កាលពីកំឡុងខែកក្តដា ឆ្នាំ 2020 ក្រុមហ៊ុន Corning បានបញ្ចេញបន្ទះកញ្ចក់ការពារអេក្រង់ទូរស័ព្ទជំនាន់ថ្មីហៅថា Gorilla Class Victus ដែលមានភាពធន់ជាងជំនាន់ Gorilla Class 6 ហើយបច្ចេកវិទ្យាការពារអេក្រង់ថ្មីនេះត្រូវបានប្រើលើកដំបូងនៅលើកំពូលស្មាតហ្វូន Samsung Galaxy Note 20 Ultra ជាមួយនឹងបច្ចេកវិទ្យាស្កែនក្រយ៉ៅម្រាមដៃ 3D Ultrasonic Sensor ជំនាន់ទី 1 ដែលប្រើនៅលើ Galaxy S10 Series។
ទោះជាយ៉ាងណាដើម្បីបន្ទាន់សម័យនៃបច្ចេកវិទ្យាថ្មីអោយសមស្របទៅនឹងបច្ចេកវិទ្យាអេក្រង់ថ្មីរបស់ Corning ក្រុមហ៊ុន Qualcomm ក៏បានបញ្ចេញនៅបច្ចេកិវទ្យាស្កែនក្រយ៉ៅម្រាមដៃក្រោមអេក្រង់ជំនាន់ទី 2 របស់ខ្លួនដែលមានឈ្មោះថា 3D Sonic Sensor Gen 2 ជាមួយនឹងការបង្កើនលទ្ធភាពធ្វើការបានកាន់តែល្អប្រសើរឡើងជាងជំនាន់មុនដោយក្នុងនោះមានដូចជាការបង្កើនផ្ទៃក្រឡានស្កែនធំជាងមុន និងល្បឿនស្កែនលឿនជាងមុន។
បើតាមការបញ្ជាក់ពី Qualcomm ផ្ទាល់បានអោយដឹងថាសម្រាប់បច្ចេកវិទ្យាស្កែនក្រយ៉ៅម្រាមដៃដោះសោរក្រោមផ្ទៃអេក្រង់ជំនាន់ថ្មី 3D Sonic Sensor 2 មានការពង្រីកផ្ទៃស្កែនធំជាងមុនក្នុងកម្រិតផ្ទៃក្រឡាទំហំ 8x8 mm បើធៀបនឹងជំនាន់ទី 1 ដែលមានផ្ទៃក្រឡាស្កែនទំហំ 4x9mm ដែលធ្វើអោយបច្ចេកវិទ្យាជំនាន់ថ្មីនេះមានផ្ទៃស្កែនធំជាងមុន 77%។ ជាមួយផ្ទៃស្កែនធំជាងមុននេះគឺពិតជាផ្តល់អោយអ្នកប្រើប្រាស់មានលទ្ធភាពស្កែនបានស្រួលជាងមុន និងលឿនរហ័សជាងមុន។ Qualcomm បានបញ្ជាក់បន្ថែមទៀតថា សម្រាប់ល្បឿនស្កែនដោះសោរជាមួយនឹងបច្ចេកវិទ្យា 3D Sonic Sensor Gen 2 គឺលឿនជាងមុន 50 % បើធៀបនឹងបច្ចេកវិទ្យាជំនាន់ទីមួយ 3D Ultrasonic Sensor Gen 1។
សូមរំលឹងផងដែរថា Qualcomm បានប្រកាសចេញបច្ចេកវិទ្យាស្កែនក្រយ៉ៅម្រាមដៃលើអេក្រង់ទូរស័ព្ទ 3D Ultrasonic Sensor ដំបូងរបស់ខ្លួនក្នុងឆ្នាំ 2018 ហើយស្មាតហ្វូនដំបូងដែលប្រើបច្ចេកវិទ្យានេះគឺ Samsung Galaxy S10 Series។ ហើយនឹងជិតដំណាច់ឆ្នាំ 2019 ក្រុមហ៊ុន Qualcomm ក៏បានបញ្ចេញជំនាន់ថ្មីដែលជាកំនែប្រែថ្មីបន្ទាប់នៃបច្ចេកវិទ្យាស្កែនរបស់ខ្លួនហៅថា 3D Sonic Max ដែលមានផ្ទៃស្កែនធំជាងជំនាន់ទី 1 ជាមួយផ្ទៃក្រឡាទំហំ 20x30mm។ យ៉ាងណាមិញសម្រាប់បច្ចេកវិទ្យាស្កែនក្រយ៉ៅម្រាមដៃក្រោមអេក្រង់ជំនាន់ថ្មី 3D Sonic Sensor Gen 2 នេះ នឹងមានប្រើនៅលើស្មាតហ្វូនដំបូងដែលនឹងបង្ហាញខ្លួនឆាប់ៗនាដើមឆ្នាំ 2021 នេះ។ ទោះជាយ៉ាងណា Qualcomm មិនបានបញ្ជាក់ថាស្មាតហ្វូនរបស់ក្រុមហ៊ុនណាមួយដែលនឹងត្រូវប្រើបច្ចេកវិទ្យាសុវត្ថិភាពជំនាន់ថ្មីរបស់ខ្លួននោះទេ ប៉ុន្តែ ច្បាស់ណាស់ថាកំពូលស្មាតហ្វូនជំនាន់ថ្មី Samsung Galaxy S21 Series ដែលត្រូវបានគេដឹងថានឹងមកដល់នៅថ្ងៃទី 14 ក្នុងខែមករា ឆ្នាំ 2021 នេះនឹងភ្ជាប់ប្រើប្រាស់បច្ចេកវិទ្យា 3D Sonic Sensor Gen 2៕
