ក្រុមហ៊ុន Xiaomi បានប្រកាសចេញទូរស័ព្ទហ្គេមស៊េរីថ្មីដំបូងរបស់ខ្លួនដែលជ្រកក្រោមស្លាកសញ្ញា Redmi ម៉ូដែល Redmi K40 Game Enhance Edition នៅឯប្រទេសចិនកាលពីខែមុននេះ។ ហើយ ទូរស័ព្ទហ្គេមស៊េរីថ្មីនេះត្រូវបានក្រុមហ៊ុនប្រកាសចេញលក់ Flash Sale លើកដំបូងក្នុងទីផ្សារប្រទេសចិនកាលពីចុងខែមេសាកន្លងទៅថ្មីៗនេះ ដោយលក់បានចំនួនច្រើនមែនទែនគឺដល់ទៅ 1 ម៉ឺនគ្រឿងក្នុងរយះពេលតែ 1 នាទី។ ប៉ុន្តែ ទោះជាយ៉ាងណាក្រុមហ៊ុន Redmi ដែល Sub-Brand របស់ Xiaomi មិនបានប្រកាសព័ត៌មានពីការនាំចេញ K40 Game Enhance Edition ទៅកាន់ទីផ្សារសកលឡើយ។
ដោយឡែកក្នុងពេលនេះបើតាមការចុះបញ្ចីរបស់ស្ថាប័ន Google Play Console បានបង្ហាញសញ្ញាថា Redmi K40 Game Enhance Edition នឹងមានចេញលក់នៅលើទីផ្សារសកលក្នុងពេលឆាប់ៗនេះ។ ស្ថាប័ននេះបានបញ្ជាក់ទៀតថា K40 Game Enhance Edition ដែលជា Global Version គឺមានគុណសម្បត្តិដូចគ្នាទៅនឹង Chinese Version ដែរ ដូចជាមានអេក្រង់កម្រិត Full-HD+ ទំហំ 6.67 អ៊ីញជាមួយកម្រិតដង់ស៊ីតេភាពច្បាស់ 440ppi, ប្រតិបត្តិការដោយ Android 11 ជាមួយស្បែកមុខកម្មវិធី MIUI12.5 រត់នៅលើបន្ទះឈីបកំពូលរបស់ MediaTek ស៊េរី 6nm Dimensity1200 5G មានជំនួយដោយរ៉េមទំហំ 8GB/12GB និងអង្គផ្ទុកទិន្នន័យ 256GB UFS3.1។
Redmi K40 Game Enhance Edition មានកាមេរ៉ាក្រោយ 3 គ្រាប់ទំហំ 64MP+8MP+2MP និងកាមេរ៉ាសែលហ្វីជាលែនទំលុះអេក្រង់ទំហំ 16MP។ ទូរស័ព្ទហ្គេមស៊េរីថ្មីនេះមានថ្មទំហំធំដល់ 5,065mAh ទ្រទ្រង់បច្ចេកវិទ្យាសាកថ្មល្បឿនលឿនកំលាំង 67W។ បន្ថែមពីនេះ K40 Game Enhance Edition ក៏មានភ្ជាប់នូវប្រព័ន្ធ Speaker Stereo របស់ក្រុមហ៊ុន JBL និងមានប៊ូតុង Pop-Up Trigger ឬ Shoulder Buttons នៅលើគែមខាងស្តាំស្ថិតនៅត្រង់ផ្នែកលើក្រោមសម្រាប់បញ្ជាការលេងហ្គេមផងដែរ។
Redmi K40 Game Enhance Edition ត្រូវបានគេរំពឹងថានឹងចេញលក់នៅទីផ្សារប្រទេសឥណ្ឌាក្នុងនាមជា POCO Phone ហើយបើតាមរបាយការណ៍ថ្មីចុងក្រោយនេះទូរស័ព្ទហ្គេមនេះអាចនឹងប្រើឈ្មោះថ្មីថា POCOF3 GT ប៉ុន្តែ ទោះជាយ៉ាងណាក្រុមហ៊ុន Redmi ប្រចាំនៅប្រទេសឥណ្ឌាមិនទាន់បញ្ចេញរបាយការណ៍ផ្លូវការណ៍ណាមួយជុំវិញព័ត៌មានដែលបានលើកឡើងនេះនោះ៕
