កាលពីថ្ងៃទី 23 ខែមេសាកន្លងទៅក្រុមហ៊ុន Samsung បានបញ្ចេញ Firmware ថ្មីដើម្បីដាក់អោយធ្វើបច្ចុប្បន្នភាពនៅលើនាឡិកាឆ្លាតវៃរបស់ខ្លួនម៉ូដែល Galaxy Watch ដែលចេញកាលពីឆ្នាំ 2018 និង Galaxy Watch 3-2020 ដើម្បីជួយពង្រឹងទៅលើស្ថិរភាពប្រព័ន្ធសេវា Wi-Fi ក៏ដូចជាជុសជុលលើបញ្ហាប្រព័ន្ធក្នុងម៉ាស៊ីនមួយចំនួន។ ដោយឡែកក្នុងពេលនេះ Samsung ក៏បានបញ្ចេញកំនែប្រែអាប់ឌែត Firmware ថ្មីសម្រាប់នាឡិកាដៃឆ្លាតវៃម៉ូដែល Galaxy Watch Active 2 (SM-R820) និង Galaxy Watch 3 (SM-R840) បន្ថែមទៀតផងដែរ។
បច្ចុប្បន្ននាឡិកាដៃឆ្លាតវៃទាំងពីរម៉ូដែលខាងលើនេះគឺប្រតិបត្តិការដោយ TizenOS 5.5.0.2 ហើយសម្រាប់ Firmware ថ្មីដែលដាក់អោយធ្វើបច្ចុប្បន្នភាពពេលនេះសម្រាប់ម៉ូដែល Watch Active 2 គឺមានលេខកូដ R820XXU1DUD1 ចំនែក Watch 3 (SM-R840) គឺមានលេខកូដ R840XXU1BUD2។ អត្ថប្រយោជន៍ដែលទទួលបានក្រោយការធ្វើបច្ចុប្បន្នភាព Firmware ថ្មីនេះ ដោយនៅលើ Galaxy Watch 3 គឺទទួលបានការពង្រឹងបន្ថែមទៅលើប្រព័ន្ធដំណើរការរបស់ម៉ាស៊ីនអោយកាន់តែមានស្ថិរភាពល្អជាងមុនបន្ថែមទៀត ចំនែកនៅលើម៉ូដែល Galaxy Watch Active 2 វិញគឺទទួលបានការពង្រឹងទៅលើស្ថិរភាពប្រព័ន្ធដំណើរការម៉ាស៊ីន ប្រព័ន្ធចាប់សេវា Wi-Fi និងកម្មវិធីសារ (Message App) ផងដែរ។
ដើម្បីទទួលបានការធ្វើបច្ចុប្បន្នភាព Firmware ថ្មីនៅលើនាឡិកាដៃឆ្លាតទាំងពីរម៉ូដែលខាងលើនេះ ម្ចាស់របស់នាឡិកាដៃឆ្លាតទាំងពីរនេះអាចធ្វើការទាញយកដំឡើងបានដោយផ្ទាល់តាមរយះកម្មវិធី Galaxy Wearable App នៅលើទូរស័ព្ទស្មាតហ្វូនដែលបានភ្ជាប់ជាមួយនាឡិកាដៃឆ្លាតវៃទាំងពីរនេះ៕
