ក្រុមហ៊ុន Apple ត្រូវបានគេរាយការណ៍មកថា បាននឹងកំពុងធ្វើការលើទូរទស្សន៍ឆ្លាតវៃជំនាន់ថ្មីរបស់ខ្លួន ដែលត្រៀមបង្ហាញខ្លួននៅថ្ងៃណាមួយក្នុងឆ្នាំ 2021 នេះ ហើយសម្រាប់ឧបករណ៍ Set-Top Box ជំនាន់ថ្មីរបស់ Apple TVs នឹងមានសមត្ថភាពបង្ហាញមាតិការូបភាព-វីដេអូចេញកម្រិត 4K 120Hz។ ការលើកឡើងដូច្នោះគឺផ្អែកទៅលើភស្តុតាងដែលបានបង្ហាញនៅលើកូដរបស់ប្រតិបត្តិការ tvOS14.5 Beta ដែលចុះផ្សាយដោយគេហទំព័រ 9to5Mac កាលពីពេលថ្មីៗនេះ។
.jpg)
នៅលើបញ្ចីភាសាកូដ បានសរសេរថា "120Hz and "supports120Hz." ត្រូវបានគេប្រទះឃើញនៅលើ PineBoard នៅលើ Apple TV Interface របស់ក្រុមហ៊ុន Apple ផ្ទាល់តែម្តង។ ជាមួយនឹងភស្តុតាងកូដដែលបានបែកធ្លាយមកនេះ ត្រូវបានគេសន្និដ្ឋានថា Apple កំពុងធ្វើការតេស្តសាកល្បងកម្រិត refresh rate 120Hz សម្រាប់អេក្រង់ទូរទស្សន៍ឆ្លាតវៃជំនាន់ថ្មីរបស់ខ្លួន។
ជាងនេះទៅទៀតបើតាមប្រភពបានបញ្ជាក់ថាសម្រាប់ ឧបករណ៍ Set-Top Box ជំនាន់ថ្មីរបស់ New Apple TV នឹងភ្ជាប់ដោយរន្ធ HDMI2.1 ដែលជាជំនាន់ថ្មីមានសមត្ថភាពបញ្ចូនមាតិការូបភាព-វីដេអូកម្រិត 4K ជាមួយល្បឿន refresh rate 120Hz ខណៈ HDMI2.0 ដែលប្រើនៅលើ Set-Top Box របស់ Apple TV បច្ចុប្បន្នគឺមានលទ្ធភាពបញ្ចូនមាតិការូបភាព-វីដេអូកម្រិត 4K ជាមួយល្បឿន refresh rate ត្រឹម 60Hz។
បច្ចុប្បន្នទីផ្សារទូរទស្សន៍ឆ្លាតវៃដែលមានអេក្រង់គាំទ្រកម្រិត refresh rate 120Hz ភាគច្រើនគឺត្រូវបានអ្នកទិញប្រើសម្រាប់ការលេងហ្គេម ព្រោះថាម៉ាស៊ីនលេងហ្គេមជំនាន់ថ្មីចុងក្រោយដូចជា Xbox Series និង PlayStation 5 គឺប្រើប្រាស់រន្ធ HDMI2.1 ដែលមានសមត្ថភាពបញ្ចូនមាតិកាហ្គេមដល់កម្រិត 4K ជាមួយល្បឿន refresh rate 120Hz។
ទោះជាយ៉ាងណាគេមិនទាន់ដឹងទេថា Apple នឹងប្រកាសចេញទូរទស្សន៍ឆ្លាតវៃជំនាន់ថ្មីរបស់ខ្លួនចូលមកកាន់ទីផ្សារនៅពេលណានោះទេ ប៉ុន្តែ បើតាមប្រភពព័ត៌មានចចាមអារាមបាននិយាយថា Apple TV ជំនាន់ថ្មីនឹងបំពាក់នូវឈីបខ្លាំងជាងមុន រួមទាំងមានការឌីស្សាញឧបករណ៍បញ្ជាថ្មី (new remote) ផងដែរ។ ប្រភពមួយចំនួនទៀតបាននិយាយថា Apple មានគម្រោងក្នុងការនាំយកទូរទស្សន៍ឆ្លាតវៃជំនាន់ថ្មីដែលមានអេក្រង់ទ្រទ្រង់កម្រិត refresh rate 120Hz ដើម្បីផ្តល់ជូននូវបទពិសោធន៍ថ្មីសម្រាប់ការលេងហ្គេម ហើយជាមួយអេក្រង់ 120Hz នឹងអនុញ្ញាតិអោយ New Apple TV ប្រតិបត្តិការកាន់តែរលូនល្អបំផុតជាមួយនឹងម៉ាស៊ីនហ្គេមជំនាន់ថ្មីៗចុងក្រោយ៕
