កាលពីដើមខែនេះ ក្រុមហ៊ុន Xiaomi ដែលជាក្រុមហ៊ុនបច្ចេកវិទ្យាយក្សដ៏ល្បីល្បាញបានទទួលនូវអាជ្ញាប័ណ្ណប៉ាតង់ថ្មីរបស់ខ្លួន។ ប៉ាតង់នេះគឺបានដាក់ស្នើនៅក្នុងថ្ងៃទី 22 ខែឧសភា ឆ្នាំ 2019 ហើយវាក៏អនុម័តនៅថ្ងៃទី 17 ខែមីនា ឆ្នាំ 2020 នេះ។ តាមការបញ្ជាក់នៅក្នុងប៉ាតង់នេះ អាជ្ញាប័ណ្ណនេះ គឺសម្រាប់ការផលិតម៉ាសថ្មី។ អ្វីដែលគួរអោយកត់សម្គាល់នោះ ម៉ាស់ថ្មីនេះគឺមានការប្រើប្រាស់សម្រាប់ទម្រង់នៃមុខរបស់មនុស្សដល់ទៅ 3 ផ្សេងៗគ្នា ហើយវាពិតជាពាក់ទៅសក្តិសមល្អក្នុងការប្រើប្រាស់បំផុត។
បើនិយាយអោយស្រួលស្តាប់នោះ វាគឺងាយស្រួលក្នុងការប្រើប្រាស់ នៅពេលដែលបានពាក់នៅលើផ្ទៃមុខរបស់អ្នកប្រើប្រាស់។ សម្រាប់ការផលិតនៅលើម៉ាសនេះគឺចេញពីផ្លាស្ទិក ហើយវាអាចធ្វើការកាច់បត់ទៅតាមទម្រង់នៃមុខរបស់អ្នកប្រើប្រាស់ ហើយវាគឺពិតជាផ្តល់នូវផាសុកភាពបំផុតក្នុងការប្រើប្រាស់ថែមទៀតផង។ សម្រាប់មុខងារមួយទៀតរបស់ម៉ាសការពារមុខរបស់ក្រុមហ៊ុនបច្ចេកវិទ្យាXiaomi នេះគឺការផ្តល់នូវខ្យល់ដង្ហើមកាន់តែល្អប្រសើរបំផុត។ វាអាចធ្វើការផ្តល់នូវខ្យល់អាកាសដែលល្អសម្រាប់ផ្លូវដង្ហើមរបស់មនុស្ស និងជួយការពារបានកាន់តែប្រសើរជាងមុនថែមទៀតបើទោះបីជាអ្នកប្រើប្រាស់ម៉ាសនេះស្ថិតនៅក្នុងតំបន់ដែលមានជំងឺដែលឆ្លងតាមរយៈខ្យល់ក៏ដោយ។
នៅក្នុងវេលានេះ គឺជាពេលមួយ ដែលមានការរាតត្បាតទៅលើមេរោគកូរ៉ូណា ហើយម៉ាសនេះ ពិតជាអាចជួយសង្គ្រោះជីវិត និងការការពារទប់ស្កាត់ការឆ្លងនៃមេរោគនេះផងដែរ។ សម្រាប់អ្នកដែលមិនបានដឹងនោះ មេរោគកូរ៉ូណាវីរុសនេះ មានការផ្ទុះឡើងដូចជាភ្លើងឆេះព្រៃអឹញ្ចឹង នៅក្នុងប្រទេសចិន ។ ពេលនេះ ចំនួននៃករណីរបស់អ្នកឆ្លងដោយសារតែមេរោគ COVID-19 នេះគឺមានការឆ្លងច្រើនជាង 170 ប្រទេសនៅទូទាំងពិភពលោក ខណៈពេលដែលអង្គការសុខភាពពិភពលោក WHO ក៏ចាត់ទុកថាមេរោគនេះ គឺជាប្រភេទមេរោគរាតត្បាតនោះ។ អ្នកប្រើប្រាស់ជាច្រើនត្រូវបានស្នើសុំអោយមានការប្រុងប្រយ័ត្នអោយបានខ្ពស់ និងចាត់វិធានការណ៍ត្រឹមត្រូវ ដើម្បីកាត់បន្ថយនូវហានិភ័យនៃការឆ្លងរបស់មេរោគនេះ៕