នៅថ្ងៃនេះ ក្រុមហ៊ុន Samsung បានប្រកាសតែងតាំង លោក Roh Tae-moon ជាប្រធានអាជីវកម្មស្មាតហ្វូនរបស់ខ្លួនជំនួសលោក DJ koh។ ជាធម្មតាការផ្លាស់ប្តូរនាយកប្រតិបត្តិប្រចាំឆ្នាំរបស់ក្រុមហ៊ុន Samsung គឺធ្វើឡើងជាធម្មតានៅក្នុងខែធ្នូ ប៉ុន្តែវាត្រូវបានពន្យាពេលជាងមួយខែដោយសារបញ្ហាច្បាប់មួយចំនួននៅក្នុងប្រទេសកូរ៉េខាងត្បូង។ ការរៀបចំឡើងវិញនេះ ត្រូវធ្វើឡើងជាសាធារណៈនៅថ្ងៃនេះ ជាមួយសហនាយកប្រតិបត្តិទាំងបីរបស់ក្រុមហ៊ុន Samsung Electronics ដែលត្រូវរក្សានៅក្នុងមុខតំណែងរៀងៗខ្លួនជាធម្មតា។ ការអភិវឌ្ឍន៍គួរឱ្យចាប់អារម្មណ៍បំផុតនៅក្នុងការផ្លាស់ប្តូរនេះ គឺថាពេលនេះ ក្រុមហ៊ុន Samsung តែងតាំងប្រធានថ្មីសម្រាប់ផ្នែកទូរស័ព្ទចល័តរបស់ខ្លួន។ លោក Roh Tae-moon ត្រូវតែងតាំងជាប្រធានផ្នែកស្មាតហ្វូនដោយទទួលយកការងារពីលោក DJ Koh ដែលទទួលតំណែងបន្តពីលោក J.K. Shin នៅខែធ្នូឆ្នាំ 2015 ។
លោក Roh Tae-moon គឺជានាយកប្រតិបត្តិក្រុមហ៊ុន Samsung ដែលមានកេរ្តិ៍ឈ្មោះល្បីល្បាញហើយបច្ចុប្បន្នជាប្រធានក្មេងជាងគេបំផុតនៅអាយុ 51 ឆ្នាំ។ គាត់បានធ្វើការជាមួយនឹងក្រុមហ៊ុនបច្ចេកវិទ្យានេះអស់រយៈពេលជាងពីរទសវត្សហើយជានាយកប្រតិបត្តិទី 2 នៅក្នុងអាជីវកម្មទូរស័ព្ទចល័តនេះនៅក្រោមលោក Koh។ នៅពេលនេះ គាត់ទទួលបានការងារកំពូលពីលោក DJ Koh ដែលនៅតែជានាយកប្រតិបត្តិនៃអាជីវកម្មព័ត៌មានវិទ្យា និងទំនាក់ទំនងចល័តរបស់ក្រុមហ៊ុនបច្ចេកវិទ្យាSamsung។ លោក Tae-moon នឹងដឹកនាំអាជីវកម្មទូរស័ព្ទចល័តទាំងមូលរបស់ក្រុមហ៊ុនបច្ចេកវិទ្យា Samsung ក្រោមការដឹកនាំរបស់លោក Koh ។
លោក Tae-moon ជាមនុស្សដែលត្រូវគេគោរពយ៉ាងខ្លាំងនៅក្នុងក្រុមហ៊ុនបច្ចេកវិទ្យានេះថាជាអ្នកជំនាញផ្នែកវិស្វកម្មដែលជាអ្នកជំនាញខាងលក្ខណៈសម្បត្តិរបស់ទូរស័ព្ទ។ គាត់ដឹកនាំការអភិវឌ្ឍន៍ទៅលើស្មាតហ្វូន Galaxy Series ជាច្រើនក្នុងជំនាញជាអ្នកអភិវឌ្ឍន៍ដ៏ជំនាញ។ ក្រុមហ៊ុនបច្ចេកវិទ្យា Samsung និយាយថានៅពេលការប្រកួតប្រជែងនៅលើទីផ្សារកាន់តែខ្លាំងឡើងៗនោះ ការតែងតាំងរូបគាត់ត្រូវគេរំពឹងថានឹងធ្វើឱ្យអង្គភាពមានភាពប្រសើរឡើងវិញជាមួយនឹងយុទ្ធសាស្រ្តជាច្រើនថែមទៀតផង។
