ចាប់តាំងពីមានការហាមប្រាមទៅលើក្រុមហ៊ុនបច្ចេកវិទ្យាយក្ស Huawei ពីសំណាក់មហាមអំណាចសហរដ្ឋអាមេរិកមក ក្រុមហ៊ុនផលិតស្មាតហ្វូនជាច្រើនរបស់ចិន បានប្រកួតប្រជែងគ្នា ដើម្បីទទួលបាននូវផលប្រយោជន៍ពីក្រុមហ៊ុននេះ។ ជាលទ្ធផល ក្រុមហ៊ុន OPPO បានក្លាយជាម៉ាកយីហោស្មាតហ្វូនដែលធំបំផុតនៅក្នុងប្រទេសចិននៅក្នុងខែមករា ឆ្នាំ 2021 នេះផងដែរ។ នៅពេលនេះ ការបែកធ្លាយថ្មីមួយទម្លាយថា ក្រុមហ៊ុន Xiaomi បានក្លាយជាម៉ាកយីហោស្មាតហ្វូនធំបំផុតរបស់ចិននៅក្នុងខែកុម្ភៈ ឆ្នាំ 2021នេះ។
តាមការបញ្ជាក់របស់ក្រុមហ៊ុន Counterpoint Research បានអោយដឹងថា ចំណែកទីផ្សាររបស់ក្រុមហ៊ុន Xiaomi គឺមានចំនួន 13% នៅក្នុងខែកុម្ភៈនេះ។ ពេលនេះក្រុមហ៊ុនបច្ចេកវិទ្យានេះ បានក្លាយជាម៉ាកយីហោស្មាតហ្វូនរបស់ចិនធំបំផុតចំណាត់ថ្នាក់ទី 3 របស់ពិភពលោកផងដែរ។ ក្រុមហ៊ុនចំណាត់ថ្នាក់ទី 1 នោះ គឺក្រុមហ៊ុន Samsung ដែលមានចំនែកទីផ្សារចំនួន 20% និងក្រុមហ៊ុន Apple មានចំណែកទីផ្សារចំនួន 17% ។ ក្រុមហ៊ុន Huawei មានការធ្លាក់ចុះទៅលើទីផ្សារសកលចំនួន 4% ។
ក្រុមហ៊ុន Strategy Analytics កាលពីប៉ុន្មានថ្ងៃមុននេះ បានព្យាករណ៍ថា ក្រុមហ៊ុន Xiaomi នឹងក្លាយជាម៉ាកយីហោស្មាតហ្វូនចំណាត់ថ្នាក់ទី 3 ធំបំផុតរបស់ពិភពលោកនៅក្នុងឆ្នាំ 2021 នេះ។ ក្រុមហ៊ុន Xiaomi គឺមានភាពល្បីល្បាញដោយសារតែស្មាតហ្វូនដែលមានតម្លៃសមរម្យជាច្រើនរបស់វា។ ប៉ុន្តែចាប់តាំងពីមានការហាមប្រាមពីក្រុមហ៊ុន Huawei នោះ ក្រុមហ៊ុននេះក៏ចាប់ផ្តើមបញ្ចេញនូវស្មាតហ្វូនប្រណិតជាច្រើនរបស់ខ្លួនទៅកាន់ទីផ្សារសកលផងដែរ៕