នៅថ្ងៃនេះ លោក Ni Fei ដែលជាអនុប្រធានរបស់ក្រុមហ៊ុន nubia បញ្ជាក់ថា ស្មាតហ្វូន Red Magic 6 នឹងបង្ហាញខ្លួននៅថ្ងៃទី 4 ខែមីនានេះខាងមុខនេះ នៅក្នុងប្រទេសចិន គឺនៅចំថ្ងៃដែលក្រុមហ៊ុន realme បង្ហាញនូវស្មាតហ្វូន realme GT 5G តែម្តង គឺគ្រាន់តែខុសម៉ោងគ្នាតែប៉ុណ្ណោះ ដោយព្រឹត្តិការណ៍នៃការសម្ភោធន៍របស់ក្រុមហ៊ុន realme នឹងចាប់ផ្តើមនៅវេលាម៉ោង 2PM ដែលព្រឹត្តិការណ៍របស់ក្រុមហ៊ុន nubia គឺចាប់ផ្តើមនៅវេលាម៉ោង 7PM។ សូមជំរាបផងដែរថា មុននឹងមានការប្រកាសនេះ គឺរូបភាព Red Magic 6 របស់ក្រុមហ៊ុនផលិតស្មាតហ្វូនរបស់ចិន nubia បានបង្ហាញចេញតាំងពីឆ្នាំមុនមកម្លេះ។
នៅក្នុងការបង្ហោះរបស់ Weibo នោះ លោក Fei បាននិយាយថា ស្មាតហ្វូន Red Magic 6 នឹងមានបច្ចេកវិទ្យាដែលលឿនបំផុតចំនួន 4។ នៅក្នុងរូបភាពនេះ គឺមានការបង្ហាញនូវ icons ចំនួន 4 នៅក្រោមរថយន្តប្រណាំងដែលនោះគឺផ្តោតទៅលើអេក្រង់ HRR បច្ចេកវិទ្យាសាកថ្មលឿនការ Touch Response កាន់តែល្អជាងមុន និងបច្ចេកវិទ្យាត្រជាក់ថែមទៀតផង។
ក្រុមហ៊ុន nubia ក៏បាននិយាយអំពីបច្ចេកវិទ្យា 120W Charging និងថាមពលថ្ម 4,500 mAh ផងដែរ។ ស្មាតហ្វូន Red Magic 6 នឹងមានបច្ចេកវិទ្យាសាកថ្ម 66W។ ក្រុមហ៊ុនបច្ចេកវិទ្យាយក្សរបស់ចិននេះ ក៏បានចែករំលែកនូវវីដេអូមួយនៅខែនេះដែលមានការបង្ហាញអំពីប្រព័ន្ធត្រជាក់របស់ស្មាតហ្វូន Red Magic 6 នេះ ផងដែរ។ នៅសល់ 2 សប្តាហ៍ទៀតប៉ុណ្ណោះ នៅមុនពេលដែលស្មាតហ្វូននេះជាផ្លូវការនោះ៕
