ទីផ្សារស្មាតហ្វូនក្រុមហ៊ុន vivo នៅក្នុងប្រទេសឥណ្ឌា ត្រូវបានគេមើលឃើញថា មានសន្ទុះក្នុងការលក់យ៉ាងឆាប់រហ័សកាលពីឆ្នាំកន្លងទៅ។ ចូលដល់ឆ្នាំ 2019 នេះក្រុមហ៊ុនចិនមួយនេះបានបន្តនាំយកស្មាតហ្វូនស៊េរីថ្មីៗរបស់ខ្លួនទៅប្រកាសចេញលក់នៅក្នុងទីផ្សារដ៏ធំក្នុងតំបន់អាស៊ីមួយនេះ។
V15 គឺជាស្មាតហ្វូនជំនាន់ថ្មីមួយទៀតដែលត្រួវបានក្រុមហ៊ុន vivo បានពាំនាំយកទៅប្រកាសចេញលក់ក្នុងទីផ្សារប្រទេសឥណ្ឌាក្នុងពេលថ្មីៗនេះ ហើយអ្វីដែលគួរអោយកត់សំគាល់គឺថាស្មាតហ្វូនត្រកូល V-Series ជំនាន់ថ្មីនេះទទួលបានការស្វាគមន៍យ៉ាងកក់ក្តៅពីប្រជាជនឥណ្ឌាដែលជម្រុញអោយការលក់របស់វាមានចំនួនកើនឡើងយ៉ាងឆាប់រហ័សបំផុត។
ដោយមើលឃើញពីភាពជោគជ័យដូចនេះក្រុមហ៊ុន vivo ក៏បានធ្វើការណែនាំនូវស្មាតហ្វូនត្រកូល V-Series ពីរស៊េរីបន្ថែមទៀតដើម្បីបំពេញតាមតម្រូវការចង់បានរបស់អតិថិជនគឺ V15 Pro ដែលបានបង្កើនទំហំរ៉េមឡើងដល់ទំហំ 8GB និង V15 ដែលបានចាក់ពណ៌ថ្មីហៅថា “Aqua Blue”។ សម្រាប់ V15 Pro ដែលបានការបន្ថែមទំហំរ៉េម 2GB ឡើងរ៉េមដល់ 8GB គឺមានគុណសម្បត្តិទូទៅដូចគ្នាទៅនឹងម៉ូដែល Pro ស្តង់ដារមានរ៉េមទំហំ 6GB ដដែលគឺអេក្រង់កម្រិត Full-HD+ ទំហំ 6.39 អ៊ីងជាមួយបច្ចេកវិទ្យាស្កែនក្រយ៉ៅម្រាមដៃបង្កប់ក្រោមអេក្រង់, កាមេរ៉ាសែលហ្វីលាក់ក្នុងខ្លួនទំហំ 32MP elevating selfie cam, កាមេរ៉ាក្រោយបីគ្រាប់ដោយលែនគោលមានទំហំ 48MP+លែន Ultra-wide ទំហំ 8.0MP+លែន Depth Sensor ទំហំ 5.0MP។
ស្មាតហ្វូននេះមានអង្គផ្ទុកទិន្នន័យទំហំ 128GB, អូសដោយបន្ទះឈីប Snapdragon 675, មានថ្មទំហំ 3,700mAh ទ្រទ្រង់បច្ចេកវិទ្យាសាកល្បឿនលឿនកំលាំង 18W តាមរយះរន្ធ microUSB, និងដំណើរការលើ Funtouch OS9 ទ្រទ្រង់ដោយ Android Pie។ សម្រាប់តម្លៃរបស់វាគឺខ្ទង់ប្រមាណ INR 29,990 រ៉ូពីឬប្រហែល $425 ខណះ V15 Pro ដែលមានរ៉េមទំហំ 6GB មានតម្លៃខ្ទង់ប្រមាណ INR 26,990 រ៉ូពី ឬប្រហែល $382។
ចំនែកម៉ូដែល V15 Aqua Blue បំពាក់នូវអេក្រង់កម្រិត Full-HD+ ទំហំ 6.53 អ៊ីង, មានទ្រនាប់ស្កែនក្រយ៉ៅម្រាមដៃនៅផ្ទៃខ្នងខាងក្រោយ, មានកាមេរ៉ាមុខទំហំ 32MP ប្រភេទ Pop Up Selfie Camera ជាមួយកាមេរ៉ាក្រោយបីគ្រាប់ដែលលែនគោលទំហំ 24MP+លែន Ultra-wide ទំហំ 8.0MP+លែន Depth Sensor ទំហំ 5.0MP។ ស្មាតហ្វូន V15 ពណ៌ថ្មីនេះរត់ដោយបន្ទះឈីប Helio P70 SoC ជាមួយរ៉េមទំហំ 6GB, មានអង្គផ្ទុកទិន្នន័យក្នុងម៉ាស៊ីនទំហំ 64GB និងមានថ្មទំហំ 4,000mAh។ សម្រាប់តម្លៃរបស់វាវិញគឺខ្ទង់ប្រមាណ INR 21,990 រ៉ូពី ឬប្រហែល $311៕