កាស Apple AirPods 3 អាចនឹងប្តូររចនាបថថ្មីខុសពីជំនាន់មុន ហើយក៏នឹងទ្រទ្រង់មុខងារ ANC ដូច AirPod Pro ទៀតផង

ក្រុមហ៊ុន Apple មានភាពជោគជ័យខ្លាំងសម្រាប់ទីផ្សារកាសស្តាប់ត្រចៀកឥតប្រើខ្សែគឺ AirPods Series នេះឯង ហើយសម្រាប់ការ AirPods Series ពេលនេះក៏ក្លាយជាផលិតផលដែលមានទីផ្សារលក់ល្អបំផុតរបស់ក្រុមហ៊ុនថែមទៀតផង។ ព្រមគ្នាជាមួយនឹងភាពជោគជ័យសម្រាប់កាសស្តាប់ Wireless earphone នេះ Apple ក៏នឹងបញ្ចេញនូវកាសស្តាប់ AirPods ជំនាន់ថ្មីបន្ថែមទៀតក្នុងពេលឆាប់ៗនេះផងដែរ។ ហើយមួយរយះពេលកន្លងមកនេះមានប្រភពព័ត៌មានជាច្រើនបានធ្វើការចុះផ្សាយពីកាស AirPods ជំនាន់ថ្មីដែលជាជំនាន់ទីបីរបស់ Apple ឬហៅថា AirPods 3 មិនដាច់សោះឡើយ។ 

យ៉ាងណាមិញបើតាមរូបភាពបែកធ្លាយចេញមកចុងក្រោយនេះបានបង្ហាញថា AirPods 3 របស់ Apple គឺមានការកែប្រែលើការឌីស្សាញរូបរាងថ្មីខុសពីជំនាន់ AirPods 2  និយាយទៅ គឺការឌីស្សាញដូចក្នុងរូបភាពនេះគឺស្រដៀងគ្នាច្រើននឹង AirPods Pro។ ក្នុងនោះយើងឃើញថា វាមានភ្ជាប់ជាមួយនឹងស្រោបចុងកាស (ear tips) ជាជ័រទន់ពណ៌ស(ស៊ីលីកូន) ដូចនៅលើ AirPod Pro ដែរ  ហើយដងនៃកាសក៏ខ្លីជាងមុន និងស្នាមសែនស័រពណ៌ខ្មៅក៏មានសណ្ឋានវែងជាងមុនបន្តិច សូម្បីតែប្រអប់សាកថ្មរបស់វាក៏មានទម្រង់ខុសពីជំនាន់មុនផងដែរគឺប្រហាក់ប្រហែលគ្នាច្រើននឹងប្រអប់ AirPods Pro ជាមួយទទឹងរាងលូតវែងជាងមុន និងបណ្តោយខ្លីជាងមុនជាមួយនឹងភ្លើង LED Light មួយនៅពីមុខប្រអប់ផងដែរ។ ហើយប្រអប់របស់ AirPods 3 ត្រូវបានគេរំពឹងថា អាចនឹងទ្រទ្រង់ការសាកភ្លើងដោយមិនប្រើខែ្ស (wireless charge) ថែមទៀតផង។

 ជាងនេះទៅទៀតបើតាមប្រភពពី 52Audio បានបង្ហើបអោយដឹងថា AirPods 3 កាសឥតខ្សែជំនាន់ថ្មីរបស់ Apple នឹងទ្រទ្រង់នូវមុខងារទប់សំឡេងរំខាន ANC (Active Noise Cancelling) ដូច AirPods Pro ដែរ ដោយផ្ទុយពីប្រភពមួយចំនួនថាកាស AirPods 3 គឺមិនទ្រទ្រង់មុខងារនេះឡើយ។ ហើយកាសស្តាប់ជំនាន់ថ្មីជំនាន់ទី 3 នេះ ត្រូវបានគេប៉ាន់ប្រមាណថានឹងមានតម្លៃខ្ទង់ $200។ ជាចុងក្រោយក្រុមហ៊ុន Apple ត្រូវបានគេរំពឹងថា នឹងប្រកាសចេញកាសស្តាប់ជំនាន់ថ្មី AirPods 3 ព្រមគ្នាជាមួយ AirPods Pro 2 ក្នុងឆមាសដំបូងនាឆ្នាំ 2021 នេះ៕