ពេលវេលាដែល Samsung បញ្ចេញកំពូលស្មាតហ្វូនជំនាន់ចុងក្រោយក្នុងស្រឡាយ Galaxy Note របស់ខ្លួនកាន់តែខិតជិតមកដល់ហើយគឺខ្ទង់ថ្ងៃទី 07 ខែក្រោយ (ខែសីហា) នេះបើ យោងតាមប្រភពព័ត៌មានផ្លូវការណ៍។ ហើយវាមិនខុសពីស្មាតហ្វូនស៊េរីថ្មីៗដទៃទៀតនោះទេគឺមុននឹងធ្វើការបង្ហាញចេញជាផ្លូវការណ៍លែងអីនឹងមានព័ត៌មានបែកធ្លាយជាបន្តបន្ទាប់ដែលបាននិយាយពីរូបរាង ការរចនា កំលាំងម៉ាស៊ីន ប្រព័ន្ធកាមេរ៉ា និងបច្ចេកវិទ្យាថ្មីៗដែលនឹងមានភ្ជាប់មកជាមួយវា។ ជារ៉ើយៗគេហទំព័រពិភពអេឡិចត្រូនិកយើងខ្ញុំតែងតែបានចុះផ្សាយនូវទម្រង់នៃការរចនារូបរាង ទំហំ និងលក្ខណៈអេក្រង់ ប្រព័ន្ធកាមេរ៉ា និងចំនុចផ្សេងៗជាច្រើនទៀតរបស់ Galaxy Note 10 Series ជាបន្តបន្ទាប់រួចមកហើយដែរ ដោយឡែកក្នុងពេលនេះយើងមានព័ត៌មានថ្មីមួយទៀតដែលបាននិយាយទាក់ទងនឹងកំលាំងម៉ាស៊ីនរបស់សែស្រឡាយ Galaxy Note 10 វិញម្តង។
យោងទៅលើរបាយការណ៍ថ្មីមួយបានបង្ហើបអោយដឹងថា Samsung Galaxy Note 10 ម៉ូដែល 5G នឹងមានអង្គផ្ទុកទិន្នន័យចាប់ពី 256GB ទៅ 512GB ហើយនឹងមានលទ្ធភាពអាចដាក់បន្ថែមទំហំផ្ទុកខាងក្រៅបានដល់ 1,000GB (1TB) ឯណោះ។ រីឯទំហំរ៉េមវិញគឺមានជម្រើសទៅតាមទំហំផ្ទុកសម្រាប់ម៉ូដែលនិមួយៗ។ ប៉ុន្តែវានឹងមានម៉ូដែល Galaxy Note 10-5G កំពូលជាងគេមួយទៀតដែលមានទំហំរ៉េមឡើងដល់ 12GB ជាមួយអង្គផ្ទុកទិន្នន័យស្រាប់ទំហំដល់ទៅ 1,000GB (1TB) ចេញពីក្នុងប្រអប់មកស្រាប់តែម្តង ហើយវានឹងជាកំពូលស្មាតហ្វូនដំបូងគេបង្អស់របស់ Samsung ដែលមានទំហំរ៉េម និងទំហំផ្ទុកក្នុងម៉ាស៊ីនធំដូចនេះ ខណៈដែល Samsung Galaxy S10-5G មានរ៉េមត្រឹមតែ 8GB និងអង្គផ្ទុកស្រាប់ក្នុងម៉ាស៊ីនអស់ត្រឹម 512GB ប៉ុណ្ណោះ។
សម្រាប់ម៉ូដែល Note 10-LTE អាចនឹងមានអង្គផ្ទុកទិន្នន័យចាប់ពី 128GB ឡើងទៅ និង Galaxy Note 10+ LTE នឹងមានទំហំផ្ទុកចាប់ពី 256GB ទៅ 1TB។ ប្រភពបានបន្តអោយដឹងទៀតថា “Samsung Galaxy Note 10 អាចនឹងមានម៉ូដែលខ្លះមានផ្ទៃខ្នងខាងក្រោយស្រោបដោយសារធាតុសេរ៉ាម៉ិច ប៉ុន្តែគេមិនច្បាស់ថាវាជាម៉ូដែល 5G ឬក៏ LTE នោះទេ ព្រោះថាស្រឡាយ Galaxy S10 គឺមានតែម៉ូដែល Galaxy S10+ ប៉ុណ្ណោះដែលផ្ទៃខាងក្រោយស្រោបដោយសារធាតុសេរ៉ាម៉ិច”។ សរុបមកទាំងនេះគ្រាន់តែជាព័ត៌មានបឋមមិនទាន់អាចយកជាការណ៍បាននោះទេ ប៉ុន្តែយើងអាចគិតទុកក្នុងចិត្តសិនបាន ហើយប្រសិនបើ Note 10-5G ពិតជាមានរ៉េមទំហំ 12GB និងអង្គផ្ទុកទិន្នន័យក្នុងម៉ាស៊ីន 1TB មែននោះចឹងតម្លៃរបស់វាក៏ខ្ពស់មិនធម្មតានោះដែរ ពោលគឺអាចមិនក្រោម $1,500 ដុល្លារនោះទេ៕