លោក Tae-moon ទទួលជ័យជំនះ លើបុព្វហេតុនៃយុទ្ធសាស្រ្តផ្លាស់ប្តូរជាច្រើនដើម្បីអាចប្រកួតប្រជែងបានល្អជាងគូប្រជែងធំៗដូចជាក្រុមហ៊ុន Huawei ជាដើម។ គាត់ដើរតួនាទីយ៉ាងសំខាន់ក្នុងការផ្លាស់ប្តូរត្រកូលស្មាតហ្វូនថ្នាក់កណ្តាលរបស់ក្រុមហ៊ុន Samsung និងជំរុញឱ្យផលិតប្រភពស្មាតហ្វូនកាន់តែច្រើនដើម្បីកាត់បន្ថយថ្លៃដើមថែមទៀត។ យើងបានឃើញថា ក្រុមហ៊ុនបច្ចេកវិទ្យា Samsung ធ្វើការផ្លាស់ប្តូរទៅលើម៉ូឌែល ODM នៅក្នុងប្រភេទ Entry-Level កាលពីឆ្នាំមុននេះ ហើយវាក៏មានរបាយការណ៍ជាច្រើនដែលនិយាយថា ស្មាតហ្វូននេះប្រហែលជាមានការពង្រីកកាន់តែច្រើនឡើងសម្រាប់ស្មាតហ្វូនជាច្រើនទៀតផងដែរ។ នេះគឺជាអ្វីដែលយើងប្រហែលជាឃើញថានឹងកើតឡើងនៅក្រោមការដឹកនាំរបស់ប្រធានថ្មីនេះ។
អ្នកដែលស្គាល់នាយកប្រតិបត្តិរូបនេះ បាននិយាយថា គាត់ជាអ្នកសំរេចចិត្តហើយទំនងជានឹងធ្វើការសំរេចចិត្តយ៉ាងឆាប់រហ័សដើម្បីឆ្លើយតបទៅនឹងការផ្លាស់ប្តូរសក្ដានុពលនៅក្នុងទីផ្សារដើម្បីការពារការនាំមុខរបស់ក្រុមហ៊ុន Samsung ក្នុងនាមជាក្រុមហ៊ុនស្មាតហ្វូនកំពូលរបស់ពិភពលោក។ ក្រុមហ៊ុន Huawei តាមពីក្រោយក្រុមហ៊ុន Samsung កៀកមែនទែន បើទោះបីជាមានបញ្ហានៅសហរដ្ឋអាមេរិកក៏ដោយ។ ការព្រួយបារម្ភចម្បងរបស់លោក Tae-moon នឹងធានាថា គូប្រជែងរបស់ចិន នឹងមិនយកឈ្នះក្រុមហ៊ុន Samsung នៅទូទាំងពិភពលោកទេ។ នេះមានន័យថា យើងអាចរំពឹងថា នឹងមានការផ្លាស់ប្តូរថ្មីពីអាជីវកម្មស្មាតហ្វូនរបស់ Samsung ក្នុងប៉ុន្មានខែខាងមុខនេះ។ ការបង្ហាញខ្លួនជាសាធារណៈលើកដំបូងរបស់លោក Tae-moon នៅលើឆាកអន្តរជាតិទំនងជានឹងត្រូវធ្វើឡើងនៅថ្ងៃទី 11 ខែកុម្ភៈនៅពេលដែលក្រុមហ៊ុនដាក់បង្ហាញវត្តមានជាផ្លូវការរបស់ស្មាតហ្វូន Galaxy S20 និងស្មាតហ្វូនដែលអាចបត់បានថ្មីនៅទីក្រុងសាន់ហ្វ្រាន់ស៊ីស្កូ។ ពេលវេលាដ៏រំភើបនឹងកើតឡើងនៅពេលខាងមុខនេះ៕
