នៅថ្ងៃនេះ ក្រុមហ៊ុន vivo និង Samsung បានរួមគ្នារៀបចំនូវសន្និសិទអំពីបន្ទះឈីប dual-mode 5G AI នៅក្នុងទីក្រុងប៉េកាំងប្រទេសចិន។ នៅក្នុងព្រឹត្តិការណ៍នេះ ព័ត៌មានលម្អិតរបស់បន្ទះឈីប Exynos 980 5G នេះក៏ត្រូវបានចែករំលែកផងដែរ។ ក្រុមហ៊ុនបច្ចេកវិទ្យារបស់ចិននេះក៏មានការបញ្ជាក់ថា ស្មាតហ្វូន vivo X30 series នេះគឺប្រើប្រាស់នូវបន្ទះឈីប Exynos 980 5G SoC ដែលគ្រោងនឹងប្រកាសបង្ហាញខ្លួននៅក្នុងខែធ្នូខាងមុខនេះ។
Exynos 980 គឺជាបន្ទះឈីបដំបូងបំផុតដែលមានការផលិតទ្រង់ទ្រាយសម្រាប់ស្ថាបត្យកម្ម Cortex-A77 នេះ។ ស្មាតហ្វូនត្រកូល vivo X30 series នេះផ្តល់នូវបទពិសោធន៍នៃការលេងហ្គេមកាន់តែអស្ចារ្យជាមួយនឹងក្រាហ្វិកកាតកម្រិតខ្ពស់ Mali-G76 M5 high-end GPU និងបច្ចេកវិទ្យា Multi-Turbo technology របស់ក្រុមហ៊ុន vivo។ បន្ទះឈីបនេះ គឺមានការបញ្ចូលគ្នាជាមួយនឹង NPUs និង DSPs ដែលនឹងដំណើរការនូវកម្លាំងខ្លាំងជាង 5 TOPS (Tera Operations Per Second) ថែមទៀត។
អ្វីដែលសំខាន់ជាងនេះទៀតនោះ បន្ទះឈីប Exynos 980 នេះគឺមានការបញ្ចូលគ្នានូវម៉ូដឹម 5G ដែលទ្រទ្រង់ទៅលើការតភ្ជាប់ dual-mode 5G (SA/NSA) ថែមទៀត។ បន្ទះឈីបនេះអាចមានល្បឿននៃការដោនឡូតដល់ទៅ 2.55Gbps ។ ជាមួយនឹងការតភ្ជាប់នូវ 4G-5G dual connectivity នេះ បន្ទះឈីប Exynos 980 នេះ គឺមានល្បឿននៃការដោនឡូតខ្ពស់ដល់ទៅ 3.55Gbps។ វាក៏ទ្រទ្រង់នូវ Wi-Fi 6 ផងដែរ។ ស្មាតហ្វូននេះ មានភ្ជាប់ជាមួយនឹងបន្ទះឈីបថ្មីដែលទ្រទ្រង់ទៅលើកាមេរ៉ា 5 គ្រាប់ដែលមានកាមេរ៉ា Lens ទំហំ 108-megapixel ។
នាយកប្រតិបត្តិជាន់ខ្ពស់របស់ក្រុមហ៊ុន vivo ទៅលើបច្ចេកវិទ្យាបន្ទះឈីបនេះលោក Li Haorong និយាយថា ក្រុមហ៊ុននៅមិនទាន់អាចប្រើប្រាស់នូវសមត្ថភាពពេញលេញរបស់បន្ទះឈីប Exynos 980 នេះបាននៅឡើយទេ ប៉ុន្តែសម្រាប់មុខងារថ្មីៗជាច្រើននឹងមានការបញ្ចូលទៅក្នុងបន្ទះឈីបនេះដើម្បីបំពេញនូវតម្រូវការរបស់អ្នកប្រើប្រាស់។ បើទោះបីជាក្រុមហ៊ុនរបស់ចិននេះបញ្ជាក់អំពីការប្រកាសបង្ហាញវត្តមានរបស់ស្មាតហ្វូន vivo X30 series នៅក្នុងខែធ្នូខាងមុខនេះក្តី ប៉ុន្តែលក្ខណៈសម្បត្តិរបស់ស្មាតហ្វូននេះនៅមិនទាន់ប្រកាសអោយដឹងនៅឡើយទេ។ ស្មាតហ្វូន vivo X30 series នេះអាចនឹងមានស្មាតហ្វូន Vivo X30 និង Vivo X30 Pro ។
លក្ខណៈសម្បត្តិរបស់ស្មាតហ្វូន vivo X30 និង X30 Pro
លក្ខណៈសម្បត្តិរបស់ស្មាតហ្វូន vivo X30 និង X30 Pro កាលពីម្សិលមិញនេះក៏មានការបែកធ្លាយនៅលើ Weibo ផងដែរ។ ស្មាតហ្វូន vivo X30 ប្រហែលជាមានអេក្រង់ទំហំ 6.5-inch ខណៈពេលដែលស្មាតហ្វូន X30 Pro មានអេក្រង់ទំហំ 6.89-inch ។ ស្មាតហ្វូន X30 និង X30 Pro ត្រូវគេរំពឹងថានឹងមានអេក្រង់ AMOLED ដែលមានកម្រិត 90Hz refresh rate។ ស្មាតហ្វូន X30 ប្រហែលជាមានរ៉េមទំហំ 8 GB LPDDR4x RAM និងមានម៉េមូរី 128 GB និង 256 GB UFS 2.1 ។ ស្មាតហ្វូននេះប្រហែលជាមានកាមេរ៉ាទំហំ 64-megapixel + 8-megapixel + 13-megapixel + 2-megapixel និងកាមេរ៉ាខាងមុខទំហំ 32-megapixel ។
ស្មាតហ្វូននេះ មានថាមពលថ្មទំហំ 4,500mAh ជាមួយនឹងការទ្រទ្រង់នូវបច្ចេកវិទ្យា 22.5W ឬ 30W ។ ស្មាតហ្វូនដែលមានទំហំ 128 GB គឺមានតម្លៃ 3,198 យន់ (~$456) ខណៈពេលដែលទំហំ 256 GB គឺមានតម្លៃ 3,598 យន់ (~$513) ។ សម្រាប់ស្មាតហ្វូន vivo X30 Pro អាចនឹងមានរ៉េមទំហំ vivo X30 Pro និងម៉េមូរី 256 GB UFS 3.0 ។ ស្មាតហ្វូននេះមានកាមេរ៉ា 4 គ្រាប់ទំហំ 60-megapixel + 13-megapixel + 13-megapixel + 2-megapixel និងកាមេរ៉ាខាងមុខទំហំ 32-megapixel ។ ស្មាតហ្វូននេះមានថាមពលថ្មទំហំ 4,500mAh និងទ្រទ្រង់នូវបច្ចេកវិទ្យា 40W ។ ស្មាតហ្វូននេះមានទំហំ 8 GB RAM + 128 GB storage, 8 GB RAM + 256 GB storage និង 12 GB RAM + 256 GB ដែលមានតម្លៃ 3,998 យន់ (~$570), 4,498 យន់ (~$641) និង 4,998 យន់ (~$713) ៕
