លឺថា Apple iPad 2021 តម្លៃធូរថ្លៃដែលត្រៀមចេញនៅដើមឆ្នាំក្រោយនេះនឹងមានអេក្រង់ធំជាងមុន កំលាំងម៉ាស៊ីនខ្លាំងជាងមុន រួមនឹងតម្លៃធូរថ្លៃជាងមុន..!

ក្រុមហ៊ុន Apple បានប្រកាសចេញ iPad ធុនបង្គួរស៊េរីថ្មីរបស់ខ្លួនដែលជាជំនាន់ទី 8 គឺ iPad 10.2 (2020) កាលពីកំឡុងខែកញ្ញា ឆ្នាំ 2020 ជាមួយនឹងនឹងកំពូល iPad Air (2020)។ ដោយឡែកបន្ទាប់ពីបានប្រកាសចេញ និងដាក់លក់ផ្លូវការណ៍រយះពេលជាង 3 ខែមកនេះ ស្រាប់តែថ្មីៗនេះយើងក៏ទទួលបានដំណឹងថ្មីលេចលឺមកទៀតថា Apple គ្រោងបញ្ចេញ iPad ធុនបង្គួរដែលជាជំនាន់ទី 9 នៅដើមឆ្នាំ 2021 ខាងមុខនេះ។ ដោយប្រភពព័ត៌មានថ្មីនេះត្រូវបានបញ្ចេញដោយគណនីធ្វីស្ទ័រឈ្មោះថា Tron  (@cozyplanes)។ 

បើតាមរយះព័ត៌មានដែលបានសរសេរបង្ហោះនៅលើគណនីរបស់បុគ្គលរូបនេះបានបង្ហាញអោយយើងដឹងថា iPad ជំនាន់ថ្មីដែល Apple ត្រៀមប្រកាសចេញនោះនឹងបង្កើនទំហំអេក្រង់ធំជាងមុនឡើងដល់ 10.5 អ៊ីញធំជាងជំនាន់មុន 0.3 អ៊ីង និងជាបន្ទះបង្ហាញ Retina Display ដដែល។ បន្ថែមពីនេះវាក៏ត្រូវបានបង្កើនកំលាំងម៉ាស៊ីនខ្លាំងជាងជំនាន់មុនដោយរត់នៅលើបន្ទះឈីប A13 Bionic ភ្ជាប់ដោយរ៉េមទំហំ 4GB ថែមទៀតផង ដោយជំនាន់មុនគឺប្រើឈីប A12 Bionic និងមានរ៉េមទំហំ 3GB។ ប្រភពដដែលបញ្ជាក់ទៀតថាសម្រាប់ការរចនារបស់ iPad 2021 ដែលជាជំនាន់ទី 9 នឹងមានការកែប្រែខុសពីជំនាន់ទី 8 ជាមួយនឹងកម្រាស់ស្តើងជាង និងទំងន់ស្រាលជាង។ 

យ៉ាងណាមិញប្រសិនបើពិតដូចអ្វីដែលប្រភពព័ត៌មានបានលើកឡើងមែននោះ គឺមានន័យថា Apple បានទាញយករចនាបថពី iPad Air ស៊េរីឆ្នាំ 2019 ដែលមានអេក្រង់ទំហំ 10.5 អ៊ីញមកប្រើនៅលើ iPad មានតម្លៃធូរថ្លៃជំនាន់ 9 ស៊េរីឆ្នាំ 2021 របស់ខ្លួនឡើងវិញ។ ជាងនេះទៅទៀតប្រភពក៏បានប្រាប់អោយដឹងថា iPad 10.5 ជំនាន់ថ្មីក៏មានភ្ជាប់នូវរង្វង់ប៊ូតុង Home ដែលទ្រទ្រង់មុខងារ Touch ID ថែមទៀតផង។ ហើយអ្វីដែលគួរអោយចាប់អារម្មណ៍ខ្លាំងត្រង់ថា iPad 10.5 (2021) គឺមានតម្លៃខ្ទង់ $299 ឡើងទៅ នេះបើតាមការសរសេរបញ្ជាក់នៅលើគណនីធ្វីស្ទ័រដដែល ដូច្នេះបើយើងធៀបនឹងតម្លៃតម្លៃជំនាន់ទី 8 ដែល Apple បានចេញលក់គឺតម្លៃខ្ទង់ $329 គឺធូរថ្លៃជាង។ ប្រភពដដែលក៏បានបញ្ជាក់បន្ថែមថាសម្រាប់ iPad 10.5 (2021) ក៏នឹងមានម៉ូដែល 64GB ផងដែរ។

ដូចនេះសរុបមក…តើប្រិយមិត្តយល់យ៉ាងណាសម្រាប់ព័ត៌មានដែលបានលើកឡើង និងតម្លៃរបស់ iPad ជំនាន់ថ្មីស៊េរីឆ្នាំ 2021 ហើយតើវាពិតដែរ ឬទេ ដែល Apple ចាំបាច់ត្រូវទម្លាក់តម្លៃសម្រាប់ផលិតផលថ្មីរបស់ខ្លួន ព្រោះថាវាបានកែប្រែបង្កើនទំហំអេក្រង់ធំជាងមុន ជាមួយការរចនារូបរាងថ្មី ភ្ជាប់នូវកំលាំងម៉ាស៊ីនខ្លាំង និងទំហំរ៉េមធំជាងមុនទៀតផងនោះ។  យ៉ាងណាមិញទាំងអស់នេះគ្រាន់តែជាការលើកឡើងតាមរយះព័ត៌មានចចាមអារាមតែប៉ុណ្ណោះ អ្វីដែលច្បាស់ផ្លូវការណ៍គឺនៅថ្ងៃដែលឧបករណ៍ជំនាន់ថ្មីនេះបង្ហាញខ្លួនលើទីផ្សារផ្លូវការណ៍ ដូច្នេះតទៅមុខយើងនឹងតាមដានជាបន្តពីការវិវត្តន៍សម្រាប់ព័ត៌មានទាក់ទងនឹង Entry-Level iPad 2021 របស់ Apple រហូតដល់ថ្ងៃក្រុមហ៊ុនប្រកាសចេញផ្លូវការណ៍តែម្តង៕