បន្ទាប់ពីការហាមប្រាមទៅលើក្រុមហ៊ុន Huawei នៅក្នុងរយៈពេល 2 ឆ្នាំនេះ គឺបានធ្វើអោយអាជីវកម្មស្មាតហ្វូនរបស់ក្រុមហ៊ុននេះ គឺមានការធ្លាក់ចុះខ្លាំងមែនទែន។ ក្រុមហ៊ុន Huawei មិនបានបដិសេធនូវការជះឥទ្ធិពលនៃការហាមប្រាមនៅក្នុងសហរដ្ឋអាមេរិកនោះទេ ទៅលើអាជីវកម្មស្មាតហ្វូនរបស់ខ្លួននោះ។ ជាក់ស្តែង នាយកប្រតិបត្តិជាន់ខ្ពស់របស់ក្រុមហ៊ុននេះ បានសារភាពថា ក្រុមហ៊ុននេះ គឺព្យាយាមធ្វើយ៉ាងណា គឺបន្តការធ្វើអជីវកម្មនេះអោយនៅមានជីវិត។
នៅថ្ងៃនេះ តាមការបញ្ជាក់នៅក្នុងរបាយការណ៍ជាច្រើន ដែលមានប្រភពចេញពីប្រទេសចិននោះ គឺបានបង្ហាញថា ស្មាតហ្វូន Huawei នៅក្នុងប្រទេសចិន គឺមិនអាចរកទិញបានច្រើនដូចមុននោះទេ។ នៅពេលដែលអតិថិជនសួរថា តើពួកគេអាចរកទិញស្មាតហ្វូន Huawei បាននៅកន្លែងណានោះ ហាងលក់ Huawei Store បានប្រាប់ថា មិនមែនតែហាងរបស់យើងដែលអស់ពីស្តុកនោះទេនៅតាមបណ្តា Store នានាក៏អស់ដែរ។ អ្នកអាចទៅកាន់ហាង Stores ជាច្រើនទៀត នៅក្នុងទីក្រុងប៉េកាំង អ្នកក៏នឹង ឃើញស្ថានភាពគឺស្រដៀងគ្នាផងដែរ។
យោងតាមរបាយការណ៍ខាងលើបាននិយាយបន្តថា បន្ទាប់ពីបានចូលទៅកាន់ហាង Huawei Stores ជាច្រើននៅក្នុងប្រទេសចិន គេបានគេសង្កេតឃើញថា ពិតជាមានស្ថានភាពបែបនេះមែន។ នៅតាមកន្លែងដាក់តាំង គឺមានស្មាតហ្វូនតែ 2 ឬ 3 ម៉ូដែលប៉ុណ្ណោះដែលមានស្តុក ហើយហាងខ្លះ គឺមានតែមួយម៉ូដែលប៉ុណ្ណោះ ដែលនេះសបញ្ជាក់ថា ចំនួនស្តុកស្មាតហ្វូន គឺមានចំនួនតិចមែនទែនមិនដល់ 10 គ្រឿងផង។
លោក Yu Chengdong នាយកប្រតិបត្តិរបស់ក្រុមហ៊ុន Huawei បាននិយាយថា នៅក្នុងពេលមិនដល់ 2 ឆ្នាំនេះ សហរដ្ឋអាមេរិកបានដាក់ទណ្ឌកម្ម 4 លើកទៅលើក្រុមហ៊ុន Huawei រួចទៅហើយ។ អាជីវកម្មរបស់ក្រុមហ៊ុន Huawei គឺមានស្ថានភាពលំបាក ហើយក្រុមហ៊ុនមិនអាចធ្វើការដឹកជញ្ជូនបាននោះទេ។ ផលិតផល High-End គឺត្រូវបានទីផ្សាររបស់ Apple កាន់កាប់ផងដែរ។ លោក Yu Chengdong បានពន្យល់ថា ស្មាតហ្វូន High-End ជាច្រើនរបស់ក្រុមហ៊ុន Huawei និងទីផ្សារថេប្លេតនៅក្នុងប្រទេសចិន ត្រូវបានដណ្តើមយកដោយក្រុមហ៊ុន Apple។ សម្រាប់ទីផ្សារស្មាតហ្វូនថ្នាក់ទាប និងស្មាតហ្វូនថ្នាក់កណ្តាលវិញនោះ ក្រុមហ៊ុន OPPO, vivo និង Xiaomi ក៏បានដណ្តើមយកផងដែរ។ ចំណែកទីផ្សារសកលរបស់យើង គឺបែងចែកទៅកាន់ក្រុមហ៊ុន Samsung និង Apple ហើយនិងក្រុមហ៊ុនផលិតស្មាតហ្វូនជាច្រើនរបស់ចិន៕
