នៅក្នុងព្រឹត្តិការណ៍ CES 2021 នេះ ក្រុមហ៊ុន Samsung បានបង្ហាញនូវវីដេអូជាច្រើន ដែលក្នុងនោះ ក៏មានកម្មវិធី Galaxy Upcycling ផងដែរ។ អ្វីដែលគួរអោយភ្ញាក់ផ្អើលនោះ នៅលើវីដេអូនេះ គឺមានការផ្តោតទៅលើស្មាតហ្វូនជំនាន់ថ្មី បើទោះបីជាមិនទាន់មានការបញ្ជាក់ជាផ្លូវការណាមួយដោយក្រុមហ៊ុនបច្ចេកវិទ្យាយក្សរបស់កូរ៉េខាងត្បូងក៏ដោយ ក៏គេដឹងថា ស្មាតហ្វូន នេះ គឺជាស្មាតហ្វូន Galaxy Note 21 Ultra។
ទាក់ទងនឹងព័ត៌មាននេះ នៅលើវេបសាយ LetsGoDigital ក៏មានការបញ្ជាក់អំពីស្មាតហ្វូនដែលស្ថិតនៅក្នុងវីដេអូនេះផងដែរ។ ស្មាតហ្វូននេះ គឺមិនមានកាមេរ៉ាទម្លុះអេក្រង់នោះទេ។ ស្មាតហ្វូននេះ នឹងមានកាមេរ៉ាខាងក្រោមអេក្រង់ ដែលក្រុមហ៊ុន Samsung កំពុងតែធ្វើការអភិវឌ្ឍទៅលើបច្ចេកវិទ្យានេះ។ ប្រភពដដែលនេះ បានបញ្ជាក់ថា យើងនឹងឃើញនូវការឌីស្សាញរូបរាងរបស់ស្មាតហ្វូន Galaxy Note 21 Ultra ឆាប់ៗនេះ ដែលស្មាតហ្វូននេះ ដែលមានអេក្រង់គែមមូលខណៈពេលដែលស្មាតហ្វូន Galaxy Note 21 នឹងមានអេក្រង់រាបស្មើដូចទៅនឹងស្មាតហ្វូន Galaxy Note 20 កាលពីឆ្នាំមុននេះផងដែរ។
នៅក្នុងរយៈពេលប៉ុន្មានឆ្នាំមុននេះ យើងក៏ធ្លាប់បានឃើញនូវស្មាតហ្វូនដែលមានអេក្រង់ពេញគែមផងដែរ។ ចាប់ពីស្មាតហ្វូនដែលមានអេក្រង់ Notch នោះ ទៅកាន់អេក្រង់ Punch-Hole នោះ វានៅមិនទាន់មានស្មាតហ្វូនដែលមានអេក្រង់ពេញគែមនោះទេ។ យើងអាចមើលទៅលើស្មាតហ្វូន ZTE Axon 20 ប៉ុន្តែបច្ចេកវិទ្យាកាមេរ៉ាខាងក្រោមអេក្រង់នេះ គឺមានបញ្ហាមួយចំនួនផងដែរ។ យើងបានដឹងថា ក្រុមហ៊ុន Xiaomi និងក្រុមហ៊ុនផលិតស្មាតហ្វូនជាច្រើនទៀត គឺធ្វើការនៅលើបច្ចេកវិទ្យាកាមេរ៉ាខាងក្រោមអេក្រង់។ យើងនឹងឃើញស្មាតហ្វូនជាច្រើនដែលមានបច្ចេកវិទ្យានេះ៕