នៅថ្ងៃទី 25 ខែមីនា ឆ្នាំ 2020 កន្លងទៅនេះ នាយកប្រតិបត្តិជាន់ខ្ពស់របស់ក្រុមហ៊ុន realme បានបញ្ជាក់ថា ស្មាតហ្វូន Flagship ទាំងអស់ដែលនឹងបង្ហាញខ្លួននៅក្នុងឆ្នាំ 2020 នេះ នឹងមានកម្រិតអេក្រង់ refresh rate ខ្ពស់ក្នុងការប្រើប្រាស់។ ដំណឹងនេះ ត្រូវបានចែករំលែកនៅលើបណ្តាញសង្គម Weibo របស់ចិនផងដែរ។ ការប្រកាសនេះ គឺចេញពីលោក Xu Qi អនុប្រធាន និងប្រធានផ្នែកទីផ្សារពិភពលោករបស់ក្រុមហ៊ុន realme ដែលធ្វើការរំពឹងទុកសម្រាប់ស្មាតហ្វូន 2020 របស់ខ្លួននោះ។
កាលពីពេលមុននេះ ក្រុមហ៊ុនផលិតស្មាតហ្វូនរបស់ចិនក៏ប្រកាសបង្ហាញនូវស្មាតហ្វូន realme X50 Pro នៅថ្ងៃទី 12 ខែមីនាឆ្នាំ ២០២០ នេះដែលមានកម្រិតអេក្រង់ទំហំ 6.44 អ៊ីង Super AMOLED ជាមួយនឹងកម្រិត 90Hz refresh rate ហើយសម្រាប់កម្រិតនៃ sampling rate នៅលើអេក្រង់គឺមានដល់ទៅ 180Hz។ ស្មាតហ្វូននេះគឺប្រើប្រាស់នូវបន្ទះឈីប Snapdragon 865 SoC របស់ក្រុមហ៊ុន Qualcomm និងលក្ខណៈសម្បត្តិពិសេសៗជាច្រើនទៀតផងដែរ។ ការប្រើប្រាស់នូវអេក្រង់ដែលមានកម្រិតាំាំ refresh rate ខ្ពស់នេះ គឺផ្តល់នូវបទពិសោធន៍នៃការប្រើប្រាស់កាន់តែអស្ចារ្យនៅក្នុងការងារប្រចាំថ្ងៃដូចជាផ្នែក Media ឬការលេងហ្គេមកម្សាន្តផងដែរ ប៉ុន្តែវា ក៏ឆាប់អស់ថាមពលថ្មផងដែរ។
កន្លងមក យើងប្រាកដជាបានឃើញនូវព័ត៌មានខ្លះរួចមកហើយនៃបង្ហាញនូវវត្តមានរបស់ស្មាតហ្វូន Redmi K30 Pro ដែលនេះជាប្រភេទស្មាតហ្វូន Flagship ដែលមានអេក្រង់កម្រិត 60Hz តែប៉ុណ្ណោះ។ យើងនឹងរង់ចាំមើលថា តើកម្រិតអេក្រង់ប៉ុន្មាន ដែលក្រុមហ៊ុន realme នឹងប្រើប្រាស់នៅលើអេក្រង់ស្មាតហ្វូនរបស់ខ្លួននោះ។វាប្រហែលជាមានកម្រិតដល់ទៅ 90Hz ផងដែរ។ យ៉ាងណាមិញ ក្រុមហ៊ុន realme អាចនឹងប្រើប្រាស់នូវកម្រិតអេក្រង់ដល់ទៅ 120Hz ដើម្បីធ្វើការប្រកួតប្រជែងជាមួយនឹងទីផ្សារជាច្រើនរបស់ខ្លួន៕
