បច្ចុប្បន្ននេះ យើងពិតជាបានឃើញថា កាមេរ៉ាស្មាតហ្វូន គឺកំពុងតែមានការប្រកូតប្រជែងគ្នាយ៉ាងខ្លាំងទាំងផ្នែក Hardware និង Software។ ហើយបើនិយាយពីស្មាតហ្វូនដែលកំពុងតែគ្រងដំណែងកាមេរ៉ាថតរូបច្រើនគ្រាប់ជាងគេនាពេលបច្ចុប្បន្ននេះគឺ Nokia 9 PureView ដែលស្មាតហ្វូននេះមានកាមេរ៉ាខាងក្រោយរហូតដល់ទៅ 5 គ្រាប់ឯណោះ។ ចំនែកស្មាតហ្វូនដែលត្រៀមបង្ហាញខ្លួននាត្រីមាសទី 3 ឆ្នាំនេះមានដូចជា LG V50 ThinQ ត្រូវបានគេរាយការណ៍ថានឹងមានកាមេរ៉ាខាងក្រោយចំនួន 3 គ្រាប់ ខណះ Samsung Galaxy Note 10 Pro និង Huawei Mate 10 Pro នឹងបំពាក់នូវកាមេរ៉ាចំនួន 4 គ្រាប់។
ប៉ុន្តែក្នុងខណះពេលនេះមានរបាយការណ៍ថ្មីមួយបានទម្លាយអោយដឹងថាស្មាតហ្វូន Sony Xperia ជំនាន់ក្រោយនឹងមានបំពាក់នូវកាមេរ៉ាខាងក្រោយរហូតដល់ទៅ 6 គ្រាប់ឯណោះ។ យោងតាមគណនីធ្វីស្ទ័រឈ្មោះថា @samsungNews ដែលមានម្ទាស់ឈ្មោះ Max J បានបង្ហាញចេញនូវរូបភាពគំនូព្រាងពីការបំពាក់នូវប្រព័ន្ធកាមេរ៉ា 6 គ្រាប់របស់ស្មាតហ្វូន Sony Xperia ហើយលោកបានបង្ហើបទៀតថាស្មាតហ្វូនជំនាន់ថ្មីមួយនោះក៏នឹងមានកាមេរ៉ាខាងមុខចំនួន 2 គ្រាប់ថែមទៀតផង។
យ៉ាងណាមិញគេមិនទាន់បានបញ្ជាក់ច្បាស់ពីការប្រើប្រាស់សែនស័រកាមេរ៉ាទាំង 6 គ្រាប់នោះនៅឡើយទេ ប៉ុន្តែគេសន្និដ្ឋានបានថាវាអាចទៅរួចព្រោះ Sony គឺជាក្រុមហ៊ុនដែលមានជំនាញខ្លាំងទៅលើការបង្កើតប្រព័ន្ធលែនកាមេរ៉ាថតរូបដែលទទួលស្គាល់នៅទូទាំងពិភពលោក។ ចំពោះប្រព័ន្ធកាមេរ៉ាទាំង 6 គ្រាប់ដែលនឹងត្រូវប្រើនៅលើស្មាតហ្វូន Xperia ជំនាន់ក្រោយគឺមិនទាន់ដឹងពីទំហំសែនស័រដែលត្រូវប្រើប្រាស់នៅឡើយទេ ប៉ុន្តែគេសន្និដ្ឋានបានថាវានឹងប្រើប្រាស់កែវលែន Telephoto Lens, Super Wide-Angle Lens, Time Of Flight Sensor, Main Camera Lens ជាប្រភេទ Wide-Angle និង 2 គ្រាប់ទៀតជាសែនស័រ Monochrome Sensor សម្រាប់ជំនួយក្នុងការផលិតសាច់រូបភាពអោយបានកាន់តែច្បាស់ម៉ដ្ឋនៅទីតាំងប្លង់ខ្សោយពន្លឺ (Low-Light Scenes)។
សម្រាប់ការរចនារូបរាង និងការប្រើបន្ទះអេក្រង់ខាងមុខនៃស្មាតហ្វូន SONY ជំនាន់ថ្មីនេះគឺមិនទាន់ត្រូវបានទម្លាយចេញនៅឡើយទេព្រោះថាវាកំពុងស្ថិតក្នុងដំណាក់កាលដំបូងនៃអភិវឌ្ឍន៍។ ប៉ុន្តែយើងអាចសន្និដ្ឋានបានថាកំពូលស្មាតហ្វូន Sony Xperia ជំនាន់ថ្មីនោះនឹងបំពាក់អេក្រង់ខ្នាតកុនកម្រិត 21:9 ratio CinemaView Display ដូចកំពូលស្មាតហ្វូន Sony Xperia 1 និងស្មាតហ្វូនធុនកណ្តាល Xperia 10 ចឹងដែរ ហើយអាចមានគែមកាត់ចេញកាន់តែស្តើងតូចជាងថែមទៀតផង។ តាមការព្យាករណ៍កំពូលស្មាតហ្វូន SONY មួយនេះ អាចនឹងបង្ហាញវត្តមាននៅជិតដំណាច់ឆ្នាំ 2019 ឬដើមឆ្នាំ 2020។ ហើយចំពោះផ្នែកគ្រឿងក្នុងរបស់វាដូចជាបន្ទះឈីបគឺមិនទាន់មានព័ត៌មានបែកធ្លាយចេញនៅឡើយទេ ប៉ុន្តែសម្រាប់ទំហំអង្គផ្ទុកទិន្នន័យ និងអង្គគណនាបណ្តោះអាសន្ន (RAM) ប្រហែលនឹងមានទំហំចាប់ពី 128GB ជាមួយទំហំ 8GB RAM ឡើងទៅ។
ចឹងនេះគឺជាព័ត៌មានបែកធ្លាយដំបូងបង្អស់ពីកំពូលស្មាតហ្វូន Sony Xperia ជំនាន់ថ្មី ហើយអ្វីដែលជាចំនុចទាក់ទាញបំផុតក្នុងព័ត៌មាននេះគឺប្រព័ន្ធកាមេរ៉ាខាងក្រោយដែលមានចំនួនរហូតដល់ទៅ 6 គ្រាប់របស់វាតែម្តង ហើយប្រសិនបើវាជាការពិតមែននោះដូច្នេះ FAN របស់ SONY XPERIA ពិតជាញញឹមទទួលយកដោយក្តីរីករាយបំផុតជាមួយស្មាតហ្វូនរបស់ក្រុមហ៊ុនបច្ចេកវិទ្យាយក្សលំដាប់ថ្នាក់ពិភពលោករបស់ប្រទេសជប៉ុនដែលនិយមផលិតស្មាតហ្វូនមិនចម្លងរចនាបថពីគេមួយនេះជាក់ជាមិនខាន៕