កាលពីចុងខែកុម្ភៈ, 2021 ក្រុមហ៊ុន realme បានប្រកាសចេញកាសស្តាប់ឥតខ្សែស៊េរីថ្មី Bud Air 2 នៅប្រទេសឥណ្ឌា ក្រោយមកបានប្រហែលមួយសប្តាហ៍កាសស្តាប់ឥតខ្សែស៊េរីថ្មីនេះត្រូវបាន realme នាំយកទៅប្រកាសចេញលក់នៅលើទីផ្សារក្នុងបណ្តាប្រទេសជាច្រើនទៀត។ ហើយនៅពេលនេះ realme ក៏បានបញ្ចេញនូវកាស WTS Buds ស៊េរីថ្មីមួយទៀតដែលមានតម្លៃកាន់តែធូរថ្លៃជាងស៊េរីមុននោះគឺ realme Buds Air 2 Neo ដោយកាសស៊េរីថ្មីនេះត្រូវបានក្រុមហ៊ុនប្រកាសចេញជាសកលនៅប្រទេសប៉ាគីស្ថាន។
realme Buds Air 2 Neo គឺមានការឌីស្សាញឡើងប្រហាក់ប្រហែលគ្នានឹងស៊េរី realme Buds Q ដែរ និងមានជម្រើសពីរពណ៌គឺពណ៌ខ្មៅហៅថា Active Black និងពណ៌ប្រផេះហៅថា Calm Cray។ ជាមួយគ្នានេះដែរ realme Buds Air 2 Neo ត្រូវបានក្រុមហ៊ុនបំពាក់នូវ Driver Sound ខ្នាត 10mm និងទ្រទ្រង់នូវបច្ចេកវិទ្យាការពារទឹកកម្រិត IPX5 Splash resident។ កាសស្តាប់ឥតប្រើខែ្សស៊េរីថ្មីនេះប្រើប្រាស់បច្ចេកវិទ្យាប្លូធូស 5.2 និងទ្រទ្រង់នូវភាសាកូដសំឡេង AAC និង SBC។ realme Buds Air 2 Neo មានភ្ជាប់នូវមុខងារកំចាត់សំឡេងរំខាន ANC (Active Noise Cancellation) និង ENC (Environmental Noise Cancellation) និងប្រើប្រាស់ឈីបជំនាន់ថ្មី realme R2 Chip។
បើតាមការបញ្ជាក់ពី realme ជាមួយមុខងារ ANC នៅលើកាសស៊េរីថ្មីនេះគឺមានលទ្ធភាពកាត់បន្ថយសំឡេងរំខានពីមជ្ឈដ្ឋានខាងក្រៅបានក្នុងកម្រិត 25dB។ បន្ថែមពីនេះវាក៏មានមុខងារ Transparency Mode ដែលជួយកាត់បន្ថយភាពទាក់អាក់សំឡេងបានក្នុងកម្រិត 88ms latency នៅពេលលេងហ្គេមថែមទៀតផង។ ហើយសម្រាប់មុខងារពិសេសៗមួយចំនួនទៀតដែលមាននៅលើកាសស្តាប់ស៊េរីថ្មីនេះគឺមានដូចជា Google Fast Pair, Touch gesture control និង realme Link App ជាដើម។
សម្រាប់ថ្មរបស់ realme Buds Air 2 Neo វិញគឺសាកពេលម្តងអាចកំដរការស្តាប់តន្ត្រីដោយបិទមុខងារ ANC បានខ្ទង់ 7 ម៉ោង ហើយបើបើកមុខងារ ANC គឺអាចកាន់បាន 5 ម៉ោង។ ចំនែកប្រអប់របស់វិញគឺប្រើ នូវរន្ធសាកថ្មប្រភេទ USB-C ដែលសាកពេញម្តងផ្តល់លទ្ធភាពសាកបន្តអោយកាសនិមួយៗអាចកាន់ប្រើបានរហូតដល់ 20 ម៉ោង ដោយបើក ANC និងបានដល់ 28 ម៉ោងនៅពេលបិទ ANC។ សម្រាប់តម្លៃវិញ realme Buds Air 2 Neo ត្រូវបានក្រុមហ៊ុនប្រកាសចេញលក់នៅទីផ្សារប្រទេសប៉ាគីស្ថានក្នុងតម្លៃ $53 ប៉ុន្តែ នៅកំឡុងពេលចេញលក់ Flash Sale លើកដំបូងអតិថិជនអាចជាវបានក្នុងតម្លៃពិសេសត្រឹមតែ $39 ប៉ុណ្ណោះ។ ក្រុមហ៊ុន realme ក៏នឹងនាំយកកាសស្តាប់ស៊េរីថ្មីនេះទៅប្រកាសចេញលក់ក្នុងបណ្តាទីផ្សារប្រទេសជាច្រើនទៀតផងដែរនៅថ្ងៃបន្ទាប់៕