បើទោះបីជាព្រឹត្តិការណ៍នៃការបង្ហាញស្មាតហ្វូនស៊េរីថ្មី Huawei Mate គឺនៅយូរទៀតក៏ដោយនោះ ក៏បង្ហាញរូបភាព Render របស់ស្មាតហ្វូននេះ នៅតែមានការចែករំលែកនៅលើអនឡាញផងដែរ។ កាលពីថ្ងៃទី 23 ខែមីនា ឆ្នាំ 2020 នេះ ក៏មានរូបភាពបង្ហាញពីការឌីស្សាញទៅលើគំនិតថ្មីមួយរបស់ស្មាតហ្វូន Mate 40 Pro ត្រូវបានគេចែករំលែកអនឡាញផងដែរ ហើយវាគឺជាគំនិតរបស់អ្នកគាំទ្រម្នាក់ តែមិនមានជាព័ត៌មានផ្លូវការនោះទេ ប៉ុន្តែវាពិតជាស្រស់ស្អាត និងប្លែកខ្លាំងមែនទែន។
បើទោះបីនេះ គឺជាការផលិតឡើងដោយអ្នកគាំទ្រក៏ដោយនោះ គឺផ្អែកទៅលើប៉ាតង់ផ្លូវការរបស់ក្រុមហ៊ុន Huawei និងគំរូរបស់ស្មាតហ្វូននេះ ដែលកាលពីមុនមានការបែកធ្លាយនៅលើអនឡាញផងដែរ។ ស្មាតហ្វូនមានការឌីស្សាញថ្មីមួយចំនួន ដែលត្រូវបានប្រើប្រាស់ផងដែរ ប៉ុន្តែវានៅមិនទាន់មានការបញ្ជាក់នៅឡើយទេ។ ស្មាតហ្វូននេះ មានការឌីស្សាញដែលមិនមាន Notch នោះទេ ហើយវាមានគែមកោងនៅលើអេក្រង់របស់វាទាំងផ្នែកខាងលើ និងផ្នែកខាងក្រោមរបស់វា។ ការឌីស្សាញនេះគឺមានលក្ខណៈស្រដៀងគ្នាទៅនឹងគំនិតនៃការឌីស្សាញរបស់ស្មាតហ្វូន Mate 30 Pro ដែលមានអេក្រង់គែមកោង ហើយវាក៏នៅតែរក្សាទុកនូវប៊ូតុង Power ដដែលផងដែរ។
តាមការបញ្ជាក់នៅក្នុងរូបភាព Render នេះ តួខ្លួនរបស់ស្មាតហ្វូននេះ គឺមានអេក្រង់ពេញគែម ហើយវាក៏ប្រើប្រាស់នូវម៉ូឌុល 3D face recognition ថែមទៀតផង។ សម្រាប់ផ្នែកខាងក្រោយរបស់ស្មាតហ្វូននេះ គឺមានកាមេរ៉ាចំនួន 4 គ្រាប់ដែលមានម៉ាកយីហោ Leica ។ ស្មាតហ្វូន Mate 40 Pro មានការឌីស្សាញជារូបរាងពីរ៉ាមីតដែលមានរូបរាងប្លែកគួរអោយចាប់អារម្មណ៍ខ្លាំងមែនទែន។ គំនិតនេះគឺមានការច្នៃប្រឌិតទៅតាមប៉ាតង់ជាច្រើនដែលមានការបែកធ្លាយនៅលើអនឡាញផងដែរ៕