.jpg)
ដូចអ្វីដែលបានរំពឹងទុកចឹងក្រុមហ៊ុន Google បានធ្វើការដាក់បង្ហាញចេញនូវប្រព័ន្ធប្រតិបត្តិការទូរស័ព្ទជំនាន់ថ្មីគឺ Android 10 Q នៅក្នុងសន្និសិត I/O Developer Conference កាលពីពេលថ្មីៗនេះ។ ការពិតណាស់សម្រាប់ប្រតិបត្តិការជំនាន់ថ្មីនេះ គឺមិនទាន់ចេញដាក់អោយប្រតិបត្តិការនៅលើស្មាតហ្វូនណាមួយនៅឡើយទេដោយសារតែវាស្ថិតក្នុងជំនាន់សាកល្បង (Beta Version) ដោយជំនាន់នេះ គឺកំពុងស្ថិតក្នុងដៃរបស់ក្រុមអ្នកផលិតកម្មវិធីធ្វើការតេស្តសាកល្បងពីលទ្ធភាពដែលវាអាចធ្វើបាន និងល្បឿនប្រតិបត្តិការរបស់វា។
ទោះជាយ៉ាងណាក្តី Google បានបង្ហើបអោយដឹងថាមានស្មាតហ្វូនមាណជា 21 ស៊េរីមកពីក្រុមហ៊ុនចំនួន 13 ផ្សេងគ្នាដែលមានលទ្ធភាពទទួលបានការដំឡើងតេស្តសាកល្បងបានដែលស្មាតហ្វូនទាំងនោះមានដូចជា Asus Zenfone 5z, Essential Phone, Huawei Mate 20 Pro, LG G8 ThinQ, Nokia 8.1, OnePlus 6T, Oppo Reno, Realme 3 Pro, Sony Xperia XZ3, Tecno Spark 3 Pro, vivo X27, vivo NEX S, vivo NEX A, Xiaomi Mi 9 និង Xiaomi Mi Mix 3 5G។
យ៉ាងណាមិញលោក Lu Weibing ដែលជាអគ្គនាយកគ្រប់គ្រងម៉ាកស្មាតហ្វូន Redmi របស់ក្រុមហ៊ុន Xiaomi បានបញ្ជាក់អោយដឹងលើបណ្តាញទំនាន់ទំនង Weibo ផ្ទាល់ខ្លួនរបស់លោកថា “កំពូលស្មាតហ្វូនម៉ាក Redmi ជំនាន់ថ្មីរបស់ខ្លួនដែលនឹងបង្ហាញវត្តមានក្នុងពេលឆាប់ៗនេះ នឹងត្រូវបានដំឡើងមកជាមួយនឹង MIUI ជំនាន់ថ្មីជំនាន់ Beta ដែលទ្រទ្រង់ដោយ Android Q ផងដែរ”។
ហើយមិនមែនមានតែក្រុមហ៊ុន Xiaomi តែមួយនោះទេដែលរំពឹងថាបានដំណើរការប្រតិបត្តិការជំនាន់ថ្មីនេះនៅលើកំពូលស្មាតហ្វូនរបស់ខ្លួន ក្នុងនោះក្រុមហ៊ុន Huawei និងបុត្រសម្ព័ន្ធរបស់ខ្លួន Honor ក៏រំពឹងថានឹងបានភ្លក់នូវប្រតិបត្តិការ Android Q ជាមួយ EMUI នៅលើស្មាតហ្វូនជំនាន់ថ្មីរបស់ពួកគេក្នុងពេលឆាប់ៗនេះផងដែរបបន្ទាប់ពីប្រតិបត្តិការនេះបានចេញដំណើរការនៅលើស្មាតហ្វូន Pixel Series របស់ Google រួចរាល់ផ្លូវការណ៍។
សម្រាប់កំពូលស្មាតហ្វូន Redmi ជំនាន់ថ្មីដែលត្រៀមបង្ហាញខ្លួនជាមួយ Android Q នោះ ត្រូវបានប្រភពព័ត៌មានចចាមអារ៉ាមទម្លាយអោយដឹងថានឹងបំពាក់នូវបន្ទះឈីប Qualcomm Snapdragon 855, មានរ៉េមទំហំ 8GB ជាមួយទំហំផ្ទុកទិន្នន័យទំហំ 128GB, ប្រើប្រាស់អេក្រង់ទំហំ 6.39 អ៊ីងកម្រិតបង្ហាញ Full-HD+, បំពាក់នូវប្រព័ន្ធកាមេរ៉ាក្រោយបីគ្រាប់ដោយកាមេរ៉ាគោលមានទំហំ 48MP ដូចកាមេរ៉ារបស់ Redmi Note 7 Pro ដែរ និងមានកាមេរ៉ាមុខជាប្រភេទ Periscope Selfie Module៕
.jpg)
