រហូតមកដល់ថ្ងៃនេះ ឃើញថា លោក Li Xiang ដែលជាអ្នកគ្រប់គ្រងទូទៅផ្នែកផលិតផលរបស់ក្រុមហ៊ុន vivo គឺពិតជាមមាញឹកមែនទែនក្នុងការទម្លាយនូវព័ត៌មានមួយចំនួនរបស់ស្មាតហ្វូនថ្នាក់ប្រណិត vivo NEX 3 ដែលជាស្មាតហ្វូន Flagship របស់ vivo នោះ។ ស្មាតហ្វូនត្រកូល NEX នេះ គឺពិតជាម៉ូឌែលគួរអោយចាប់អារម្មណ៍មែនទែន ដោយសារតែសមត្ថភាពរបស់វា គឺមិនចាញ់ស្មាតហ្វូនអេក្រង់ភ្លោះ vivo NEX 2 និង Vivo NEX ដែលបំពាក់នូវកាមេរ៉ាផុសដំបូងបំផុតរបស់ពិភពលោកនោះទេ។
ស្មាតហ្វូន NEX 3 ថ្មីនេះ គឺមានលក្ខណៈពិសេសជាងម៉ូដែលមុនៗ ដោយស្មាតហ្វូននេះ មានអេក្រង់កោងជាមួយនឹងកម្រិតអេក្រង់ស្ទើរតែពេញមួយតួខ្លួនរបស់វា ហើយអេក្រង់នេះ គឺមានឈ្មោះថា ‘waterfall screen’។ នៅពេលនេះ ក្រុមហ៊ុន vivo ហាក់ដូចជាត្រៀមខ្លួនរួចរាល់ហើយក្នុងការប្រកាសចេញស្មាតហ្វូននេះ នៅថ្ងៃច័ន្ទសប្តាហ៍ក្រោយនេះ។ នៅថ្ងៃនេះ គណនីនៅលើ Weibo របស់ក្រុមហ៊ុន vivo បានបង្ហោះនូវព័ត៌មានមួយថា “ជួបគ្នានៅថ្ងៃច័ន្ទ!” សម្រាប់គណនីរបស់ក្រុមហ៊ុន vivo ក៏ធ្វើការបង្ហោះនូវសារមួយទៀតថា “OK ជួបគ្នានៅសប្តាហ៍ក្រោយនេះ!” តាមរយៈការបង្ហោះនេះ ក្រុមហ៊ុននឹងរៀបចំនូវព្រឹត្តិការណ៍មួយនៅថ្ងៃច័ន្ទនេះ សម្រាប់ស្មាតហ្វូន NEX 3។ ស្មាតហ្វូននេះ អាចនឹងដាក់លក់នៅពាក់កណ្តាលខែកញ្ញាខាងមុខនេះ។
ស្មាតហ្វូន vivo NEX 3 ត្រូវបានគេបញ្ជាក់ថានឹងមានកម្រិតអេក្រង់ខ្ពស់បើធៀបជាមួយនឹងតួខ្លួនរបស់វាជាមួយនឹងអេក្រង់ waterfall display ដែលមានអេក្រង់គែមកោងសងខាង។ យ៉ាងណាមិញ គែមព័ទ្ធអេក្រង់របស់ស្មាតហ្វូនេះ មិនមែន 100% នោះទេ។ ពាក្យចចាមអារ៉ាមជាច្រើនបញ្ជាក់ថា ស្មាតហ្វូននេះ អាចនឹងមានកាមេរ៉ាក្រោមអេក្រង់ ស្របពេលដែលក្រុមហ៊ុន OPPO បានចេញមកឌឺដងថា ក្រុមហ៊ុននេះ នៅមិនទាន់ល្អឥតខ្ចោះនៅឡើយទេសម្រាប់បច្ចេកវិទ្យានេះ។ ស្មាតហ្វូន NEX 3 នេះ ត្រូវបានគេរំពឹងថា នឹងប្រើប្រាស់នូវបន្ទះឈីបថ្មី Snapdragon 855 Plus ជាមួយនឹងការទ្រទ្រង់ទៅលើបច្ចេកវិទ្យា 5G។ កាមេរ៉ាខាងក្រោយរបស់ស្មាតហ្វូននេះ នឹងមានរូបរាងជារង្វង់ថែមទៀត។ ស្មាតហ្វូននេះ នឹងមានភ្ជាប់ជាមួយនឹងរន្ធដោតកាសស្តាប់ដដែល ដែលខុសប្លែកពីស្មាតហ្វូន Flagships ក្នុងទីផ្សារបច្ចុប្បន្នដែលដកចេញនូវរន្ធដោតកាស៕
