យោងតាមរបាយការណ៍ថ្មីរបស់ក្រុមហ៊ុន IDC បានបង្ហាញថា Apple បាននាំមុខនៅក្នុងទីផ្សារថេប្លេតនៅក្នុងឆ្នាំ 2020 នេះ

ថ្មីៗនេះ ក្រុមហ៊ុន International Data Corporation (IDC) បានបញ្ចេញនូវរបាយការណ៍ថ្មីមួយនៃការនាំចេញថេប្លេតសម្រាប់ទីផ្សារសកលមួយនៅក្នុងឆ្នាំ 2020 កន្លងទៅនេះ។ នៅក្នុងទិន្នន័យខាងលើនេះ បានបង្ហាញថា ក្រុមហ៊ុន Apple គឺនាំមុខគេនៅលើទីផ្សារថេប្លេតដែលមានចំណែកទីផ្សារចំនួន 32.5% នៅក្នុងឆ្នាំ 2020 ជាមួយនឹងនាំចេញថេប្លេតបានចំនួន 53.2 លានគ្រឿងដែលមានការកើនឡើងចំនួន 6.7% បើធៀបទៅនឹងឆ្នាំមុន។ ទោះបីជាវាមានការកើនឡើងយឺត ក៏ដោយនោះ ក្រុមហ៊ុននេះស្ថិតនៅក្នុងចំណាត់ថ្នាក់លេខរៀងទី 1 ដដែល ជាមួយនឹងមានចំណែកទីផ្សារធំជាងគេ។

ក្រុមហ៊ុន Samsung ត្រូវបានគេមើលឃើញថា បានជាប់ចំណាត់ថ្នាក់លេខ 2 ដែលមានចំណែកទីផ្សារចំនួន 19.1% បើធៀបទៅនឹងឆ្នាំមុននេះ គឺមានការកើនឡើងចំនួន  44.9% ហើយវាមានការនាំចេញចំនួន 31.3 លានគ្រឿងផងដែរ។ ក្នុងនាមជាក្រុមហ៊ុនផលិតថេប្លេត Android ដែលធំបំផុតនោះ ក្រុមហ៊ុន Samsung គឺមានផលិតផលជាច្រើនដែលក្នុងនោះមានដូចជា Galaxy Tab និង Galaxy Tab S6 Lite។

និយាយពីក្រុមហ៊ុន Huawei វិញ បើទោះបីជាមានការនាំចេញមិនច្រើន ដោយសារតែការដាក់ទណ្ឌកម្មក៏ដោយនោះ ក្រុមហ៊ុននេះ គឺមានការនាំចេញបានរឹងមាំជាងគេចំនួន 16 លានគ្រឿង ដែលមានចំណែកទីផ្សារចំនួន 9.8% និងការកើនឡើងបើធៀបទៅនឹងឆ្នាំមុននេះគឺ 66.4% ផងដែរ។ តាមទិន្នន័យដដែលនេះ បានបន្តថា Apple និង Huawei គឺគ្រប់គ្រងទៅលើទីផ្សារថេប្លេតក្នុងស្រុករៀងៗខ្លួន។ 

ក្រុមហ៊ុន Apple ជាប់ចំណាត់ថ្នាក់លេខ 1 ដែលមានចំណែកទីផ្សារចំនួន 39.8% ខណៈពេលដែលក្រុមហ៊ុន Huawei ជាប់លេខ 2 មានចំណែកទីផ្សារចំនួន 35.1%។ តាមការបញ្ជាក់របស់លោក Guo Tianxiang អ្នកវិភាគជាន់ខ្ពស់របស់ក្រុមហ៊ុន IDC នៅក្នុងប្រទេសចិនបញ្ជាក់ថា ការកើនឡើងនូវទីផ្សារថេប្លេតនៅក្នុងប្រទេសចិនសម្រាប់ឆ្នាំ 2020 កន្លងទៅនេះ គឺទាបជាងទីផ្សាររបស់ពិភពលោក៕