WhatsApp កំពុងសាកល្បងមុខងារថ្មីដើម្បីផ្តល់លទ្ធភាពដល់អ្នកប្រើប្រាស់ក្នុងការផ្លាស់ប្តូរផ្ទេរទិន្នន័យគណនីពីឧបករណ៍ iOS ទៅកាន់ Android

ក្រុមហ៊ុន WhatsApp បាននឹងកំពុងតេស្តសាកល្បងមុខងារថ្មីដែលអនុញ្ញាតិអោយអ្នកប្រើប្រាស់អាចធ្វើការផ្ទេរទិន្នន័យគណនីដូចជា ប្រវត្តិនៃការផ្ញើសារទំនាក់ទំនង, Logs និង Transcripts របស់ពូកគេបានពីឧបករណ៍ iOS ទៅកាន់ Android ដើម្បីផ្តល់នូវភាពងាយស្រួលដល់ពូកគេក្នុងការផ្ទេរទិន្នន័យគណនីទៅវិញទៅមករវាងឧបករណ៍ទាំងពីរនេះ។ សម្រាប់មុខងារថ្មីរបស់ WhatsApp នឹងមានដាក់អោយប្រើនៅពេលខាងមុខ គឺកំពុងស្ថិតនៅក្នុងដំណាក់កាលដំបូងនៃការអភិវឌ្ឍន៍ នេះបើតាមការបញ្ជាក់ពីបណ្តាញ WABetaInfor ដែលជាញឹកញាប់តែងតែធ្វើការចែករំលែកពីលក្ខណៈពិសេសៗដែលមិនធ្លាប់មាន និងលាក់បាំងនៅពីក្រោយសេវាកម្មជជែកកម្សាន្តមួយនេះ។

បើតាមអ្នកជំនាញកម្មវិធី WhatsApp បាននិយាយថា សម្រាប់អនាគតមុខងារថ្មីនេះ គឺអនុញ្ញាតិអោយអ្នកប្រើមានភាពងាយស្រួលក្នុងការផ្ទេរទិន្នន័យគណនីរបស់ពូកគេពីឧបករណ៍ iOS ទៅកាន់ឧបករណ៍  Android និង Vice Versa ប៉ុន្តែ តម្រូវអោយឧបករណ៍ទាំងពីរដំណើរការលើ Platform ផ្សេងគ្នានេះត្រូវធ្វើបច្ចុប្បន្នភាពឡើងមកកាន់កម្មវិធី WhatsApp ជំនាន់ចុងក្រោយបំផុតដូចគ្នា។ ហើយប្រសិនបើឧបករណ៍ទាំងពីរនេះ (iOS/Android) មិនបានធ្វើបច្ចុប្បន្នភាពឡើងមកជំនាន់ថ្មីទេ ក្រុមហ៊ុន WhatsApp នឹងបញ្ជាក់ប្រាប់អ្នកប្រើអោយធ្វើបច្ចុប្បន្នភាពកម្មវិធីនេះនៅលើឧបករណ៍របស់ពួកគេជាមុន ទើបផ្តល់លទ្ធភាពអាចធ្វើការផ្ទេរទិន្នន័យគណនី WhatsApp រវាងឧបករណ៍ទាំងពីរនេះបាន។

នាពេលបច្ចុប្បន្ននេះ គឺគ្មានវិធីណាដែលអាចធ្វើការផ្ទេរទិន្នន័យគណនី WhatsApp ពីឧបករណ៍ iOS ទៅកាន់ឧបករណ៍ Android បានឡើយ ដែលធ្វើអោយអ្នកប្រើប្រាស់ពិបាកនៅពេលដែលពូកគេចង់ធ្វើការផ្ទេរគណនី WhatsApp ទៅវិញទៅមករវាងឧបករណ៍ប្រើប្រព័ន្ធ Ecosystems ផ្សេងគ្នាទាំងពីរនេះ។ សូមបញ្ជាក់ថា នៅលើឧបករណ៍ iOS កម្មវិធី WhatsApp ប្រើប្រាស់គណនី iCloud ក្នុងការរក្សាទិន្នន័យរបស់អ្នកប្រើ (Backups) ដូចនេះគឺផ្តល់នូវភាពងាយស្រួលក្នុងការប្តូរទិន្នន័យគណនីទៅកាន់ឧបរណ៍ iOS ថ្មី ដោយគ្រាន់តែធ្វើការ Restore មកវិញ។

ចំនែកនៅលើឧបករណ៍ Android គឺប្រើប្រាស់គណនី Google Drive ដើម្បីរក្សាទុកទិន្នន័យ និងទាញយកទិន្នន័យគណនី WhatsApp មកវិញនៅពេលពួកគេចង់ផ្លាស់ប្តូរឧបករណ៍ថ្មី។ ក្រៅតែពីមុខងារដែលផ្តល់លទ្ធភាពអោយអ្នកប្រើអាចផ្ទេរទិន្នន័យគណនីទៅវិញទៅមករវាងឧបករណ៍ iOS និង Android ទៅ ក្រុមហ៊ុន WhatsApp ក៏បាននឹងកំពុងធ្វើការតេស្តសាកល្បងលើមុខងារថ្មីៗមួយចំនួនទៀតផងដែរដូចជាមុខងារ Password-protected iCloud backups, Self-destructing images និងមុខងារ link គណនី WhatsApp មួយទៅប្រើនៅលើឧបករណ៍ 4 ផ្សេងគ្នាជាដើម៕