមេរ៉ាខាងមុខដែលមានទំហំ 32MP ដូចគ្នាទៅនឹងស្មាតហ្វូន Samsung Galaxy A50 ផងដែរ។ សម្រាប់កាមេរ៉ាខាងក្រោយវិញនោះ កាមេរ៉ាគោលរបស់វានឹងមានទំហំ 48MP ដូចគ្នាទៅនឹងស្មាតហ្វូន A50s។ ស្មាតហ្វូននេះ នឹងមានកាមេរ៉ាដែលមានរូបរាងជាទម្រង់អក្សរ L។ វាប្រហែលជាមានកាមេរ៉ាទំហំ 12MP wide-angle, 12MP telephoto sensor និង 5 MP depth sensor ផងដែរ។ ស្មាតហ្វូននេះនឹងមានកាមេរ៉ា 4 គ្រាប់នៅខាងក្រោយ។
សម្រាប់រន្ធដោតកាសស្តាប់ Headphone jack នៅតែរក្សាទុកដដែល ហើយវាមានរន្ធដោតបញ្ចូលថាមពលថ្ម USB-C connector។ តាមការបញ្ជាក់របស់់ Geekbench ស្មាតហ្វូននេះ អាចនឹងប្រើប្រាស់នូវបន្ទះឈីប Exynos 9611 រ៉េមទំហំ 4GB និងប្រព័ន្ធប្រតិបត្តិការ Android 10។ ថាមពលថ្មរបស់ស្មាតហ្វូននេះ ប្រហែលជាមានទំហំ 4,000 mAh ។ ស្មាតហ្វូននេះត្រូវគេរំពឹងថានឹងបង្ហាញខ្លួននៅក្នុងត្រីមាសទី 1 ឆ្នាំ 2020 ខាងមុខនេះ៕
