ក្រុមហ៊ុនផលិតកុំព្យូទ័រយួរដៃដែលមានកេរ្តិ៍ឈ្មោះល្បីល្បាញរបស់កោះតៃវ៉ាន់ MSI បានដាក់បង្ហាញចេញនូវម៉ាស៊ីនកុំព្យូទ័រយួរដៃដែលជា Gaming Laptop ស៊េរីថ្មីចុងក្រោយរបស់ខ្លួនក្នុងស្រឡាយ GS-Series នៅក្នុងព្រឹតិ្តការណ៍ CES 2020 នៅក្នុងសប្តាហ៍នេះ។ កុំព្យូទ័រយួរដៃស៊េរីថ្មី MSI GS66 Stealth គឺមានចនាបថបែបសាមញ្ញដូចជំនាន់មុនរបស់វាដដែល ប៉ុន្តែលើកនេះតួរខ្លួនរបស់វាបានប្តូរមកស្រោបដោយសារធាតុអាលុយមីញ៉ូមពណ៌ខ្មៅក្រិបតែម្តងហៅថា “Core Black aluminum” និងបំពាក់មកជាមួយនូវផ្នែករឹងខ្លាំងចុងក្រោយបំផុត។
ជាមួយគ្នានេះដែរ MSI ក៏មានការដាក់បង្ហាញនូវម៉ាស៊ីនព្យូទ័រម៉ូដែលថ្មីមួយទៀតគឺ GE66 Raider ដែលជាម៉ាស៊ីនមានការរចនាឡើងថ្មីស្រស់ស្អាតជាមួយនឹងការបំពាក់នូវភ្លើងប្រភេទ panoramic aurora light ជាមួយនឹងគ្រឿងបន្លាស់ខាងក្នុងថ្មីចុងក្រោយផងដែរ។ ចំពោះផ្នែករឹងដែលទាញការចាប់អារម្មណ៍ខ្លាំងបំផុតនៅលើម៉ាស៊ីនកុំព្យូទ័រស៊េរីថ្មីទាំងពីរនេះគឺការប្រើនូវបន្ទះអេក្រង់ដែលមានកម្រិត refresh rate ខ្ពស់កប់ដល់ទៅ 300Hz ដែលធ្វើអោយរាល់សកម្មភាពបង្ហាញចេញនៅលើអេក្រង់កុំព្យូទ័រស៊េរីថ្មីនេះមានភាពច្បាស់ម៉ដ្ឋរស់រវ៉ើក និងមានដំណើរការកម្មវិធីបាន Smooth បំផុត។
ក្រុមហ៊ុន MSI បានមើលឃើញថាបច្ចុប្បន្នអ្នកដែលនិយមការលេងហ្គេមស្មាតហ្វូន (Mobile Gamers) ពួកគេច្បាស់ណាសពិតជាចង់បាននៅម៉ាស៊ីនកុំព្យូទ័រដែលមានកម្រាស់ស្តើង និងទំងន់ស្រាលដើម្បីងាយស្រួលក្នុងការប្រើប្រាស់ ប៉ុន្តែពួកគេនៅតែមិនទាន់អាចលះបង់ចោលបាននូវការប្រើប្រាស់លេងកម្សាន្តនៅលើម៉ាស៊ីនកុំព្យូទ័រប្រភេទ Desktop នៅឡើយ។ ដូចនេះជាមួយនឹង MSI GS66 Stealth និង MSI GE66 Raider ពួកគេពិតជានឹងទទួលបាននូវអ្វីមួយដ៏ពិសេសបំផុតដែលពួកគេមិនអាចរកបានសូម្បីតែនៅលើកុំព្យូទ័រ Desktop ដោយក្នុងនោះមានជាអាថ៍នៅបន្ទះបង្ហាញ LCD ដែលមានកម្រិត refresh rate ខ្ពស់កប់ស៊េរីដល់ទៅ 300Hz នេះឯង។ ម៉្យាងទៀតពួកវាមិនត្រឹមតែមានការបំពាក់នូវបន្ទះបង្ហាញមានកម្រិត refresh rate 300Hz ប៉ុណ្ណោះទេ MSI GS66 Stealth និង GE66 Raider នូវមានភ្ជាប់ដំឡើងមកជាមួយនឹងផ្នែករឹងខ្លាំងចុងក្រោយថែមទៀតផងដែលធ្វើអោយល្បឿននៃការប្រើប្រាស់គឺកាន់តែលឿនរហ័សបំផុត។
ប៉ុន្តែគួរអោយស្តាយ MSI មិនទាន់បានបង្ហាញជាក់ច្បាស់ពីកំលាំងម៉ាស៊ីនរបស់កុំព្យូទ័រយួដៃទាំងពីរស៊េរីនេះជាផ្លូវការណ៍នៅឡើយទេ ក៏ប៉ុន្តែគ្រប់គ្នាអាចទស្សន៍ទាយបានថានៅក្នុងម៉ាស៊ីនរបស់ពួកវាច្បាស់ណាស់នឹងមានបំពាក់នូវប្រព័ន្ធបច្ចេកវិទ្យាបន្សាយកំដៅ Cooler boost Trinity cooling system ដែលបង្កើតឡើងដោយ MSI ផ្ទាល់ជាមួយប្រព័ន្ធកង្កាលបំភាយកំដៅចំនួន 3 ដែលមានកម្រាស់ស្តើងបំផុតត្រឹមតែ 0.1mm ដែលជួយធ្វើអោយការបំភាយកំដៅចេញពីក្នុងម៉ាស៊ីនបានយ៉ាងល្អ និងជួយរក្សាភាពត្រជាក់នៅលើ CPU និង GPU ប្រើយូរមិនងាយឡើងកំដៅ។
ទោះបីជាក្រុមហ៊ុន MSI បានបង្ហាញកុំព្យូទ័រយួរដៃ GS66 Stealth និង GE66 Raider របស់ខ្លួននៅឯពិព័រណ៍ CES រួចហើយក្តី ប៉ុន្តែក្រុមហ៊ុនមិនបានបង្ហើបបង្ហាញអំពីពេលវេលាដែលត្រូវចេញលក់ម៉ាស៊ីនកុំព្យូទ័រទាំងពីរស៊េរីនេះនៅឡើយទេ។ ហើយសម្រាប់ការប្រើប្រាស់បន្ទះអេក្រង់កម្រិត 300Hz នេះក៏វាមិនមែនជារឿងថ្មីនៅក្នុងពិភពកុំព្យូទ័រ Gaming នោះដែរ ព្រោះតាមពិតទៅក្រុមហ៊ុន Acer និង ASUS បានប្រើប្រាស់បន្ទះបង្ហាញកម្រិត 300Hz រួចហើយនៅលើកុំព្យូទ័រយួរដៃ Gaming របស់ពួកគេ ប៉ុន្តែវាមិនចោទជាបញ្ហាធំទេសម្រាប់ក្រុមហ៊ុន MSI ក្នុងការប្រើប្រាស់បន្ទះបង្ហាញកម្រិតខ្ពស់នេះក្រោយដៃគូ។ ទន្ទឹមនឹងនេះដែរ MSI អាចមានសមាសធាតុផ្សំផ្សេងៗទៀតដែលត្រូវការទិញសម្រាប់បំពាក់នៅលើម៉ាស៊ីនកុំព្យូទ័រយួរដៃស៊េរីថ្មី GS66 Stealth និង GE66 Raider របស់ខ្លួនមុនពេលចេញដាក់លក់ជាផ្លូវការណ៍៕
