ថ្មីៗនេះ មានរបាយការណ៍បានបញ្ជាក់ថា ក្រុមហ៊ុន vivo បានជាត្រៀមខ្លួនក្នុងការបញ្ចេញនូវស្មាតហ្វូនជំនាន់ថ្មីរបស់ vivo V11 Pro នោដើមខែកុម្ភៈនេះ នៅក្នុងប្រទេសឥណ្ឌា។ ស្របពេលដែលប្រព័ន្ធផ្សព្វផ្សាយមួយចំនួនហៅស្មាតហ្វូននេះថា vivo V12 Pro។ ទាក់ទងជាមួយស្មាតហ្វូននេះ មានសារព័ត៌មានមួយចំនួនទៀត បានអះអាងថា ក្រុមហ៊ុននេះ អាចនឹងបោះបង់ចោលនូវឈ្មោះស្មាតហ្វូន Vivo V13 Pro ដោយសារតែលេខ 13 គឺត្រូវចាត់ទុកថាជាលេខមិនល្អនោះទេ សម្រាប់ប្រទេសមួយចំនួន។ ដូចនេះ មានការសង្ស័យថា ស្មាតហ្វូនជំនាន់បន្ទាប់របស់ស្មាតហ្វូន vivo V11 Pro នឹងដាក់លក់នៅលើទីផ្សារនៅក្នុងឈ្មោះហៅថា Vivo V15 Pro។
ក្រុមហ៊ុនេ vivo បានប្រើប្រាស់នូវលេខសេស សម្រាប់ស្មាតហ្វូនត្រកូល V-Series របស់ខ្លួន ដូចនេះ ការប្រើប្រាស់ឈ្មោះហៅថា V14 Pro នេះ គឺប្រហែលជាមិនមាននោះទេ ដោយសារតែវាមានការបែកធ្លាយនូវសម្បកទូរស័ព្ទរបស់ស្មាតហ្វូនមួយដែលទ្រូវគេទម្លាយថា នឹងមានឈ្មោះហៅថា vivo V15 Pro នោះ។ ទោះបីជាយ៉ាងណាក៏ដោយ សម្បកទូរស័ព្ទដែលបែកធ្លាយនេះត្រូវបានគេទម្លាយថា ស្មាតហ្វូននេះ ពិតជាមានប្រព័ន្ធកាមេរ៉ា 3 គ្រាប់នៅខាងក្រោយពិតមែន ហើយកាមេរ៉ាខាងមុខគេជាប្រភេទ Pop-up Selfie ។
រូបភាពនៃសម្បកទូរស័ព្ទរបស់ស្មាតហ្វូន vivo V15 Pro នេះ បានទម្លាយថា ផ្នែកខាងលើខាងឆ្វេងរបស់ស្មាតហ្វូននេះ គឺមានភ្ជាប់ជាមួយនឹងកាមេរ៉ា 3 គ្រាប់បញ្ឈរយ៉ាងស្រស់ស្អាត។ នៅពេលដែលមើលទៅលើផ្នែកខាងមុខរបស់ស្មាតហ្វូននេះ គេអាចសម្គាល់បានថាស្មាតហ្វូននេះនឹងប្រើប្រាស់នូវកាមេរ៉ារុញ Popup Selfie ដូចគ្នាទៅនឹងស្មាតហ្វូន vivo NEX ដែលបង្ហាញខ្លួនកាលពីឆ្នាំមុននេះផងដែរ។ ព័ត៌មានថ្មីបំផុតបង្ហាញថា ក្រុមហ៊ុនបច្ចេកវិទ្យា Vivo នៅក្នុងប្រទេសឥណ្ឌាប្រហែលជាបញ្ឈប់នូវការផលិតស្មាតហ្វូន vivo NEX ដើម្បីបញ្ចេញទីផ្សាររបស់ស្មាតហ្វូន V15 Pro នេះ។
នៅផ្នែកខាងក្រោយរបស់ស្មាតហ្វូន vivo V15 Pro នេះ មិនមានប្រព័ន្ធស្កេនក្រយ៉ៅដៃនោះទេ។ ដូចនេះ អាចនិយាយបានថា ស្មាតហ្វូននេះ នឹងប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ដូចគ្នាទៅនឹងស្មាតហ្វូន V11 Pro។ គែមខាងស្តាំងរបស់សម្បកទូរស័ព្ទនេះ គឺមានរន្ធមួយដែលគេដឹងថានេះគឺជាប៊ូតុង Key។ ហើយនៅគែមខាងឆ្វេងក៏មានកន្លែងសម្រាប់ចុចប៊ូតុងដល់ទៅ 3 ផងដែរ។ vivo v15 Pro គឺជាស្មាតហ្វូនស៊េរីថ្មីដែលមានការរចនារូបរាងយ៉ាងស្រស់ស្អាតដូចការសន្យារបស់ក្រុមហ៊ុន vivo ហើយវាក៏មានបំពាក់នូវមុខងារថ្មីៗជាច្រើនទៀត។ ស្មាតហ្វូននេះ នឹងបង្ហាញខ្លួនជាផ្លូវការនៅខែក្រោយនេះ ដូចនេះ ពិតជាមានពាក្យចចាមអារ៉ាមជាច្រើននៅប៉ុន្មានសប្តាហ៍នេះ៕
