កាលពីពេលថ្មីៗនេះ ប្រធានផ្នែកគ្រប់គ្រងផលិតផលរបស់ក្រុមហ៊ុន vivo លោក Li Xiang ធ្លាប់លើកឡើងពីស្មាតហ្វូនស៊េរីថ្មីរបស់ខ្លួនដែលមានឈ្មោះថា vivo NEX 3 ដោយបានបញ្ជាក់ថា ស្មាតហ្វូននេះមានអេក្រង់ “Waterfall Screen” ដែលជាប្រភេទអេក្រង់ទឹកធ្លាក់ ដែលមានភ្ជាប់ជាមួយនឹងរន្ធដោតកាសស្តាប់ 3.5mm headphone jack និងការទ្រទ្រង់ទៅលើបច្ចេកវិទ្យា 5G ផងដែរ។ នៅពេលនេះ រូបភាពពិតប្រាកដរបស់ស្មាតហ្វូន vivo NEX 3 ក៏មានការបែកធ្លាយនៅលើអនឡាញផងដែរ ហើយវាក៏បង្ហាញនូវរូបភាពកាន់តែច្បាស់អំពីការឌីស្សាញទៅលើស្មាតហ្វូននេះ និងរូបភាព Render របស់ស្មាតហ្វូននេះ ក៏មានការបែកធ្លាយកាលពីពេលមុននេះផងដែរ។ មានការបង្ហាញថា ស្មាតហ្វូននេះនឹងប្រើប្រាស់នូវអេក្រង់ទឹកធ្លាក់ “Waterfall Screen” ប៉ុន្តែវាមិនកោងដូចអ្វីដែលបង្ហាញនៅលើរូបភាព Render នោះទេ។ បន្ថែមពីនេះទៀតនោះ ស្មាតហ្វូននេះ នៅតែមានគែមស៊ុមព័ទ្ធអេក្រង់ស្តើងមែនទែន ជាពិសេសនៅផ្នែកខាងលើ និងផ្នែកខាងក្រោមរបស់អេក្រង់ស្មាតហ្វូននេះ។
កាលពីមុនក្រុមហ៊ុននេះ ធ្លាប់បង្ហើបអំពីអេក្រង់របស់ស្មាតហ្វូននេះដែលមានកម្រិតជិតដល់ 100% ផងដែរ។ មើលទៅលើរូបភាពនេះ គឺមិនមានឃើញនូវ Notch នៅលើអេក្រង់របស់ស្មាតហ្វូននេះនោះទេ ដោយស្មាតហ្វូននេះប្រហែលជាភ្ជាប់ជាមួយនឹងកាមេរ៉ាផុសឡើងខាងមុខ និងបច្ចេកវិទ្យាកាមេរ៉ាក្រោមអេក្រង់ថែមទៀតផង។ ក្រុមហ៊ុនvivo ត្រូវគេរាយការណ៍ថា បានដោះស្រាយទៅលើបញ្ហានៃ “Window Effect” រួចហើយទៅលើបច្ចេកវិទ្យាសេនស័រកាមេរ៉ាក្រោមអេក្រង់រួចមកហើយ ដែលពិតជាអាចទៅរួចដែលនេះ នឹងប្រើប្រាស់នៅលើស្មាតហ្វូនត្រកូល Vivo NEX-series ជំនាន់ក្រោយនេះ។
នៅក្នុងអេក្រង់ Waterfall Screen នេះ គឺមានភាពកោងនៅផ្នែកគែមខាងឆ្វេង និងគែមផ្នែកខាងស្តាំដែលក្រុមហ៊ុនបច្ចេកវិទ្យានេះ អាចផ្តល់នូវកម្រិតអេក្រង់កាន់តែធំ និងគែមកាន់តែស្តើងបំផុតនោះ។ ស្មាតហ្វូននេះត្រូវគេរំពឹងថា នឹងប្រើប្រាស់ជាមួយនឹងបន្ទះឈីប Snapdragon 855 Plus។ ថ្មីៗនេះ លោក Li Xang ក៏បានធ្វើការចែករំលែកនូវរូបភាព Screenshot របស់ Homescreen នៃស្មាតហ្វូន vivo NEX 3 នេះផងដែរ ដែលមានការបង្ហាញនូវ 5G icons ចំនួន 2 នៅផ្នែកខាងលើខាងឆ្វេង និងខាងស្តាំរបស់វាផងដែរ។ មានការបញ្ជាក់ថា ស្មាតហ្វូន NEX 3 នេះ នឹងទ្រទ្រង់ទៅលើបច្ចេកវិទ្យា dual 5G connectivity ជាក់ជាមិនខាន។ នៅក្នុងខណៈពេលនេះ យើងនៅមិនទាន់ដឹងច្រើនអំពីស្មាតហ្វូនស៊េរីថ្មីនេះនៅឡើយទេ។ នៅក្នុងរបាយការណ៍ជាច្រើន បានបញ្ជាក់ថា ស្មាតហ្វូនស៊េរីថ្មីត្រកូល Vivo NEX series នេះ អាចនឹងបង្ហាញខ្លួននៅក្នុងប្រទេសចិននៅខែក្រោយនេះ។ នៅមិនទាន់មានការបញ្ជាក់អំពីកាលបរិច្ឆេទនៃការបង្ហាញស្មាតហ្វូននេះនៅឡើយទេ ប៉ុន្តែយើងរំពឹងទុកថា នឹងដឹងព័ត៌មានជាច្រើនទៀតរបស់ស្មាតហ្វូននេះនៅប៉ុន្មានសប្តាហ៍ខាងមុខនេះ៕