.jpg)
កាលពីប៉ុន្មានម៉ោងមុននេះ ក្រុមហ៊ុន Xiaomi ទម្លាយនូវអេក្រង់របស់ស្មាតហ្វូន Xiaomi Mi 10 series ហើយពេលនេះ នាយកប្រតិបត្តិជាច្រើនរូប និងក្រុមហ៊ុនបច្ចេកវិទ្យាយក្សរបស់ចិននេះក៏ទម្លាយនូវព័ត៌មានរបស់ថាមពលថ្មស្មាតហ្វូននេះផងដែរ។ ស្មាតហ្វូន Mi 10 នេះនឹងមានភ្ជាប់ជាមួយនឹងថាមពលថ្ម 4,500mAh ជាមួយនឹងការទ្រទ្រង់នូវបច្ចេកវិទ្យា 50W fast flash charging ថែមទៀតផង។
សម្រាប់បច្ចេកវិទ្យា 50W fast flash charging នេះ អាចធ្វើការបញ្ចូលថាមពលថ្មទំហំ 4,500mAh បានពេញនៅលើស្មាតហ្វូន Mi 10 នេះនៅក្នុងរយៈពេលតែ 45 នាទីប៉ុណ្ណោះ។ ក្រៅពីបច្ចេកវិទ្យាបញ្ចូលថាមពលថ្មលឿននោះ ស្មាតហ្វូន Mi 10 នេះនឹងទ្រទ្រង់នូវបច្ចេកវិទ្យា 30W wireless fast flash charging ផងដែរ។ ស្មាតហ្វូននេះ ក៏មានការទ្រទ្រង់នូវបច្ចេកវិទ្យា 10W reverse wireless charging ដែលអាចធ្វើការបញ្ចូលនូវថាមពលរបស់កាសស្តាប់ និងស្មាតវ៉ចទៀតផង។ ក្រុមហ៊ុននេះ នៅមិនទាន់ចែករំលែកនូវថាមពលថ្ម និងបច្ចេកវិទ្យាបញ្ចូលថាមពលថ្មនេះ នៅឡើយទេ សម្រាប់ស្មាតហ្វូន Xiaomi Mi 10 Pro នោះ។
ពាក្យចចាមអារ៉ាម បាននិយាយថា ស្មាតហ្វូន Xiaomi Mi 10 Pro នឹងមានភ្ជាប់ជាមួយនឹងបច្ចេកវិទ្យា 66W fast charging យោងតាមភស្តុតាងដែលបញ្ជាក់នៅក្នុងកូដរបស់ MIUI 11 កាលពីខែមុននេះ ក្នុងនោះក៏មានរូបភាពបែកធ្លាយរបស់បច្ចេកវិទ្យា Fast Charger នេះផងដែរនៅក្នុងពេលថ្មីៗនេះ។
លោក Chang Cheng អនុប្រធានអគ្គនាយករបស់ក្រុមហ៊ុន Xiaomi បាននិយាយថា ក្រុមហ៊ុន Xiaomi បានពិចារណាទៅលើការបញ្ចូលគ្នាច្រើននៃល្បឿនបញ្ចូលថាមពលថ្មលឿន និងទំហំថាមពលថ្មកាន់តែធំដែលមានថាមពលថ្ម 4,850mAh ជាមួយនឹងបច្ចេកវិទ្យា 18W fast charging, 4,700mAh ជាមួយនឹងបច្ចេកវិទ្យា 30W rapid charging, 4,500mAh ជាមួយនឹងបច្ចេកវិទ្យា 50W fast charging និងថាមពលថ្ម 4,050mAh ជាមួយនឹងបច្ចេកវិទ្យា 65W fast charging ថែមទៀត។ ជាចុងក្រោយនេះ ក្រុមហ៊ុនបានធ្វើការសរុបថាថាមពលថ្ម 4,500mAh ជាមួយនឹងបច្ចេកវិទ្យា 50W rapid charging គឺជាជំរើសដែលល្អបំផុតសម្រាប់ស្មាតហ្វូន Xiaomi Mi 10។
លោក Wang Teng Thomas របស់ក្រុមហ៊ុន Xiaomi បាននិយាយថា ថាមពលបញ្ចូលថ្មលឿននេះ គឺដំណើរការបានល្អមែនទែនសម្រាប់ថាមពលថ្មដែលធំ។ គាត់និយាយថា វាអាចបញ្ចូលតាមខ្សែ តាម Wireless ឬ reverse charging ហើយស្មាតហ្វូន Mi 10 នេះ គឺដំណើរការលឿនជាងបច្ចេកវិទ្យាបញ្ចូលថាមពលថ្មលឿនរបស់ក្រុមហ៊ុនគូប្រជែងជាច្រើនទៀតនោះ។ ក្រុមហ៊ុន Xiaomi នឹងបង្ហាញនូវស្មាតហ្វូន Xiaomi Mi 10 series ដែលដំណើរការនូវបន្ទះឈីប Snapdragon 865 នៅថ្ងៃ នេះ ។ ក្រុមហ៊ុននេះ ត្រូវបានគេរំពឹងថា នឹងទម្លាយនូវព៌មានជាច្រើនទៀតរបស់ស្មាតហ្វូន Mi 10 និង Mi 10 Pro ក្នុងពេលឆាប់ៗនេះ៕
