ក្រុមហ៊ុនផលិតទូរទស្សន៍ចិន Hisense និងក្រុមហ៊ុនបច្ចេកវិទ្យាយក្សកូរ៉េ LG Electronics គ្រោងនឹងដោះស្រាយគ្នានៅក្នុងតុលាការឆាប់នេះ។ ក្រុមហ៊ុនទាំងពីរ គឺជាម៉ាកយីហោផលិតផលគ្រឿងអេឡិចត្រូនិចដ៏ល្បី ហើយក្រុមហ៊ុន Hisense ក៏ជាម៉ាកយីហោគ្រឿងផលិតផលអេឡិចត្រូនិចដ៏ល្បីផងដែរ ជាពិសេសគឺទៅលើទូរទស្សន៍។ ក្រុមហ៊ុន Hisense គឺជាម៉ាកយីហោដែលមានភាពល្បីខ្លាំងក្លានៅក្នុងសហរដ្ឋអាមេរិក។ ក្រុមហ៊ុន LG ពេលនេះ បានធ្វើការប្តឹងក្រុមហ៊ុន Hisense ពីបទរំលោភទៅលើប៉ាតង់ចំនួន 4 របស់ខ្លួន។
នៅក្នុងបណ្តឹងដែលធ្វើការប្តឹងទៅកាន់តុលាការរបស់អាមេរិកនេះ ក្រុមហ៊ុន LG បានអះអាងថា ទូរទស្សន៍ជាច្រើនម៉ូឌែលរបស់ក្រុមហ៊ុន Hisense ដែលដាក់លក់នៅក្នុងសហរដ្ឋអាមេរិក បានរំលោភទៅលើប៉ាតង់បច្ចេកវិទ្យាចំនួន 4របស់ក្រុមហ៊ុន LG ។ នៅក្នុងបណ្តឹងដែលបានប្តឹងទៅកាន់តុលាការក្នុងតំបន់នៃរដ្ឋកាលីហ្វ័រញ៉ែរនេះ ក្រុមហ៊ុន LG ទាមទារអោយក្រុមហ៊ុន Hisense ឈប់ប្រើប្រាស់នូវប៉ាតង់បច្ចេកវិទ្យាជាច្រើនរបស់ខ្លួន និងទាមទារអោយក្រុមហ៊ុននេះសងថ្លៃការខូចខាតផងដែរ។ នៅក្នុងការរំលោភប៉ាតង់នេះ គឺមានដូចជាការពង្រឹងទៅលើ UI និងការបង្កើនល្បឿននៃការបញ្ចូនទិន្នន័យផ្អែកទៅលើ Wi-Fi ថែមទៀត។
ក្រុមហ៊ុន Hisense កំពុងតែធ្វើការពង្រីកទៅលើប្រតិបត្តិការជាច្រើនរបស់ខ្លួននៅក្នុងសហរដ្ឋអាមេរិកនៅក្នុងរយៈពេលថ្មីៗនេះ។ ក្រៅពីការផ្ទុះពេញនិយមខ្លាំងនៅក្នុងទីផ្សាររបស់អាមេរិកនោះ ក្រុមហ៊ុន Hisense នេះ ក៏ធ្វើការពង្រីកខ្លួនទៅកាន់ទីផ្សារជាច្រើនទៀតរបស់ពិភពលោកផងដែរ។ ម៉ាកយីហោនេះ គឺស្ថិតនៅក្នុងចំណាត់ថ្នាក់លេខ 4 របស់ពិភពលោកសម្រាប់ប្រភេទក្រុមទូរទស្សន៍នៅក្នុងឆមាសទី 1 ឆ្នាំនេះ។ ក្រុមហ៊ុននេះ គឺមានការពង្រីកទៅលើប្រតិបត្តិការរបស់ខ្លួនយ៉ាងឆាប់រហ័សបំផុតនៅក្នុងសហរដ្ឋអាមេរិក។
អ្វីដែលគួរអោយចាប់អារម្មណ៍នោះ ហាងលក់ជាច្រើនរបស់ក្រុមហ៊ុន LG និង Hisense គឺមានទីតាំងក្បែរៗគ្នានៅក្នុងទីក្រុងជាច្រើន។ ក្រុមហ៊ុន LG ក៏បានប្តឹងទៅកាន់ក្រុមហ៊ុនផលិតគ្រឿងអេឡិចត្រូនិចរបស់អ៊ឺរ៉ុបចំនួន 3 ទៀតទៅកាន់តុលាការនៅក្នុងទីក្រុង Munich កាលពីខែកញ្ញាកន្លងទៅនេះ ដោយសារតែពួកគេរំលោភទៅលើប៉ាតង់នៃការផលិតទឹកកកសម្រាប់ទូរទឹកកក side-by-side refrigerators នោះ។ តាមការបញ្ជាក់របស់លោក Jeon Saeng-gyu អនុប្រធានរបស់ក្រុមហ៊ុន LG Electronics និយាយថា ក្រុមហ៊ុននេះ នឹងធ្វើការប្រឆាំងទៅលើការរំលោភប៉ាតង់ជាច្រើនដើម្បីការពារទៅលើកម្មសិទ្ធិបញ្ញា៕