.jpg)
ថ្មីៗនេះ ក្រុមហ៊ុន Google ទើបតែប្រកាសដាក់លក់នូវស្មាតហ្វូនស៊េរីថ្មី Google Pixel 3a និង 3a XL ស្របពេលដែលក្រុមហ៊ុននេះ ត្រៀមខ្លួនក្នុងការបញ្ចេញនូវស្មាតហ្វូនស៊េរីថ្មី Google Pixel 4 និង Pixel 4 XL ដែលអតិថិជនជាច្រើនធ្វើការទន្ទឹងរង់ចាំជាយូរហើយផងដែរ។ នៅក្នុងន័យនេះ យើងទទួលបាននូវរូបភាព Renders ដំបូងបំផុតរបស់ស្មាតហ្វូន Google Pixel 4 ចេញពី PriceBaba ដែលផ្អែកទៅអ្វីដែលបានទម្លាយដោយ @OnLeaks នោះ។
រូបភាព Renders នេះគឺផ្អែកទៅលើគំរូជាច្រើនរបស់ស្មាតហ្វូននេះ ប៉ុន្តែនេះមិនមែនជា version ចុងក្រោយនៅឡើយទេ។ ដូចនេះ រូបភាព Renders នេះនៅមិនទាន់ជឿជាក់បាន 100% នោះទេ។ រូបភាព Renders នេះ គឺដូចគ្នាច្រើនទៅនឹង iPhones 2019 ដែលមានកាមេរ៉ារូបរាងជាការ៉េនៅផ្នែកខាងក្រោយរបស់ស្មាតហ្វូននេះ ដែលយើងរំពឹងថា នឹងប្រើប្រាស់នៅលើ iPhone 11 ( ឬ iPhone XI ដោយផ្អែកទៅលើអ្វីដែលជាការសម្រេចចិត្តរបស់ក្រុមហ៊ុន Apple)។ មានការទស្សន៍ទាយថា ស្មាតហ្វូន Pixel 4 នឹងធ្វើការប្រើប្រាស់យ៉ាងហោចណាស់កាមេរ៉ា 2 ឬ 3 គ្រាប់វិញ។ ក្រៅពីកាមេរ៉ានេះ យើងអាចកត់សម្គាល់ទៀតបានថា ស្មាតហ្វូននេះ មិនមានប្រព័ន្ធស្កេនក្រយ៉ៅដៃនៅខាងក្រោយនោះទេ ដូចនេះ ស្មាតហ្វូន Pixel 4 នឹងប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ ឬបច្ចេកវិទ្យាស្កេនមុខ (facial recognition)។
មួយវិញទៀត ស្មាតហ្វូននេះមិនមានរន្ធដោតកាសស្តាប់នោះទេ ដោយប្រើប្រាស់នូវ Speakers ភ្លោះនៅផ្នែកខាងក្រោម ហើយក្រុមហ៊ុន Google ក៏បោះបង់ចោលនូវ Stereo Speakers នៅផ្នែកខាងមុខរបស់ស្មាតហ្វូននេះផងដែរ។ រូបភាព Renders នេះ គឺមានការទម្លាយដោយ @OnLeaks ដែលផ្នែកខាងក្រោយរបស់វាក៏មានប្រើប្រាស់នូវឡូហ្គោ G Logo ផងដែរ៕
