ដោយសារតែ iPhone 12 Series មិនត្រឹមតែ Apple ទេដែលរកចំណូលបានច្រើនសូម្បីតែ Foxconn ក៏កើបបានប្រាក់ចំណូលខ្ពស់កប់ដែរ

ក្រុមហ៊ុន Hon Hai ដែលជាក្រុមហ៊ុនមេរបស់ Foxconn ដែលជាអ្នកផ្គត់ផ្គង់ការផលិតទូរស័ព្ទ iPhone ដ៏ធំមួយរបស់ក្រុមហ៊ុន Apple ទើបតែបានចុះបញ្ជីប្រាក់ចំណូលដែលមានសាច់ប្រាក់សរុបចំនួន 47 ពាន់លានដុល្លារអាមេរិកចូលក្នុងបញ្ចីប្រាក់ចំណូលសម្រាប់ត្រីមាសទី 1 ឆ្នាំ 2021។ តួលេខនេះបានបង្ហាញពីការកើនឡើងពីមួយឆ្នាំទៅមួយឆ្នាំដល់ទៅ 44 ភាគរយ ហើយកំណើនប្រាក់ចំណូលកើនខ្ពស់បែបនេះគឺដោយសារតែតម្រូវការខ្ពស់សម្រាប់ទូរស័ព្ទ iOS ជំនាន់ថ្មីគឺ iPhone 12 Series។

បើតាមរបាយការណ៍ដែលចេញផ្សាយពី AppleInsider បានបង្ហាញថា តម្រូវការសម្រាប់ទូរស័ព្ទ iPhone 12 Series គឺកើនឡើងខ្ពស់បំផុតមិនធ្លាប់មាន នោះដោយសារតែការបញ្ជាទិញពីអ្នកដែលតម្រូវអោយការធ្វើការពីផ្ទះមានចំនួនច្រើនលើសលប់ ដូចនេះតម្រូវការផលិតមានការកើនឡើងខ្ពស់តាមហ្នឹងដែរ អីចឹងហើយទើបជម្រុញអោយប្រាក់ចំណូលរបស់ Foxconn មានការកើនឡើងខ្ពស់ដល់ទៅ 44% ក្នុងត្រីមាសដំបូងក្នុងឆ្នាំ 2021 បើធៀបនឹងត្រីមាសដូចគ្នាកាលពីឆ្នាំ 2020។

ចំនុចសំខាន់មួយទៀតដែលធ្វើអោយតម្រូវការសម្រាប់ iPhone 12 Series កើនឡើងខ្ពស់ក៏ដោយសារទូរស័ព្ទ iOS ជំនាន់ថ្មីនេះត្រូវបានក្រុមហ៊ុនបំពាក់នូវប្រព័ន្ធសេវា 5G ដែលពិតជាត្រូវចិត្តបំផុតសម្រាប់អ្នកប្រើប្រាស់ស្របតាមនិន្នាការដែលតម្រូវអោយធ្វើការពីផ្ទះនៅក្នុងកាលៈទេសៈដែលពិភពលោកកំពុងប្រឈមខ្លាំងពីការរីករាលដាលនៃជំងឺ COVID-19។

ក្នុងខែមិនាដែលទើបកន្លងទៅថ្មីៗនេះក្រុមហ៊ុន Foxconn រកប្រាក់ចំណូលពីការលក់បានចំនួនដល់ទៅ 15,43 ពាន់លានដុល្លារអាមេរិក។ ទន្ទឹមនេះ Hon Hai ដែលជាមេរបស់ Foxconn បានចេញរបាយការណ៍បញ្ជាក់ថា ប្រាក់ចំណូលរបស់ក្រុមហ៊ុនកើនឡើងដល់ 57% នៅពីរត្រីមាសចុងក្រោយ។ ទោះជាយ៉ាងណា Hone  Hai ក៏បានព្រមានពីកង្វះខាតគ្រឿងបន្លាស់ពិសេសគឺបន្ទះឈីបតែម្តង ដែលអាចនឹងត្រូវបន្តអូសបន្លាយរហូតដល់ឆ្នាំ 2022 ដែលបញ្ហានេះនឹងធ្វើអោយមានការប៉ះពាល់ដល់ការផ្គត់ផ្គង់របស់ខ្លួនរហូតដល់ 10%  ហើយក៏ជះឥទ្ធិផលខ្លាំងដល់ឧស្សាហកម្មផ្សេងៗផងដែរ៕